స్టార్బక్స్ తన పునరుద్ధరణ చర్యల్లో భాగంగా 300 మంది కార్పొరేట్ ఉద్యోగులను తొలగిస్తున్నట్లు.. కొన్ని అమెరికా కార్యాలయాలను మూసివేస్తున్నట్లు శుక్రవారం ప్రకటించింది. అయితే.. కాఫీహౌస్ (స్టోర్) ఉద్యోగులపై దీని ప్రభావం ఉండదని స్పష్టం చేసింది. ఈ కోతలు కేవలం మార్కెటింగ్, హ్యూమన్ రిసోర్సెస్, సప్లై చైన్ మేనేజ్మెంట్ వంటి సపోర్ట్ విభాగాలకు మాత్రమే పరిమితం కానున్నాయి. ప్రస్తుతానికి అంతర్జాతీయ ఉద్యోగులకు ఎలాంటి ముప్పు లేనప్పటికీ, యూఎస్ వెలుపల ఉన్న కార్పొరేట్ నిర్మాణాన్ని కూడా సమీక్షిస్తున్నట్లు కంపెనీ తెలిపింది.
ఖర్చులను తగ్గించుకోవడంలో భాగంగా అట్లాంటా, డల్లాస్, చికాగో వంటి నగరాల్లో సరిగా వినియోగంలో లేని కార్యాలయాలను స్టార్బక్స్ మూసివేస్తోంది. మరోవైపు, టెన్నెస్సీలోని నాష్విల్లేలో కొత్త కార్పొరేట్ కార్యాలయాన్ని ప్రారంభిస్తున్నట్లు ప్రకటించింది. ఇది రాబోయే ఐదేళ్లలో దాదాపు 2,000 మందికి ఉపాధి కల్పించనుంది. ఈ మొత్తం పునరుద్ధరణ ప్రక్రియ వల్ల కంపెనీపై 400 మిలియన్ డాలర్ల భారం పడనుండగా, అందులో 120 మిలియన్ డాలర్లు ఎఫెక్ట్ అయిన ఉద్యోగుల ప్రయోజనాల కోసమే ఖర్చు కానుంది.
2024లో చైర్మన్ అండ్ సీఈఓగా బాధ్యతలు చేపట్టిన బ్రియాన్ నికోల్ నేతృత్వంలో స్టార్బక్స్ ఖర్చులు, సంక్లిష్టతలను తగ్గించే పనిలో పడింది. గత ఏడాది కూడా ఈ సంస్థ 2,000 మంది కార్పొరేట్ ఉద్యోగులను తొలగించి, వందలాది స్టోర్లను మూసివేసింది.
ఈ నిర్మాణం వల్ల కంపెనీ వేగంగా ఆవిష్కరణలు చేయగలుగుతోందని నికోల్ తెలిపారు. కస్టమర్ల అనుభవాన్ని మెరుగుపరచడానికి ఈ ఏడాది 1,000 అమెరికా స్టోర్లను మరింత సౌకర్యవంతంగా రీడిజైన్ చేయడంతో పాటు, రద్దీ సమయాల్లో వేగవంతమైన సేవల కోసం అదనపు బారిస్టాలను నియమించుకుంటున్నారు. ఈ వ్యూహాల వల్ల జనవరి-మార్చి త్రైమాసికంలో యూఎస్ సేమ్-స్టోర్ అమ్మకాలు 7 శాతం పెరిగాయి. ఈ పురోగతిని స్థిరమైన ఫలితాలుగా మార్చడమే తమ తదుపరి లక్ష్యమని నికోల్ పేర్కొన్నారు.