Coffee Is Good for Your Heart?: కాఫీతో గుండె ఆరోగ్యం మెరుగవుతుందా..? తాజా అధ్యయనం ఏమి చెబుతోంది?

Coffee Is Good for Your Heart?: రోజూ ఉదయం కాఫీతో రోజును ప్రారంభించే వారికి ఓ శుభవార్త. మితంగా కాఫీ తాగడం వల్ల కేవలం శరీరానికి ఉత్సాహం మాత్రమే కాదు, గుండె ఆరోగ్యానికీ ప్రయోజనం కలిగే అవకాశం ఉందని అమెరికన్ హార్ట్ అసోసియేషన్ (American Heart Association – AHA) తాజాగా వెల్లడించింది. వైద్యులు చెబుతున్న ప్రకారం.. రోజుకు 8 ఔన్సుల పరిమాణంలో 2 నుంచి 4 కప్పుల కాఫీ తాగడం గుండె జబ్బులు, గుండె వైఫల్యం (Heart Failure), స్ట్రోక్, టైప్-2 మధుమేహం, అలాగే గుండె స్పందనలో వచ్చే అవకతవకలైన ఏట్రియల్ ఫిబ్రిలేషన్ (AFib) ప్రమాదాన్ని తగ్గించే అవకాశం ఉందని అధ్యయనం సూచిస్తోంది.

అయితే, రోజుకు 5 కప్పులకంటే ఎక్కువ లేదా 400 మిల్లీగ్రాములకు మించి కేఫిన్ తీసుకోవడం వల్ల గుండె వైఫల్యం ప్రమాదం పెరిగే అవకాశం ఉందని పరిశోధన హెచ్చరించింది.. కాఫీ వల్ల కలిగే ప్రయోజనాలు కేవలం కేఫిన్ వల్ల మాత్రమే కాకుండా, అందులో సహజసిద్ధంగా ఉండే క్లోరోజెనిక్ యాసిడ్ (Chlorogenic Acid) వంటి యాంటీ ఆక్సిడెంట్ సమ్మేళనాల వల్ల కూడా లభిస్తాయని చెప్పారు. కాఫీ ఎలా తయారు చేసుకుంటున్నామన్నది కూడా ఆరోగ్యంపై ప్రభావం చూపుతుందని వివరించారు. కాఫీలో అధికంగా చక్కెర, క్రీమ్, ఫ్లేవర్డ్ సిరప్స్ కలిపితే ఆరోగ్య ప్రయోజనాలు తగ్గిపోతాయని సూచించారు. అలాగే ఫ్రెంచ్ ప్రెస్, టర్కిష్ కాఫీ వంటి ఫిల్టర్ చేయని కాఫీల్లో LDL (చెడు కొలెస్ట్రాల్) పెంచే సమ్మేళనాలు ఉండే అవకాశం ఉందని పేర్కొన్నారు. అందుకే పేపర్ ఫిల్టర్‌తో తయారు చేసిన కాఫీ తాగడం మంచిదని సలహా ఇచ్చారు. డీకాఫ్ కాఫీలో కూడా ఈ సమ్మేళనాలు ఉంటాయని తెలిపారు.

కాఫీ తాగే సమయం కూడా కీలకమని ఆయన చెప్పారు. కేఫిన్ ప్రభావం శరీరంలో 5 నుంచి 6 గంటల వరకు ఉండే అవకాశం ఉంది. అందువల్ల మధ్యాహ్నం లేదా సాయంత్రం కాఫీ తాగితే నిద్రపై ప్రభావం పడుతుందని, నిద్ర తగ్గడం వల్ల ఆరోగ్య ప్రయోజనాలు తగ్గే అవకాశం ఉందని హెచ్చరించారు. అలాగే కాఫీతో పోలిస్తే ఎనర్జీ షాట్స్ పూర్తిగా భిన్నమని స్పష్టం చేశారు. వీటిలో అధిక మోతాదులో కేఫిన్‌తో పాటు ఇతర రసాయన పదార్థాలు ఉండటంతో, ఆరోగ్యంగా ఉన్నవారిలో కూడా గుండె స్పందనలో అసాధారణ మార్పులు (Arrhythmia) వచ్చే ప్రమాదం ఉందని చెప్పారు.

మొత్తంగా చూస్తే, రోజుకు 2 నుంచి 4 కప్పుల ఫిల్టర్ కాఫీ, తక్కువ చక్కెరతో, మితంగా తీసుకోవడం గుండె ఆరోగ్యానికి ఉపయోగకరంగా ఉండొచ్చని తాజా పరిశోధనలు సూచిస్తున్నాయి. అయితే ప్రతి వ్యక్తి ఆరోగ్య పరిస్థితి భిన్నంగా ఉంటుంది కాబట్టి, గుండె సంబంధిత సమస్యలు లేదా ఇతర ఆరోగ్య సమస్యలు ఉన్నవారు వైద్యుల సలహాతోనే కాఫీ మోతాదును నిర్ణయించుకోవడం మంచిదని నిపుణులు సూచిస్తున్నారు.