Russia Mystery Pneumonia: రష్యాలో మిస్టరీ న్యూమోనియా కలకలం.. ల్యాబ్ ఉద్యోగి మృతి, 197 మందికి క్వారంటైన్

Russia Mystery Pneumonia: రష్యాలోని సైబీరియా ప్రాంతంలో ఓ ల్యాబొరేటరీ ఉద్యోగి అనుమానాస్పద అనారోగ్యంతో మృతి చెందడం కలకలం రేపుతోంది. ఇర్కుట్స్క్ ప్రాంతంలోని షెలెఖోవ్‌లోని యాంటీ-ప్లేగ్ రీసెర్చ్ ఇన్‌స్టిట్యూట్‌లో పనిచేసే 28 ఏళ్ల మహిళ తీవ్ర న్యూమోనియాతో ఆసుపత్రిలో చేరి చికిత్స పొందుతూ మృతి చెందారు. ఆమెకు సోకిన వ్యాధి కారణం ఇప్పటికీ అధికారికంగా నిర్ధారించలేదు. అయితే పని సమయంలో లైవ్ బయోలాజికల్ మెటీరియల్ ఉన్న టెస్ట్ ట్యూబ్ ప్రమాదవశాత్తు పగిలిందని ఆమె వైద్య సిబ్బందికి చెప్పినట్లు నివేదికలు పేర్కొంటున్నాయి. దీంతో ఆమెకు ప్రమాదకరమైన పాథోజెన్ సోకిందా? అనే అనుమానాలు వ్యక్తమవుతున్నాయి.

తీవ్ర న్యూమోనియాతో ఆసుపత్రిలో చేరి మృతి

షెలెఖోవ్‌లోని యాంటీ-ప్లేగ్ రీసెర్చ్ ఇన్‌స్టిట్యూట్‌లో పనిచేసే ఈ మహిళకు తొలుత తీవ్రమైన న్యూమోనియా లక్షణాలు కనిపించినట్లు సమాచారం. వ్యాధికి స్పష్టమైన కారణం తెలియకపోవడంతో ఆమె పరిస్థితిని “న్యూమోనియా ఆఫ్ అన్‌నోన్ ఎటియాలజీ”గా పేర్కొన్నారు. ఆమె పరిస్థితి వేగంగా విషమించడంతో వెంటిలేటర్‌పై చికిత్స అందించారు. అయితే అక్టోబర్ 1న ఆమె మృతి చెందినట్లు నివేదికలు చెబుతున్నాయి. ల్యాబ్‌లో పనిచేసే సమయంలో లైవ్ బయోలాజికల్ మెటీరియల్ ఉన్న టెస్ట్ ట్యూబ్ పగిలిన ఘటనతో ఈ అనారోగ్యానికి సంబంధం ఉందా? అనే కోణంలో అధికారులు దర్యాప్తు చేస్తున్నట్లు సమాచారం.

197 మందికి వైద్య పర్యవేక్షణ

ఈ ఘటన తర్వాత బాధిత మహిళతో ప్రత్యక్షంగా లేదా పరోక్షంగా సంబంధం ఉన్నట్లు భావిస్తున్న 197 మందిని వైద్య పర్యవేక్షణ లేదా ఐసోలేషన్‌లో ఉంచినట్లు ప్రాంతీయ నివేదికలు పేర్కొంటున్నాయి. వారిలో 100 మందికి పైగా ఆసుపత్రి వార్డుల్లో పర్యవేక్షణలో ఉన్నట్లు సమాచారం. షెలెఖోవ్ జిల్లా ఆసుపత్రిలో కూడా క్వారంటైన్ చర్యలు అమలు చేసినట్లు తెలుస్తోంది. సమీపంలోని ప్రసూతి ఆసుపత్రిలోనూ ముందు జాగ్రత్త చర్యల్లో భాగంగా ఆంక్షలు విధించినట్లు నివేదికలు చెబుతున్నాయి. సంభావ్య కాంటాక్టులను గుర్తించడం, పరిస్థితిని పర్యవేక్షించడం, ఒకవేళ అంటువ్యాధి ఉంటే అది మరింత వ్యాప్తి చెందకుండా చర్యలు తీసుకోవడమే ఈ చర్యల ప్రధాన ఉద్దేశంగా అధికారులు చెబుతున్నారు.

‘ప్లేగ్’పై ఎందుకు అనుమానాలు?

ఈ ఘటనపై ఆందోళనకు ప్రధాన కారణం మృతిచెందిన మహిళ పనిచేసిన సంస్థ. ఆమె పనిచేసింది యాంటీ-ప్లేగ్ రీసెర్చ్ ఇన్‌స్టిట్యూట్‌లో కావడంతో పాటు, లైవ్ బయోలాజికల్ మెటీరియల్ ఉన్న టెస్ట్ ట్యూబ్ పగిలినట్లు సమాచారం రావడంతో ప్రమాదకరమైన వ్యాధికారక క్రిమి ఆమెకు సోకిందా? అనే చర్చ మొదలైంది. కొన్ని మీడియా నివేదికలు Yersinia pestis అనే ప్లేగ్ బ్యాక్టీరియాతో ఈ ఘటనకు సంబంధం ఉండొచ్చని పేర్కొన్నాయి. అయితే రష్యా అధికారులు ఇప్పటివరకు ప్లేగ్‌నే కారణమని అధికారికంగా నిర్ధారించలేదు. ప్రస్తుతం వ్యాధికి అసలు కారణం ఏమిటనే దానిపై వైద్య పరీక్షలు, దర్యాప్తు కొనసాగుతున్నాయి.

న్యూమోనిక్ ప్లేగ్ అంటే ఏమిటి?

ప్లేగ్‌లో న్యూమోనిక్ ప్లేగ్ అనేది ప్రధానంగా ఊపిరితిత్తులను ప్రభావితం చేసే రూపం. బుబోనిక్ ప్లేగ్‌తో పోలిస్తే ఇది శ్వాసకోశ వ్యవస్థపై ఎక్కువ ప్రభావం చూపుతుంది. సోకిన వ్యక్తి దగ్గు, తుమ్ము లేదా శ్వాస ద్వారా వెలువడే శ్వాసకణాల ద్వారా ఇది ఇతరులకు వ్యాపించే అవకాశం ఉంటుంది. అందుకే ఒకవేళ న్యూమోనిక్ ప్లేగ్ నిర్ధారణ అయితే ప్రజారోగ్య పరంగా వేగంగా చర్యలు తీసుకోవాల్సి ఉంటుంది. అకస్మాత్తుగా జ్వరం, తలనొప్పి, తీవ్ర బలహీనతతో పాటు శ్వాస తీసుకోవడంలో ఇబ్బంది, ఛాతీ నొప్పి, దగ్గు వంటి లక్షణాలు కనిపించవచ్చు. కొందరిలో నీటిలా లేదా రక్తం కలిసిన కఫం కూడా రావచ్చని వైద్య నిపుణులు చెబుతున్నారు. అయితే ప్లేగ్‌ను సరైన సమయంలో గుర్తించి తగిన యాంటీబయాటిక్స్‌తో చికిత్స అందిస్తే నయం చేసే అవకాశం ఉంటుంది. చికిత్స ఆలస్యం అయితే మాత్రం వ్యాధి ప్రాణాంతకంగా మారే ప్రమాదం ఉంది.

రష్యా ఆరోగ్య అధికారులు ఏమంటున్నారు?

రష్యా వినియోగదారుల రక్షణ, ప్రజారోగ్య పర్యవేక్షణ సంస్థ Rospotrebnadzor ఈ ఘటనపై అత్యవసర శానిటరీ, యాంటీ-ఎపిడెమిక్ చర్యలు ప్రారంభించినట్లు తెలిపింది. యాంటీ-ప్లేగ్ ఇన్‌స్టిట్యూట్ ఉద్యోగికి తెలియని కారణంతో న్యూమోనియా వచ్చిన కేసు నేపథ్యంలో ఈ చర్యలు తీసుకున్నట్లు అధికారులు పేర్కొన్నారు. అయితే ఇర్కుట్స్క్ ప్రాంతంలో ప్రస్తుతం ఎపిడెమియాలజికల్ పరిస్థితి స్థిరంగానే ఉందని అధికారులు తెలిపారు. గుర్తించిన సన్నిహిత కాంటాక్టులను వైద్య పర్యవేక్షణలో ఉంచామని, ఇప్పటివరకు వారికి అనారోగ్య లక్షణాలు కనిపించలేదని, నిర్వహించిన ప్రయోగశాల పరీక్షల్లో నెగెటివ్ ఫలితాలు వచ్చినట్లు అధికారుల ప్రకటనలను ఉటంకిస్తూ నివేదికలు వెల్లడించాయి.

ప్రజలు ఆందోళన చెందొద్దన్న గవర్నర్

ఇర్కుట్స్క్ గవర్నర్ ఇగోర్ కొబ్జెవ్ ప్రజలు భయాందోళనలకు గురికావద్దని విజ్ఞప్తి చేశారు. అనుమానాస్పదంగా అత్యంత ప్రమాదకరమైన ఇన్ఫెక్షన్‌కు సంబంధించిన కేసుపై అత్యవసర యాంటీ-ఎపిడెమిక్ కమిషన్ సమావేశమైందని, అవసరమైన అన్ని చర్యలు తీసుకుంటున్నామని ఆయన తెలిపారు. అయితే గవర్నర్ కూడా తన ప్రకటనలో ఈ ఇన్ఫెక్షన్‌ను ప్లేగ్‌గా అధికారికంగా పేర్కొనలేదు. ప్రస్తుతం ల్యాబ్ ఉద్యోగి మృతికి అసలు కారణం ఏమిటి? ఆమెకు ఏ పాథోజెన్ సోకింది? ఇతరులకు వ్యాధి వ్యాప్తి చెందిందా? అనే అంశాలపై అధికారులు దర్యాప్తు, వైద్య పరీక్షలు కొనసాగిస్తున్నారు.