CAT 2026 Notification: IIMల్లో MBA చదవాలనుకునే వారికి అలర్ట్.. CAT 2026 నోటిఫికేషన్ విడుదల.. ఆగస్టు 3 నుంచి దరఖాస్తులు

దేశంలోని ప్రతిష్టాత్మకమైన ఇండియన్ ఇన్‌స్టిట్యూట్స్ ఆఫ్ మేనేజ్‌మెంట్ (IIMs)తో పాటు అగ్రశ్రేణి బిజినెస్ స్కూల్స్‌లో MBA, PGDM కోర్సుల్లో ప్రవేశాలకు నిర్వహించే కామన్ అడ్మిషన్ టెస్ట్ (CAT) 2026 అధికారిక నోటిఫికేషన్ విడుదలైంది. ఈ ఏడాది IIM ఇండోర్ పరీక్ష నిర్వహణ బాధ్యతలను చేపట్టింది. దేశవ్యాప్తంగా మేనేజ్‌మెంట్ విద్యను అభ్యసించాలని లక్ష్యంగా పెట్టుకున్న లక్షలాది మంది విద్యార్థులకు ఈ పరీక్ష ఎంతో కీలకం. CAT స్కోర్ ఆధారంగా 22 IIMలతో పాటు దేశంలోని 1,000కు పైగా ప్రముఖ మేనేజ్‌మెంట్ సంస్థల్లో ప్రవేశాలు కల్పిస్తారు.

ఆగస్టు 3 నుంచి దరఖాస్తులు

CAT 2026 కోసం ఆన్‌లైన్ దరఖాస్తు ప్రక్రియ ఆగస్టు 3, 2026 నుంచి ప్రారంభం కానుంది. ఆసక్తి గల అభ్యర్థులు సెప్టెంబర్ 15, 2026 వరకు అధికారిక వెబ్‌సైట్ ద్వారా దరఖాస్తు చేసుకోవచ్చు. పరీక్షను నవంబర్ 29, 2026న దేశవ్యాప్తంగా వివిధ పరీక్షా కేంద్రాల్లో కంప్యూటర్ బేస్డ్ టెస్ట్ (CBT) విధానంలో మూడు సెషన్లలో నిర్వహించనున్నారు.

CAT స్కోర్‌తో ఎక్కడ అడ్మిషన్?

CAT స్కోర్ ఆధారంగా కేవలం IIMలలోనే కాకుండా పలు ప్రముఖ మేనేజ్‌మెంట్ సంస్థల్లో కూడా ప్రవేశాలు లభిస్తాయి. వాటిలో 22 ఇండియన్ ఇన్‌స్టిట్యూట్స్ ఆఫ్ మేనేజ్‌మెంట్ (IIMs), FMS ఢిల్లీ, MDI గురుగ్రామ్, SPJIMR ముంబై, IITల మేనేజ్‌మెంట్ విభాగాలు, IIFT, IMI, IMT ఇతర 1,000కు పైగా ప్రముఖ MBA, PGDM కళాశాలలు పరీక్షలో ఉండే ప్రధాన విభాగాలు

CAT 2026లో అభ్యర్థుల విశ్లేషణాత్మక, తార్కిక సామర్థ్యాలను అంచనా వేసేందుకు మూడు ప్రధాన విభాగాల నుంచి ప్రశ్నలు అడుగుతారు.

VARC (Verbal Ability and Reading Comprehension)
DILR (Data Interpretation and Logical Reasoning)
QA (Quantitative Ability)

ఈ పరీక్షలో మంచి స్కోర్ సాధించాలంటే టైమ్ మేనేజ్ మెంట్, లాజికల్ థింకింగ్, సమస్యల పరిష్కార నైపుణ్యం ఎంతో కీలకం.

అర్హతలు ఏమిటి?

CAT 2026కు దరఖాస్తు చేసుకునే అభ్యర్థులు గుర్తింపు పొందిన విశ్వవిద్యాలయం నుంచి డిగ్రీ పూర్తి చేసి ఉండాలి.

జనరల్, EWS, OBC అభ్యర్థులు – కనీసం 50% మార్కులు
SC, ST, PwD అభ్యర్థులు – కనీసం 45% మార్కులు
అలాగే డిగ్రీ చివరి సంవత్సరం చదువుతున్న విద్యార్థులు కూడా ఈ పరీక్షకు దరఖాస్తు చేసుకోవడానికి అర్హులు.

నిపుణుల సూచనలు

విద్యా నిపుణుల అభిప్రాయం ప్రకారం, CAT పరీక్షలో విజయం సాధించాలంటే చివరి నిమిషం వరకు వేచి ఉండకుండా ముందుగానే నమోదు చేసుకోవాలి. క్రమం తప్పకుండా మాక్ టెస్టులు, సెక్షనల్ ప్రాక్టీస్, పరీక్ష విశ్లేషణ చేస్తూ ప్రిపరేషన్ కొనసాగించాలని సూచిస్తున్నారు.

MBA 2027 అడ్మిషన్లకు తొలి అడుగు

CAT 2026 నోటిఫికేషన్ విడుదలతో 2027 MBA అడ్మిషన్ ప్రక్రియ అధికారికంగా ప్రారంభమైనట్లే. అగ్రశ్రేణి మేనేజ్‌మెంట్ సంస్థల్లో చదవాలనే లక్ష్యంతో ఉన్న విద్యార్థులు అధికారిక నోటిఫికేషన్‌ను పూర్తిగా చదివి, సరైన వ్యూహంతో ఇప్పటి నుంచే ప్రిపరేషన్ ప్రారంభిస్తే మెరుగైన ఫలితాలు సాధించే అవకాశం ఉంటుంది.