US Midterm Elections 2026: అమెరికా మధ్యంతర ఎన్నికల ఫలితాల్లో డెమోక్రటిక్ పార్టీకి చెందిన ఇద్దరు అభ్యర్థులు ప్రత్యేకంగా వార్తల్లో నిలిచారు. మిచిగాన్ నుంచి అబ్దుల్ ఎల్-సయీద్ (Abdul El-Sayed) అమెరికా సెనేట్‌కు ఎన్నికై చరిత్ర సృష్టించగా, భారత సంతతికి చెందిన అమెరికన్ డెమోక్రాట్ పియా దండియా (Pia Dandiya) ఫ్లోరిడా నుంచి అమెరికా ప్రతినిధుల సభకు ఎన్నికయ్యారు. 42 ఏళ్ల అబ్దుల్ ఎల్-సయీద్ మిచిగాన్ నుంచి అమెరికా సెనేట్‌కు ఎన్నికైన తొలి ముస్లిం అభ్యర్థిగా నిలిచారు. మరోవైపు పియా దండియా ఫ్లోరిడా 22వ కాంగ్రెస్ నియోజకవర్గం నుంచి విజయం సాధించారు.
అబ్దుల్ ఎల్-సయీద్ ఎవరు?
అబ్దుల్ ఎల్-సయీద్ ఈజిప్టు మూలాలున్న అమెరికన్ ప్రజారోగ్య కార్యకర్త, రాజకీయ నాయకుడు. ఆయన మిచిగాన్‌లో డెమోక్రటిక్ పార్టీ తరఫున పోటీ చేసి రిపబ్లికన్ అభ్యర్థి మైక్ రోజర్స్ (Mike Rogers)పై విజయం సాధించారు. 85 శాతం ఓట్ల లెక్కింపు సమయంలో ఎల్-సయీద్‌కు సుమారు 22.07 లక్షల ఓట్లు (51.97 శాతం) లభించగా, మైక్ రోజర్స్‌కు సుమారు 19.55 లక్షల ఓట్లు వచ్చినట్లు సమాచారం. ఈ విజయంతో మిచిగాన్ రాష్ట్రం నుంచి అమెరికా సెనేట్‌కు ఎన్నికైన తొలి ముస్లిం వ్యక్తిగా అబ్దుల్ ఎల్-సయీద్ చరిత్ర సృష్టించారు.
విద్యాభ్యాసం, ప్రజారోగ్య రంగంలో అనుభవం
అబ్దుల్ ఎల్-సయీద్ వైద్య విద్యను University of Michigan, Columbia Universityల్లో అభ్యసించారు. అనంతరం ప్రతిష్టాత్మకమైన Oxford Universityలో రోడ్స్ స్కాలర్‌గా డాక్టరేట్ పూర్తి చేశారు. రాజకీయాల్లోకి రాకముందు ఆయన ప్రజారోగ్య రంగంలో పనిచేశారు. డెట్రాయిట్‌తో పాటు ఆగ్నేయ మిచిగాన్‌లోని వేన్ కౌంటీ ఆరోగ్య విభాగానికి నాయకత్వం వహించిన అనుభవం ఉంది.
అబ్దుల్ ఎల్-సయీద్ ప్రచారంలో ప్రధాన అంశాలు
ఎల్-సయీద్ ఎన్నికల ప్రచారంలో ప్రజల జీవన వ్యయం, ఆరోగ్య సంరక్షణ వంటి అంశాలకు ప్రాధాన్యత ఇచ్చారు. ఆయన ప్రధానంగా “Medicare for All” విధానానికి మద్దతు తెలిపారు. అలాగే ఆయన ప్రచారంలో ప్రస్తావించిన ముఖ్య అంశాలు:
అందరికీ ఆరోగ్య సంరక్షణ అందించే Medicare for All
ఇజ్రాయెల్‌కు సైనిక సహాయాన్ని నిలిపివేయాలనే డిమాండ్
ఎన్నికల నిధుల వ్యవస్థలో సంస్కరణలు
పెరుగుతున్న జీవన వ్యయంపై చర్యలు
2018లో మిచిగాన్ గవర్నర్ పదవికి జరిగిన డెమోక్రటిక్ పార్టీ ప్రైమరీలో పోటీ చేసిన ఎల్-సయీద్.. గ్రెచెన్ విట్మర్ చేతిలో ఓడిపోయారు. ఆ తర్వాత రాజకీయాల నుంచి కొంతకాలం దూరంగా ఉన్నారు. ఆ సమయంలో ఆయన ఒక పాడ్‌కాస్ట్ ప్రారంభించారు, పుస్తకం రాశారు. అలాగే యూట్యూబ్, టెలివిజన్ కార్యక్రమాల ద్వారా ప్రజలకు దగ్గరయ్యారు. ఏడు సంవత్సరాల తర్వాత తిరిగి రాజకీయ పోరులోకి వచ్చి ఇప్పుడు కీలక విజయాన్ని సాధించారు.
భారత సంతతి పియా దండియా ఫ్లోరిడాలో విజయం
అమెరికా మధ్యంతర ఎన్నికల్లో మరో కీలక పరిణామంగా భారత సంతతికి చెందిన డెమోక్రటిక్ అభ్యర్థి పియా దండియా ఫ్లోరిడా 22వ కాంగ్రెస్ నియోజకవర్గం నుంచి అమెరికా ప్రతినిధుల సభకు ఎన్నికయ్యారు. ఆమె రిపబ్లికన్ అభ్యర్థి కేసీ ఆస్కర్ (Casey Askar)ను ఓడించినట్లు ఎన్నికల ఫలితాల్లో వెల్లడైంది. పియా దండియాకు 51.9 శాతం ఓట్లు లభించగా, కేసీ ఆస్కర్‌కు 49.1 శాతం ఓట్లు వచ్చాయి.
పియా దండియా ఎవరు?
పియా దండియా భారతీయ మూలాలున్న కుటుంబానికి చెందిన తొలి తరం అమెరికన్. ఆమె ఫ్లోరిడాలోని Palm Beach Countyలో జన్మించి పెరిగారు. విద్యారంగంలో ఆమె తన కెరీర్‌ను ఉపాధ్యాయురాలిగా ప్రారంభించారు. అనంతరం న్యూయార్క్‌లోని హార్లెమ్ ప్రాంతంలో ఒక హైస్కూల్ ప్రిన్సిపల్‌గా పనిచేశారు. తక్కువ ఆదాయం ఉన్న కుటుంబాల పిల్లలకు మెరుగైన విద్య, ఉపాధి అవకాశాలు కల్పించాలనే లక్ష్యంతో ఆమె ఒక హైస్కూల్‌ను స్థాపించారు.
అబ్దుల్ ఎల్-సయీద్, పియా దండియా విజయాలు అమెరికా రాజకీయాల్లో వైవిధ్యం పెరుగుతున్నదానికి ఉదాహరణగా నిలుస్తున్నాయి. ఒకవైపు మిచిగాన్ నుంచి తొలి ముస్లిం సెనేటర్‌గా అబ్దుల్ ఎల్-సయీద్ ఎన్నిక కావడం చారిత్రాత్మకంగా మారగా, మరోవైపు భారత సంతతి అమెరికన్ అయిన పియా దండియా అమెరికా ప్రతినిధుల సభకు ఎన్నిక కావడం భారతీయ వర్గాల్లో ఆసక్తిని కలిగిస్తోంది.