Market Crash: భారతదేశంలో 10 నిమిషాల డెలివరీ ట్రెండ్తో సరికొత్త విప్లవాన్ని తెచ్చిన జొమాటో, స్విగ్గీ సంస్థలకు స్టాక్ మార్కెట్లో గట్టి ఎదురుదెబ్బ తగిలింది. ఈ రంగంలోకి గ్లోబల్ ఈ-కామర్స్ దిగ్గజాలైన అమెజాన్, వాల్మార్ట్ నేతృత్వంలోని ఫ్లిప్కార్ట్ భారీ ఎత్తున ప్రవేశిస్తుండటంతో ఇన్వెస్టర్లలో ఆందోళన మొదలైంది. పోటీ తీవ్రం కానుందనే భయాలతో గురువారం మార్కెట్ ముగిసే సమయానికి జొమాటో, స్విగ్గీల షేర్లు భారీగా పతనమయ్యాయి. దీంతో ఈ రెండు కంపెనీల సంయుక్త మార్కెట్ విలువ ఏకంగా 15 బిలియన్ డాలర్లకు పైగా (సుమారు రూ.1.41 లక్షల కోట్లు) క్షీణించింది.
గరిష్ఠాల నుంచి భారీగా పతనమైన షేర్లు
జొమాటో (బ్లింకిట్): గుడ్ల నుంచి ఎలక్ట్రానిక్స్ వరకు నిమిషాల్లో డెలివరీ చేసే ‘బ్లింకిట్’ సేవలతో దూసుకుపోతున్న జొమాటో షేర్లు, అక్టోబర్లో నమోదైన ఆల్-టైమ్ గరిష్ఠ స్థాయి నుంచి 28 శాతం మేర పడిపోయాయి.
స్విగ్గీ (ఇన్స్టామార్ట్): స్విగ్గీ షేర్లు సైతం సెప్టెంబర్లో నమోదైన ఇటీవలి గరిష్ఠ స్థాయి నుంచి ఏకంగా 47 శాతం పతనాన్ని చూశాయి.
దూసుకొస్తున్న అమెజాన్, ఫ్లిప్కార్ట్, జియోమార్ట్
భారతదేశంలో వేగంగా విస్తరిస్తున్న 11 బిలియన్ డాలర్ల రాపిడ్-కామర్స్ మార్కెట్ను చేజిక్కించుకోవడానికి దిగ్గజ సంస్థలు వ్యూహాత్మకంగా అడుగులు వేస్తున్నాయి. చిన్న నగరాలను లక్ష్యంగా చేసుకుని డార్క్ స్టోర్ల (లాస్ట్-మైల్ వేర్హౌస్లు) నెట్వర్క్ను ఇవి శరవేగంగా నిర్మిస్తున్నాయి.
అమజాన్ నౌ: గత ఏడాది అల్ట్రా-ఫాస్ట్ డెలివరీని స్టార్ట్ చేసిన అమెజాన్, తన ‘అమెజాన్ నౌ’ సేవలను ప్రస్తుతం ఉన్న 15 నగరాల నుంచి ఏకంగా 300 నగరాలు, పట్టణాలకు విస్తరిస్తున్నట్లు ప్రకటించింది. అదనంగా, దేశంలో ఏఐ, క్లౌడ్ మౌలిక సదుపాయాల కోసం మరో 13 బిలియన్ డాలర్ల పెట్టుబడిని హామీ ఇచ్చింది.
ఫ్లిప్కార్ట్ మినిట్స్: ఫ్లిప్కార్ట్ మినిట్స్ ఇప్పటికే రెండేళ్లలోపు 1,000 డార్క్ స్టోర్ల నెట్వర్క్తో 130 నగరాలకు విస్తరించింది. రాబోయే కొద్ది నెలల్లో 180కి పైగా నగరాల్లో 1,500 స్టోర్లను తెరవాలని ప్లాన్ చేస్తోంది.
రిలయన్స్ జియోమార్ట్: బిలియనీర్ ముఖేష్ అంబానీకి చెందిన రిలయన్స్ రిటైల్, తనకున్న 3,100కు పైగా స్టోర్ల నెట్వర్క్ను ఉపయోగించుకుంటూ 1,200 కంటే ఎక్కువ నగరాల్లో విస్తరిస్తోంది.
డార్క్ స్టోర్ల రేస్ (మార్చి 31 నాటికి):
బ్లింకిట్: 2,243 డార్క్ స్టోర్లు
స్విగ్గీ ఇన్స్టామార్ట్: 1,143 డార్క్ స్టోర్లు
జెప్టో ఐపీఓపై ప్రభావం..
ఈ తీవ్రమైన పోటీ కారణంగా వచ్చే నెలలో జరగాల్సిన క్విక్ కామర్స్ స్టార్టప్ ‘జెప్టో’ ఐపీఓ ఉత్సాహం కూడా కాస్త తగ్గింది. అన్లిస్టెడ్ మార్కెట్లో జెప్టో షేర్లు ఫిబ్రవరి నుంచి 32 శాతానికి పైగా పడిపోయి, రూ.58 నుంచి రూ.39కి చేరాయి. ప్రస్తుతం బ్లింకిట్ EBITDA-స్థాయి లాభాన్ని ఆర్జిస్తుండగా, స్విగ్గీ క్విక్ కామర్స్ విభాగం వార్షికంగా సుమారు $460 మిలియన్లు, జెప్టో $600 మిలియన్లకు పైగా నష్టాల్లో నడుస్తున్నాయి. మార్కెట్ వాటాను దక్కించుకోవడానికి కంపెనీలు భారీ తగ్గింపులు ఇస్తుండటంతో ఈ ధరల యుద్ధం స్వల్పకాలిక లాభాలను తగ్గించవచ్చని ఆర్థిక విశ్లేషకులు అభిప్రాయపడుతున్నారు. అయితే ఈ క్విక్ కామర్స్ ట్రెండ్ మెట్రో నగరాలకే పరిమితం కాకుండా టైర్-2, టైర్-3 నగరాలకు కూడా వేగంగా విస్తరించడం ఈ రంగానికి ఒక సానుకూల అంశం అని చెబుతున్నారు.