Ban Social Media for Children Under 16: పిల్లలపై సోషల్ మీడియా ప్రభావం రోజురోజుకూ పెరుగుతున్న నేపథ్యంలో బ్రిటన్ ప్రభుత్వం కీలక నిర్ణయం తీసుకుంది. 16 ఏళ్లలోపు పిల్లలకు సోషల్ మీడియా వినియోగాన్ని నిషేధించనున్నట్లు బ్రిటన్ ప్రధానమంత్రి కీర్ స్టార్మర్ ప్రకటించారు. పిల్లలను డిజిటల్ వ్యసనం, అనుచిత కంటెంట్ మరియు ఇతర ఆన్లైన్ ప్రమాదాల నుంచి రక్షించడమే ఈ నిర్ణయం వెనుక ప్రధాన ఉద్దేశమని ప్రభుత్వం తెలిపింది. ఈ నిర్ణయం తీసుకోవడం అంత సులభం కాదని కీర్ స్టార్మర్ పేర్కొన్నారు. పలు పెద్ద టెక్నాలజీ కంపెనీలు ఈ నిర్ణయాన్ని వెనక్కి తీసుకోవాలని ప్రభుత్వంపై ఒత్తిడి తీసుకొస్తున్నప్పటికీ, పిల్లల భవిష్యత్తు దృష్ట్యా ప్రభుత్వం తన నిర్ణయానికి కట్టుబడి ఉంటుందని స్పష్టం చేశారు.
ఈ విషయాన్ని తన ఎక్స్ (ట్విట్టర్) ఖాతా ద్వారా వెల్లడించారు ప్రధాని కీర్ స్టార్మర్. చాలా మంది తల్లిదండ్రులు తమ పిల్లలు స్మార్ట్ఫోన్లు మరియు సోషల్ మీడియాకు బానిసలుగా మారుతున్నారని తన దృష్టికి తీసుకొచ్చారని ఆయన చెప్పారు. పిల్లలు తమ బాల్యాన్ని కోల్పోతున్నారని, వారిని సురక్షితమైన వాతావరణంలో పెరిగేలా చూడటం ప్రభుత్వ బాధ్యత అని ఆయన అభిప్రాయపడ్డారు. “నేటి ప్రపంచంలో సాంకేతికత పిల్లల జీవితంలోని ప్రతి అంశంలోకి చొచ్చుకుపోయింది. ఇది ఇకపై కొనసాగకూడదు. అందుకే పిల్లలకు వారి బాల్యాన్ని తిరిగి ఇవ్వడానికి మేము ఈ చర్యలు తీసుకుంటున్నాం” అని కీర్ స్టార్మర్ తన సందేశంలో పేర్కొన్నారు.
ఇదిలా ఉండగా, పిల్లల భద్రత విషయంలో బ్రిటన్ ప్రభుత్వం ఇటీవల టెక్ కంపెనీలపై ఒత్తిడిని పెంచింది. సోషల్ మీడియా వేదికల్లో వయస్సు ధృవీకరణ వ్యవస్థను తప్పనిసరి చేయాలని, పిల్లలకు హానికరమైన కంటెంట్ను తగ్గించేలా అల్గారిథమ్లలో మార్పులు చేయాలని సూచించింది. అలాగే అశ్లీల మరియు అనుచిత కంటెంట్ నుంచి చిన్నారులను రక్షించేందుకు మరిన్ని భద్రతా చర్యలు తీసుకోవాలని కోరింది. అంతేకాకుండా, పిల్లల కోసం రూపొందించిన ఆన్లైన్ గేమింగ్ మరియు వీడియో స్ట్రీమింగ్ ప్లాట్ఫారమ్లలో లైవ్ స్ట్రీమింగ్ సేవలపై కూడా ఆంక్షలు విధించాలని బ్రిటన్ ప్రభుత్వం భావిస్తోంది. ఈ చర్యల ద్వారా పిల్లల మానసిక ఆరోగ్యం, విద్య మరియు సామాజిక అభివృద్ధికి అనుకూల వాతావరణం కల్పించాలని లక్ష్యంగా పెట్టుకుంది.
గత ఏడాది ఆస్ట్రేలియా కూడా టీనేజర్లు మరియు పిల్లల కోసం సోషల్ మీడియా వినియోగంపై కఠిన నిబంధనలు అమలు చేసింది. ఆ నిర్ణయాన్ని ప్రపంచంలోని అనేక దేశాలు ప్రశంసించాయి. తాజాగా కెనడా కూడా పిల్లల సోషల్ మీడియా వినియోగాన్ని నియంత్రించే దిశగా చర్యలు చేపడుతున్నట్లు ప్రకటించింది. ఈ నేపథ్యంలో బ్రిటన్ తీసుకున్న తాజా నిర్ణయం ప్రపంచవ్యాప్తంగా చర్చనీయాంశంగా మారింది..