TVS Ronin Base+ Variant: TVS Ronin కొత్త Base+ వేరియంట్ లాంచ్.. తక్కువ ధరకే డ్యూయల్ ABS, అదనపు ఫీచర్లు

TVS Ronin Base+ Variant Launch: 2026 ఫెస్టివ్ సీజన్‌కు ముందు TVS Motor ప్రముఖ ప్రీమియం మోటార్‌సైకిల్ TVS Ronin లైనప్‌ను అప్‌డేట్ చేసింది. ఇందులో భాగంగా కొత్త Base+ వేరియంట్‌ను పరిచయం చేసింది. దీంతో పాటు మిడ్, టాప్ వేరియంట్లలోనూ అదనపు ఫీచర్లను జోడించింది. కొత్త TVS Ronin Base+ వేరియంట్ ప్రారంభ ఎక్స్-షోరూమ్ ధర రూ.1,42,490గా నిర్ణయించారు. మిడ్ వేరియంట్ ధర రూ.1,51,540, టాప్ వేరియంట్ ధర రూ.1,63,640గా ఉంది.

కొత్త Base+ వేరియంట్‌లో డ్యూయల్-ఛానల్ ABS

కొత్త Base+ వేరియంట్‌లో ప్రధాన ఆకర్షణ డ్యూయల్-ఛానల్ ABS. తక్కువ ధరలోనే ఈ ఫీచర్‌ను అందించడం ద్వారా Ronin లైనప్‌లో ఇది కీలక వేరియంట్‌గా నిలిచింది. ఈ వేరియంట్‌ను రెండు కొత్త కలర్ ఆప్షన్లలో అందిస్తున్నారు. అవి Sunlit Yellow, Desert Mirage.

మిడ్ వేరియంట్‌లో కొత్త ఫీచర్లు

అప్‌డేట్ చేసిన Ronin మిడ్ వేరియంట్ ఎక్స్-షోరూమ్ ధర రూ.1,51,540. ఇందులో ప్రధానంగా కనెక్టెడ్ ఇన్‌స్ట్రుమెంట్ క్లస్టర్ ను జోడించారు. దీంతో బైక్‌లో మరిన్ని కనెక్టెడ్ ఫీచర్లను ఉపయోగించుకునే అవకాశం ఉంటుంది. అలాగే Type-C ఛార్జింగ్ పోర్ట్ ను కూడా అందించారు. మిడ్ వేరియంట్‌ను ఈ రెండు రంగుల్లో కొనుగోలు చేయవచ్చు.. Glacier Silver, Charcoal Ember.

టాప్ వేరియంట్‌లో ట్రాక్షన్ కంట్రోల్

TVS Ronin టాప్ వేరియంట్‌లో మరింత ప్రీమియం ఫీచర్లను జోడించారు. దీని ఎక్స్-షోరూమ్ ధర రూ.1,63,640. ఈ వేరియంట్‌లో ఇప్పుడు Traction Control System (TCS) అందుబాటులోకి వచ్చింది. దీంతో పాటు Type-C ఛార్జింగ్ పోర్ట్, కొత్త ప్రీమియం సీటును కూడా అందించారు. టాప్ వేరియంట్ కలర్ ఆప్షన్లు Nimbus Grey, Midnight Blue

TVS Ronin ప్రత్యేకత ఏమిటి?

TVS Ronin తన నియో-రెట్రో డిజైన్, రోడ్‌స్టర్ స్టైలింగ్‌తో TVS ప్రీమియం మోటార్‌సైకిల్ లైనప్‌లో ప్రత్యేక గుర్తింపు తెచ్చుకుంది. TVS ప్రకారం, Ronin ఇప్పటికే 2 లక్షలకు పైగా కస్టమర్లను సొంతం చేసుకుని ఒక గ్లోబల్ కమ్యూనిటీగా ఎదిగింది. కొత్త Base+ వేరియంట్‌తో పాటు మిడ్, టాప్ వేరియంట్లలో అదనపు ఫీచర్లను అందించడం ద్వారా ఫెస్టివ్ సీజన్‌కు ముందు Ronin రేంజ్‌ను మరింత ఆకర్షణీయంగా మార్చింది.