US–Bangladesh Trade Deal: అమెరికా-బంగ్లాదేశ్‌ మధ్య వాణిజ్య ఒప్పందం.. కేవలం 1 శాతం తగ్గిన పన్నులు..!

US–Bangladesh Trade Deal: అమెరికా–బంగ్లాదేశ్ మధ్య కొత్త వాణిజ్య ఒప్పందం కుదిరింది. దీర్ఘకాల చర్చల అనంతరం అమెరికా బంగ్లాదేశ్‌పై విధిస్తున్న సుంకాలను కేవలం 1 శాతం మాత్రమే తగ్గిస్తూ 19 శాతానికి పరిమితం చేసింది. తొమ్మిది నెలల పాటు సాగిన చర్చల తర్వాత ఈ ఒప్పందం ఖరారైంది. మొదటగా బంగ్లాదేశ్ ఎగుమతులపై 37 శాతం వరకు సుంకాలు విధిస్తామని అమెరికా హెచ్చరించడంతో ఢాకా తీవ్ర ఆందోళనకు గురైంది. ఆ తర్వాత సుదీర్ఘ చర్చల నేపథ్యంలో గత ఆగస్టులో ఈ సుంకాన్ని 20 శాతానికి తగ్గించిన అమెరికా, తాజాగా మరో 1 శాతం తగ్గిస్తూ 19 శాతంతో వాణిజ్య ఒప్పందాన్ని ఖరారు చేసింది.

ఫిబ్రవరి 12న జరగనున్న బంగ్లాదేశ్ సార్వత్రిక ఎన్నికలకు ముందు, తాత్కాలిక ప్రధాన సలహాదారు ముహమ్మద్ యూనస్ ఈ ఒప్పందాన్ని అధికారికంగా ప్రకటించారు. కొత్త ద్వైపాక్షిక వాణిజ్య ఒప్పందం ప్రకారం, బంగ్లాదేశ్ దిగుమతులపై పరస్పర సుంకాలు 19 శాతానికి తగ్గినట్లు తెలిపారు. అంతేకాకుండా, అమెరికాలో తయారైన కొన్ని వస్త్రాలు, దుస్తుల ఉత్పత్తులకు సుంకం లేకుండా మార్కెట్ ప్రవేశం కల్పిస్తామని యూనస్ వెల్లడించారు. అమెరికన్ పత్తి లేదా మానవ నిర్మిత ఫైబర్‌లతో తయారైన కొన్ని బంగ్లాదేశ్ వస్త్రాలకు సున్నా సుంకంతో అమెరికా మార్కెట్లో ప్రవేశం కల్పించే మార్గాన్ని వాషింగ్టన్ హామీ ఇచ్చింది అని యూనస్ సోషల్ మీడియా వేదిక Xలో పేర్కొన్నారు.

ఈ ఒప్పందం ద్వారా బంగ్లాదేశ్ వస్త్ర రంగానికి గణనీయమైన ఉపశమనం లభించనుందని పరిశ్రమ వర్గాలు అభిప్రాయపడుతున్నాయి. అయితే, ఒక ముఖ్యమైన షరతు కూడా ఉంది. అమెరికన్ కాటన్ లేదా కృత్రిమ ఫైబర్‌లతో తయారైన దుస్తులకే సున్నా సుంకం వర్తిస్తుందని స్పష్టం చేశారు. దీంతో అమెరికన్ ముడి పదార్థాలతో తయారయ్యే వస్త్రాలకు మార్కెట్ డిమాండ్ ఎలా ఉంటుందన్న అంశం కీలకంగా మారింది. బంగ్లాదేశ్ ఆర్థిక వ్యవస్థకు వస్త్ర రంగమే వెన్నెముక. దేశ మొత్తం ఎగుమతి ఆదాయంలో 80 శాతానికి పైగా ఈ రంగం నుంచే వస్తోంది. సుమారు 4 కోట్ల మంది కార్మికులకు ఉపాధి కల్పిస్తున్న ఈ రంగం, జీడీపీలో దాదాపు 10 శాతం వాటాను కలిగి ఉంది. పెరుగుతున్న ఉత్పత్తి ఖర్చులు, ఇంధన ధరలు, కరెన్సీ హెచ్చుతగ్గులు, అంతర్జాతీయ ప్రమాణాల ఒత్తిడి కారణంగా ఇటీవలి కాలంలో వస్త్ర పరిశ్రమ ఇబ్బందులను ఎదుర్కొంది.

తక్కువ సుంకం రేటు అమెరికా వంటి అతిపెద్ద ఎగుమతి మార్కెట్‌లో బంగ్లాదేశ్ తయారీదారుల పోటీతత్వాన్ని కొనసాగించేందుకు దోహదపడుతుందని పరిశ్రమ నాయకులు అభిప్రాయపడుతున్నారు. ఉద్యోగ భద్రత, ప్రపంచ వస్త్ర సరఫరా గొలుసులో బంగ్లాదేశ్ స్థానాన్ని మరింత బలోపేతం చేయడంలో ఈ ఒప్పందం కీలక పాత్ర పోషిస్తుందని యూనస్ పేర్కొన్నారు. ఇదిలా ఉండగా, ఈ వాణిజ్య ఒప్పందం రాజకీయంగా కూడా కీలక సమయంలో కుదిరింది. బంగ్లాదేశ్‌లో మరో 48 గంటల్లో సార్వత్రిక ఎన్నికలు జరగనున్నాయి. 2024 ఆగస్టులో జరిగిన రాజకీయ పరిణామాల తర్వాత దేశం తాత్కాలిక ప్రభుత్వ పాలనలో ఉంది. ఎన్నికలకు ముందు చోటుచేసుకున్న హింసాత్మక ఘటనల నేపథ్యంలో, ఆర్థిక స్థిరత్వం మరియు అంతర్జాతీయ విశ్వాసాన్ని ప్రదర్శించేందుకు ఈ వాణిజ్య ఒప్పందం ఉపయోగపడుతుందని విశ్లేషకులు అభిప్రాయపడుతున్నారు.