క్యారెట్ తినడం వల్ల అనేక ఆరోగ్య ప్రయోజనాలు ఉన్నాయి. రోజూ క్యారెట్లు తినడం ఆరోగ్యానికి ఎంతో మేలు చేస్తుంది. వారానికి కనీసం రెండుసార్లు క్యారెట్లు తీసుకోవడం ద్వారా అనేక రకాల వ్యాధుల నుంచి రక్షణ పొందవచ్చని ఆరోగ్య నిపుణులు చెబుతున్నారు. క్యారెట్లను సలాడ్లు, జ్యూస్లు వంటి అనేక రూపాల్లో ఆహారంలో చేర్చుకోవచ్చు.
క్యారెట్లలో విటమిన్ ఏ, ఫైబర్, యాంటీ ఆక్సిడెంట్లు సమృద్ధిగా ఉంటాయి. ఇవి కంటి చూపును మెరుగుపరచడంలో, జీర్ణక్రియను సక్రమంగా ఉంచడంలో, అలాగే శరీర రోగనిరోధక శక్తిని పెంచడంలో సహాయపడతాయి. చాలా మంది క్యారెట్లను పచ్చిగా తినడానికి ఇష్టపడుతుంటారు. మరికొందరు వాటిని వివిధ వంటకాలలో ఉపయోగించి తీసుకుంటారు. అయితే, వారానికి 2 నుండి 4 పచ్చి క్యారెట్లు తినడం వల్ల కొలొరెక్టల్ క్యాన్సర్ ప్రమాదాన్ని దాదాపు 17 శాతం వరకు తగ్గించవచ్చని కొన్ని అధ్యయనాలు వెల్లడిస్తున్నాయి. కొలొరెక్టల్ క్యాన్సర్ అనేది పెద్దప్రేగు లేదా పురీషనాళంలో ప్రారంభమవుతుంది. ఇది సాధారణంగా “పాలిప్స్” అని పిలువబడే పెరుగుదలల కారణంగా ఏర్పడుతుందని నిపుణులు తెలిపారు.
క్యారెట్లలో కెరోటినాయిడ్లు, ల్యూటిన్ వంటి ముఖ్యమైన సమ్మేళనాలు ఉంటాయి. వీటిని వారానికి కనీసం రెండుసార్లు తీసుకోవడం వల్ల పేగుల్లో పాలిప్స్ ఏర్పడకుండా నిరోధించవచ్చు. అంతేకాకుండా, క్యారెట్లలో ఉన్న శోథ నిరోధక లక్షణాలు రక్తనాళాలపై ఒత్తిడిని తగ్గించడంలో సహాయపడతాయి. ఇవి శరీర రోగనిరోధక శక్తిని పెంచుతాయి.
క్యారెట్లు విటమిన్ కె, విటమిన్ బి6 వంటి ఇతర అవసరమైన పోషకాలకు కూడా మంచి మూలం. వీటిలోని బీటా-కెరోటిన్ కంటి సమస్యలు, రేచీకటి వంటి సమస్యలను నివారించడంలో సహాయపడుతుంది. అయితే, క్యారెట్లతో తయారు చేసిన స్వీట్లు లేదా అధిక చక్కెర కలిగిన ఆహారాల కంటే పచ్చి క్యారెట్లు లేదా స్వల్పంగా ఉడికించిన క్యారెట్లు తీసుకోవడం ఎక్కువ ప్రయోజనకరం.ఈ సమాచారం అంతా ఇంటర్నెట్ ఆధారంగా సేకరించబడింది. అయితే క్యారెట్లను అధిక మోతాదులో తీసుకునే ముందు తప్పనిసరిగా వైద్య నిపుణుల సలహా తీసుకోవడం ఉత్తమం.