కొన్ని నెలల క్రితం వరకు బంగారం, వెండి కొనుగోళ్లు జోరుగా సాగాయి. ప్రతి ఒక్కరూ తమ పోర్ట్ఫోలియోలలో బంగారం, వెండిని చేర్చుకోవాలని కోరుకున్నారు. చాలా మంది పెట్టుబడిదారులు స్టాక్స్కు బదులుగా గోల్డ్-సిల్వర్ ఈటీఎఫ్లలో పెట్టుబడి పెట్టడానికి మొగ్గు చూపారు. సోషల్ మీడియా ఇన్ఫ్లుయెన్సర్లు కూడా వివిధ చిట్కాలు ఇచ్చారు. ఫండ్ హౌస్లు కొత్త ఫండ్లు లేదా ఈటీఎఫ్లను ప్రవేశపెట్టి పెట్టుబడిదారులను ఆకర్షించాయి.
దీనికి ప్రధాన కారణం బంగారం, వెండి ధరల్లో నమోదైన రికార్డు స్థాయి పెరుగుదల. గత కొన్ని సంవత్సరాలుగా ఈ రెండు విలువైన లోహాల ధరలు భారీగా పెరగడంతో పెట్టుబడిదారులు ఆశ్చర్యపోయారు. కొందరు తమ పెట్టుబడులు కేవలం కొన్ని నెలల్లోనే రెట్టింపు కావడం చూశారు. మరికొందరు స్వల్పకాలంలోనే గణనీయమైన లాభాలను ఆర్జించారు.
ఈ నేపథ్యంలో FOMO (Fear of Missing Out – అవకాశాన్ని కోల్పోతామనే భయం) ప్రభావంతో చాలామంది భారీగా బంగారం, వెండి ఈటీఎఫ్లలో పెట్టుబడులు పెట్టారు. అయితే ప్రస్తుతం పరిస్థితి పూర్తిగా మారిపోయింది. గోల్డ్, సిల్వర్ ఈటీఎఫ్ల కొనుగోళ్ల గురించి పెద్దగా చర్చ జరగడం లేదు. నిపుణుల సలహాలు తగ్గిపోయాయి. సోషల్ మీడియాలో కూడా ఈ అంశంపై నిశ్శబ్దం నెలకొంది.
గోల్డ్ ఈటీఎఫ్ల నుంచి భారీగా నిధుల ఉపసంహరణ
బంగారం ధరలు తగ్గుముఖం పట్టడంతో గోల్డ్ ఈటీఎఫ్లపై ప్రభావం స్పష్టంగా కనిపిస్తోంది. చిన్నా, పెద్దా అనే తేడా లేకుండా అనేక మంది పెట్టుబడిదారులు తమ పెట్టుబడులను ఉపసంహరించుకుంటున్నారు. అసోసియేషన్ ఆఫ్ మ్యూచువల్ ఫండ్స్ ఇన్ ఇండియా (AMFI) విడుదల చేసిన గణాంకాల ప్రకారం, 2026 ఏప్రిల్లో గోల్డ్ ఈటీఎఫ్లలో రూ.3,040 కోట్ల నికర పెట్టుబడులు నమోదయ్యాయి. అయితే మే నెలలో పరిస్థితి మారి, గోల్డ్ ఈటీఎఫ్ల నుంచి సుమారు రూ.725 కోట్ల నికర నిధులు బయటకు వెళ్లాయి.
దాదాపు ఏడాది పాటు నిరంతర కొనుగోళ్లు కొనసాగిన తర్వాత ఈ విభాగంలో తొలిసారి ఈ స్థాయిలో నిధుల ఉపసంహరణ చోటుచేసుకుంది. అయినప్పటికీ, గత ఏడాదితో పోలిస్తే గోల్డ్ ఈటీఎఫ్ల నిర్వహణలో ఉన్న మొత్తం ఆస్తుల విలువ (AUM) మూడు రెట్లు పెరిగి రూ.1.85 లక్షల కోట్లకు చేరుకోవడం గమనార్హం. ఇది బంగారంపై దీర్ఘకాలిక పెట్టుబడి ఆసక్తి ఇంకా కొనసాగుతోందని సూచిస్తోంది.
లాభాల స్వీకరణే ప్రధాన కారణమా?
విశ్లేషకుల అభిప్రాయం ప్రకారం, గోల్డ్ ఈటీఎఫ్లలో ఈ తిరోగమనానికి పలు కారణాలు ఉన్నాయి. ఇటీవల బంగారం ధరలు భారీగా పెరగడంతో పెట్టుబడిదారులు లాభాల స్వీకరణ (Profit Booking)కు మొగ్గు చూపారు. అదే సమయంలో అమెరికా డాలర్ బలపడటం, అమెరికా ఫెడరల్ రిజర్వ్ వడ్డీ రేట్ల కోతలపై మారుతున్న అంచనాలు కూడా ప్రభావం చూపాయి.
ఐఎన్వాసెట్ పీఎంఎస్ (Invaset PMS) బిజినెస్ హెడ్ హర్షల్ దసాని మాట్లాడుతూ, ద్రవ్యోల్బణం నుంచి రక్షణ కోసం బంగారాన్ని కొనుగోలు చేసే ధోరణి నుంచి, వడ్డీ రేట్ల ప్రభావాన్ని పరిగణనలోకి తీసుకుని పెట్టుబడులను పునర్ మూల్యాంకనం చేసే దిశగా మార్కెట్ మారిందని తెలిపారు. అందువల్ల గోల్డ్ ఈటీఎఫ్లు ఒత్తిడిని ఎదుర్కొంటున్నాయని చెప్పారు.
అమెరికా ఉపాధి గణాంకాలు అంచనాల కంటే మెరుగ్గా రావడం వల్ల ద్రవ్యోల్బణం కొనసాగవచ్చనే ఆందోళనలు పెరిగాయని, దీంతో ఫెడరల్ రిజర్వ్ భారీ స్థాయిలో వడ్డీ రేట్లు తగ్గించే అవకాశాలు తగ్గిపోయాయని ఆయన పేర్కొన్నారు. బంగారం ప్రత్యక్ష ఆదాయం లేదా వడ్డీని అందించదు. అందువల్ల అమెరికా బాండ్ దిగుబడులు, డాలర్ విలువ పెరిగినప్పుడు బంగారాన్ని కలిగి ఉండటానికి అయ్యే అవకాశ వ్యయం (Opportunity Cost) కూడా పెరుగుతుందని ఆయన వివరించారు. ఇటీవల బంగారం ధరల్లో నమోదైన భారీ పెరుగుదల తర్వాత ప్రపంచవ్యాప్తంగా పెట్టుబడిదారులు లాభాల స్వీకరణకు దిగడం కూడా ఈ క్షీణతకు కారణమైందన్నారు. అయితే, పోర్ట్ఫోలియోలో రిస్క్ను తగ్గించే హెడ్జింగ్ సాధనంగా బంగారానికి ఉన్న దీర్ఘకాలిక ప్రాధాన్యత ఇప్పటికీ కొనసాగుతోందని ఆయన అభిప్రాయపడ్డారు.
వెండి ఈటీఎఫ్లకు కొనసాగుతున్న ఆదరణ
గోల్డ్ ఈటీఎఫ్ల నుంచి పెట్టుబడులు బయటకు వెళ్తున్నప్పటికీ, సిల్వర్ ఈటీఎఫ్లపై పెట్టుబడిదారుల ఆసక్తి మాత్రం కొనసాగుతోంది. పారిశ్రామిక అవసరాలు పెరుగుతాయనే అంచనాలు, పెట్టుబడిదారుల నుంచి పెరుగుతున్న డిమాండ్ కారణంగా 2026 మే నెలలో సిల్వర్ ఈటీఎఫ్లలో మొత్తం రూ.2,133 కోట్ల నికర పెట్టుబడులు నమోదయ్యాయి. అయితే, వెండి ధరలు కూడా అంతర్జాతీయ ఆర్థిక పరిస్థితులకు అత్యంత సున్నితంగా స్పందిస్తాయని హర్షల్ దసాని హెచ్చరించారు.
సౌరశక్తి రంగం విస్తరణ, విద్యుదీకరణ ప్రాజెక్టులు, సరఫరా పరిమితులు వంటి అంశాలు వెండికి దీర్ఘకాలికంగా అనుకూలంగా ఉన్నప్పటికీ, స్వల్పకాలంలో వెండి ధరల కదలికలు అమెరికా డాలర్ బలాబలాలు, యూఎస్ బాండ్ దిగుబడులు, ఫెడరల్ రిజర్వ్ విధాన నిర్ణయాలపై ఆధారపడి ఉంటాయని ఆయన పేర్కొన్నారు.
బంగారం, వెండి ఈటీఎఫ్లు పెట్టుబడిదారులకు ఆకర్షణీయమైన సాధనాలుగానే ఉన్నప్పటికీ, మార్కెట్ పరిస్థితులు మారినప్పుడు వాటి పనితీరు కూడా మారుతుంది. ప్రస్తుతం గోల్డ్ ఈటీఎఫ్లు లాభాల స్వీకరణ ఒత్తిడిని ఎదుర్కొంటుండగా, సిల్వర్ ఈటీఎఫ్లు పారిశ్రామిక డిమాండ్ మద్దతుతో నిలకడగా కొనసాగుతున్నాయి. అందువల్ల పెట్టుబడిదారులు స్వల్పకాలిక హైప్కు లోనుకాకుండా, తమ ఆర్థిక లక్ష్యాలు, రిస్క్ సామర్థ్యాన్ని పరిగణనలోకి తీసుకుని పెట్టుబడి నిర్ణయాలు తీసుకోవడం ఉత్తమం.