Google Job: 39 సార్లు ప్రయత్నించాడు.. చివరికి!

Taylor Cohen Gets Dream Job In Google After 39 Rejections: ప్రతి ఒక్కరికీ తమకంటూ ఒక డ్రీమ్ ఉంటుంది. దానిని నెరవేర్చుకునేందుకు దాదాపు అందరూ ప్రయత్నిస్తారు. కానీ, కొందరు మాత్రమే దాన్ని సాకారం చేసుకోగలరు. ఇతర బాధ్యతల కారణంగా.. తమ డ్రీమ్‌ని పక్కనపెట్టేసి, వచ్చిన దాంతోనే సర్దుబాటు చేసుకుంటారు. ఇంకొందరు.. ప్రయత్నాలు బెడిసికొట్టి, మళ్లీ ప్రయత్నించలేక చేతులు ఎత్తేస్తారు. కానీ.. ఒక వ్యక్తి మాత్రం అలా కాదు. తన కోరిక నెరవేరే దాకా ప్రయత్నాలు కొనసాగిస్తూనే వచ్చాడు. చివరికి తన డ్రీమ్ జాబ్‌ని సాధించాడు.

ఆ వివరాల్లోకి వెళ్తే.. అతని పేరు టైలర్ కొహెన్. యూఎస్‌లోని శాన్‌ప్రాన్సిస్కోకు చెందిన అతనికి గూగుల్‌లో ఉద్యోగం సంపాదించాలన్నదే లక్ష్యం. అందుకోసం అతడు ఏకంగా 39 సార్లు ప్రయత్నించాడు. ఇతర ఉద్యోగాలు చేస్తూనే.. గూగుల్‌కు దరఖాస్తు చేస్తూ వచ్చాడు. 2019 ఆగస్టు 25వ తేదీన ఇతను తొలిసారి గూగుల్ ఉద్యోగం కోసం దరఖాస్తు చేసుకున్నాడు. అప్పట్నుంచి తిరస్కరణ పర్వం మొదలైంది. ఎన్నిసార్లు రిజెక్ట్ అయినా, మానసికంగా ఎప్పుడూ కుంగిపోలేదు. ఈసారి కచ్ఛితంగా ఉద్యోగం సాధిస్తానన్న ఆత్మవిశ్వాసంతోనే ముందడుగు వేశాడు. ఎట్టకేలకు 2022 జులై 19వ తేదీన అతని కల నెరవేరింది. తన డ్రీమ్ ఉద్యోగాన్ని పొందాడు. దీంతో.. తన ఆనందాన్ని సోషల్ మీడియాలో పంచుకోగా, ఆ పోస్ట్ నెట్టింట్లో వైరల్ అవుతోంది.

‘‘పట్టుదలకు, పిచ్చితనానికి మధ్య ఒక సన్నని గీత ఉంటుంది. ఆ రెండింటిలో నాకుంది ఏంటో తెలుసుకునేందుకు ప్రయత్నిస్తూనే ఉన్నాను. 39 రిజెక్ట్ అయ్యాడు. చివరికి గూగుల్‌లో ఉద్యోగం సాధించాను’’ అంటూ గూగుల్‌తో జరిపిన ఈ-మెయిల్ సంభాషణల్ని కొహెన్ షేర్ చేశాడు. అది వైరల్ అవ్వడంతో.. నెటిజన్లు అతనికి అభినందనలు తెలియజేశారు. పట్టు వదలకుండా ఉద్యోగం సాధించిన నువ్వు, ఎందరికో ఆదర్శం అంటూ అతడ్ని కొనియాడుతున్నారు.