Hyderabad : డ్రైవర్ నిర్లక్ష్యానికి చిన్నారి మృతి..తల్లి పరిస్థితి విషమం..

హైదరాబాద్ లో విషాద ఘటన వెలుగు చూసింది.. కారు నిర్లక్ష్యం ఒక కుటుంబాన్ని విషాదంలోకి నెట్టేసింది.. నడిరోడ్డుపై కారు ఆపడమే కాదు వెనకా ముందు చూసుకోకుండా డోర్ తియ్యడంతో ఈ ప్రమాదం జరిగింది.. భార్యాభర్తలు కూతురితో కలిసి బైక్ పై వెళుతుండగా కారు డోర్ తగిలి కిందపడిపోయారు. ఈ ప్రమాదంలో రెండేళ్ల చిన్నారి మృతిచెందగా తల్లి ప్రాణాపాయ స్థితిలో హాస్పిటల్లో చికిత్స పొందుతోంది. చిన్నారి తండ్రి మాత్రం గాయాలతో బయటపడ్డారు.. ఈ విషాదకర ఘటన హైదరాబాద్లో వెలుగు చూసింది..

ఎల్బీనగర్-మన్సురాబాద్ మార్గంలో రెండేళ్ళ ధనలక్ష్మి తల్లిదండ్రుల తో కలిసి బైక్ పై వెళుతోంది. అయితే ఇదేమార్గంలో వెళుతున్న ఓ కారును డ్రైవర్ సడన్ గా రోడ్డుపై ఆపాడు. కారులోంచి ఓ వ్యక్తి దిగి వెళ్లిపోగా ఏదో పనిపై డ్రైవర్ కిందకు దిగేందుకు ప్రయత్నించాడు. వెనకాల బైక్ వస్తున్న విషయాన్ని గమనించకుండా కారు డోర్ తియ్యబోయ్యాడు.. అంతే బైక్ డోర్ కు గుద్దుకుంది.

రెండేళ్ల చిన్నారి అక్కడికక్కడే మృతిచెందింది. చిన్నారి తల్లి శశిరేఖ కూడా తీవ్ర గాయాలతో ప్రాణాపాయ స్థితిలో చికిత్స పొందుతోంది. తండ్రి సయ్యద్ మాత్రం స్వల్పగాయాలతో సురక్షితంగా బయటపడ్డాడు. ప్రమాదం జరిగిన వెంటనే కారు డ్రైవర్ అక్కడినుండి పరారయ్యాడు..ఇక ఈ ప్రమాదం పై సమాచారం అందుకున్న పోలీసులు అక్కడికి చేరుకొని కేసు నమోదు చేసుకున్నారు.. పరారీలో ఉన్న డ్రైవర్ కోసం గాలిస్తున్నారు..