Paris Psg Violence: పీఎస్‌జీ గెలుపుతో తగలబడ్డ పారిస్.. వందల సంఖ్యలో ఫ్యాన్స్‌ను అరెస్ట్ చేసిన పోలీసులు!

Paris Psg Violence: ఫ్రాన్స్ దేశంలో పారిస్ సెయింట్ – జర్మైన్ (PSG) ఫుట్‌బాల్ క్లబ్ సాధించిన చారిత్రాత్మక విజయం తీవ్ర ఉద్రిక్తతలకు దారితీసింది. యూఈఎఫ్ఏ (UEFA) ఛాంపియన్స్ లీగ్ ఫైనల్‌లో పీఎస్‌జీ ఛాంపియన్‌గా నిలవడంతో ఫ్రాన్స్ వ్యాప్తంగా అభిమానులు సంబరాల్లో మునిగిపోయారు. అయితే ఈ గెలుపు సంబరాలు కాస్తా క్షణాల్లో హింసాత్మకంగా మారాయి. ఈ ఘర్షణల్లో ఇప్పటి వరకు దేశవ్యాప్తంగా 400 మందికి పైగా ఆందోళనకారులను పోలీసులు అదుపులోకి తీసుకోగా, ఏడుగురు పోలీసులు తీవ్రంగా గాయపడ్డారు.

ఒక్క పారిస్‌లోనే 283 మంది అరెస్ట్
ఫ్రాన్స్ అంతర్గత వ్యవహారాల మంత్రి వెల్లడించిన వివరాల ప్రకారం.. ఘర్షణల నేపథ్యంలో దేశవ్యాప్తంగా ఇప్పటివరకు 416 మందిని పోలీసులు అరెస్ట్ చేశారు. ఇందులో కేవలం రాజధాని పారిస్ నగరంలోనే 283 మందిని పట్టుకున్నారు. బుడాపెస్ట్‌లో పీఎస్‌జీ మద్దతుదారులకు, పోలీసులకు మధ్య జరిగిన ఘర్షణే ఈ భారీ ఉద్రిక్తతకు దారితీసినట్లు తెలుస్తోంది.

రంగంలోకి 22,000 మంది పోలీసులు..
ఫ్రాన్స్ అంతర్గత వ్యవహారాల మంత్రి లారెంట్ నునెజ్ ఈ హింసపై తీవ్రంగా స్పందించారు. శాంతిభద్రతలకు విఘాతం కలిగిస్తే ఎంతటివారినైనా ఉపేక్షించేది లేదని, కఠిన చర్యలు తీసుకుంటామని హెచ్చరించారు. గాయపడిన ఏడుగురు పోలీసుల ఆరోగ్య పరిస్థితిని ఆయన పర్యవేక్షిస్తున్నారు. పరిస్థితులు మరింత చేయి దాటకుండా ఉండేందుకు ఫ్రాన్స్ ప్రభుత్వం దేశవ్యాప్తంగా 22,000 మంది పోలీసు అధికారులను రంగంలోకి దించింది. ఒక్క పారిస్ నగరంలోనే భద్రత కోసం 8,000 మంది పోలీసులను ప్రత్యేకంగా మోహరించారు.

యూఈఎఫ్ఏ ఛాంపియన్స్ లీగ్ ఉత్కంఠభరిత ఫైనల్ మ్యాచ్‌లో పీఎస్‌జీ పెనాల్టీ షూటౌట్‌లో ఘన విజయం సాధించింది. ఈ గెలుపు వార్త వినగానే దాదాపు 20,000 మందికి పైగా మద్దతుదారులు ఒక్కసారిగా పారిస్ వీధుల్లోకి దూసుకొచ్చారు. ఆనందోత్సాహాలతో ఊగిపోయిన ఫ్యాన్స్.. పారిస్ రింగ్ రోడ్‌ను దిగ్బంధించి భారీగా ట్రాఫిక్ జామ్ చేశారు. ఈ క్రమంలోనే కొందరు ఆందోళనకారులు రెచ్చిపోయి 6 వాహనాలను పూర్తిగా ధ్వంసం చేశారు. ఈ హింసాత్మక ఘటనలు ఫ్రాన్స్ భద్రతా ఏర్పాట్లపై పలు విమర్శలకు దారితీశాయి. అయితే అంతర్గత వ్యవహారాల మంత్రి ఈ విమర్శలను తిప్పికొడుతూ.. దేశంలో భద్రత పటిష్టంగానే ఉందని స్పష్టం చేశారు.

అయితే అసలైన సవాల్ ఆదివారం (ఈరోజు) ఎదురుకానుంది. పీఎస్‌జీ ఘన విజయం సాధించినందుకు గానూ ప్రసిద్ధ ఈఫిల్ టవర్ సమీపంలో భారీ ‘విక్టరీ పరేడ్’ నిర్వహించనున్నారు. ఈ వేడుకకు దాదాపు 1 లక్ష మందికి పైగా అభిమానులు తరలివచ్చే అవకాశం ఉందని అంచనా వేస్తున్నారు. ఈ నేపథ్యంలో ఎలాంటి అవాంఛనీయ ఘటనలు జరగకుండా భారీ జనసందోహాన్ని నియంత్రించడం ఇప్పుడు ఫ్రాన్స్ పోలీసులకు ఒక పెద్ద సవాల్‌గా మారిందని చెబుతున్నారు.