Diwali 2026 Lakshmi Puja Muhurat: నేడు (నవంబర్ 8) దేశవ్యాప్తంగా దీపావళి (Diwali) పండుగను జరుపుకుంటున్నారు. సాయంత్రం కాగానే ప్రతి ఇంట్లో దీపాలు వెలుగులతో కళకళలాడనున్నాయి. ఇక ప్రతి దివాళికి అమ్మవారి అనుగ్రహం కోసం భక్తులు లక్ష్మీదేవి (Goddess Lakshmi), వినాయకుడి (Lord Ganesha) విగ్రహాలను ప్రతిష్ఠించి ప్రత్యేక పూజలు నిర్వహిస్తారు. అయితే దీపావళి పూజలో టైమ్‌కు ఎంతో ప్రాధాన్యత ఉంటుంది. శుభ సమయంలో లక్ష్మీ గణేశుల ఆరాధన చేయడం వల్ల ఇంట్లో సుఖశాంతులు, ఐశ్వర్యం, సిరిసంపదలు కలుగుతాయని భక్తుల నమ్మకం. మరి ఈ ఏడాది దీపావళి లక్ష్మీ పూజకు (Lakshmi Puja Muhurat) శుభ సమయం ఎప్పుడు? వ్యాపారులు పూజలు ఎప్పుడు చేయాలి? అమావాస్య తిథి, ప్రదోష కాలం, మహానిశీథ కాలం ఎప్పటివరకు ఉంటాయో తెలుసుకుందాం.
ఈ ఏడాది దీపావళి సందర్భంగా లక్ష్మీ గణేశుడి పూజకు సాయంత్రం 5:54 గంటల నుంచి రాత్రి 7:50 గంటల వరకు శుభ సమయం ఉంది. అంటే భక్తులకు పూజలు చేసుకోవడానికి మొత్తం 1 గంట 56 నిమిషాల సమయం లభించనుంది. ఈ సమయంలో అమ్మవారిని, వినాయకుడిని సంప్రదాయబద్ధంగా పూజించవచ్చు. జ్యోతిష్య గణనల ప్రకారం ఈ సమయం ప్రదోష కాలంతో పాటు వృషభ లగ్నంలో వస్తోంది. వృషభ లగ్నాన్ని స్థిర లగ్నంగా పరిగణిస్తారు. అందుకే గృహస్థులు ఈ సమయంలో లక్ష్మీ పూజ చేయడం విశేషంగా భావిస్తారు. ఈ సమయంలో అమ్మవారిని ఆరాధిస్తే ఇంట్లో ధనధాన్యాలు, సుఖసంతోషాలు నిలిచి ఉంటాయని నమ్ముతారు.
దీపావళి పూజలో ప్రదోష కాలానికి కూడా ప్రత్యేక ప్రాధాన్యత ఉంది. ఈరోజు (నవంబర్ 8) సాయంత్రం 5:31 గంటలకు సూర్యాస్తమయం కానుంది. ఆ తర్వాత ప్రదోష కాలం ప్రారంభమై రాత్రి 8:09 గంటల వరకు కొనసాగుతుంది. ఈ సమయంలో లక్ష్మీదేవి, వినాయకుడిని పూజించడం ఆనవాయితీ. ఇంట్లోని పూజా మందిరంలో దీపాలు వెలిగించి కుటుంబ సభ్యులంతా కలిసి ప్రార్థనలు చేస్తారు. అలాగే ఇంటి ప్రధాన ద్వారం వద్ద దీపాలు వెలిగించడం కూడా ఎంతో పవిత్రంగా భావిస్తారు. ఇక దీపావళి పండుగకు ఆధారమైన కార్తీక అమావాస్య తిథి విషయానికి వస్తే.. ఈ ఏడాది నవంబర్ 8వ తేదీ ఉదయం 11:27 గంటలకు అమావాస్య ప్రారంభమవుతుంది. నవంబర్ 9వ తేదీ మధ్యాహ్నం 12:31 గంటల వరకు కొనసాగుతుంది. ఈ అమావాస్య రోజునే ప్రధానంగా లక్ష్మీ పూజ, దీపోత్సవం నిర్వహిస్తారు. అమావాస్య చీకటిని తొలగిస్తూ దీపాలు వెలిగించడం వెనుక కూడా ప్రత్యేకమైన ఆధ్యాత్మిక సందేశం ఉంది. చీకటిపై వెలుగు, చెడుపై మంచి, ప్రతికూలతపై సానుకూలత సాధించిన విజయానికి దీపావళి ప్రతీకగా నిలుస్తుంది.
ఇళ్లలోనే కాకుండా వ్యాపార సంస్థలు, దుకాణాలు, కార్యాలయాల్లో కూడా దీపావళి పూజలను ప్రత్యేకంగా నిర్వహిస్తారు. వ్యాపారులు తమ లెక్కల పుస్తకాలు (Account Books), నగదు పెట్టెలు, వ్యాపారానికి సంబంధించిన వస్తువులను పూజిస్తారు. కొత్త ఆర్థిక సంవత్సరం విజయవంతంగా సాగాలని, వ్యాపారంలో లాభాలు రావాలని లక్ష్మీదేవిని ప్రార్థిస్తారు. ఈ ఏడాది వ్యాపార సంస్థల్లో పూజలకు కుంభ లగ్నం మధ్యాహ్నం 1:27 గంటల నుంచి 2:54 గంటల వరకు ఉంది. అలాగే సింహ లగ్నం అర్ధరాత్రి 12:25 గంటల నుంచి 2:42 గంటల వరకు ఉంటుందని పంచాంగ గణనలు చెబుతున్నాయి. వ్యాపారులు తమ ప్రాంతీయ పంచాంగం, కుటుంబ సంప్రదాయాలను అనుసరించి పూజా సమయాన్ని నిర్ణయించుకోవచ్చు. దీపావళి రాత్రి ప్రత్యేకంగా భావించే మహానిశీథ కాలం కూడా ఈ ఏడాది రాత్రి 11:39 గంటల నుంచి అర్ధరాత్రి 12:31 గంటల వరకు ఉంటుంది. సాధారణ గృహస్థుల పూజలకు భిన్నంగా ఈ సమయాన్ని ప్రత్యేక ఆధ్యాత్మిక సాధనలు, మంత్ర జపాలు చేసేవారు ముఖ్యమైనదిగా భావిస్తారు. ఇక నిశా పూజ, కాళీ పూజ నిర్వహించేవారికి రాత్రి 1:37 గంటల నుంచి తెల్లవారుజామున 3:15 గంటల వరకు సమయం సూచించబడింది.
ఇక, దీపావళి రోజున లక్ష్మీ గణేశుల పూజ చేయాలనుకునేవారు ముందుగా ఇంటిని, పూజా ప్రదేశాన్ని శుభ్రం చేసుకోవాలి. అనంతరం సాయంత్రం ఒక పీటపై శుభ్రమైన వస్త్రాన్ని పరిచి లక్ష్మీదేవి, వినాయకుడి విగ్రహాలను ప్రతిష్ఠించాలి. పూజా సామగ్రిలో భాగంగా కుంకుమ, అక్షింతలు, పూలు, ధూపం, దీపం, పండ్లు, మిఠాయిలు సిద్ధం చేసుకోవాలి. ముందుగా వినాయకుడిని పూజించి దుర్వా గడ్డి, పూలు, ఉండ్రాళ్లు లేదా మోదకాలు సమర్పించాలి. ఆ తర్వాత లక్ష్మీదేవికి కలువ పూలు, మిఠాయిలు, సుగంధ పుష్పాలు సమర్పించాలి. అమ్మవారి ముందు నెయ్యితో దీపం వెలిగించి కుటుంబ సభ్యులంతా కలిసి హారతి ఇవ్వాలి. ఈ సందర్భంగా ఇంట్లో ధనసంపదతో పాటు కుటుంబ సభ్యులకు ఆరోగ్యం, సుఖశాంతులు కలగాలని ప్రార్థించాలి. పూజ పూర్తయిన తర్వాత ఇంటి ప్రధాన ద్వారం, ఆవరణ, బాల్కనీ, తులసి మొక్క దగ్గర దీపాలు వెలిగించాలి. ఇలా ఇంటి నలుమూలలా దీపాలు వెలిగించడం ద్వారా పండుగ వాతావరణం మరింత శోభాయమానంగా మారుతుంది. కుటుంబ సభ్యులు, బంధుమిత్రులతో కలిసి మిఠాయిలు పంచుకుంటూ దీపావళి వేడుకలను ఆనందంగా జరుపుకోవచ్చు.