Tata Sierra EV: 665KM రేంజ్‌తో టాటా సియెర్రా EV లాంచ్.. ధర, ఫీచర్లు ఇవే

భారతీయ ఆటోమొబైల్ దిగ్గజం టాటా మోటార్స్ ఎంతోకాలంగా ఎదురుచూస్తున్న టాటా సియెర్రా EVని అధికారికంగా భారత మార్కెట్లో విడుదల చేసింది. ఆధునిక ఫీచర్లు, పవర్ ఫుల్ బ్యాటరీ, ఆకర్షణీయమైన డిజైన్‌తో వచ్చిన ఈ ఎలక్ట్రిక్ SUV మధ్యతరహా ఎలక్ట్రిక్ SUV సెగ్మెంట్‌లో కొత్త పోటీని సృష్టించనుంది. ఒక్కసారి పూర్తి ఛార్జ్ చేస్తే 665 కిలోమీటర్ల (MIDC) వరకు రేంజ్ అందించడం దీని ప్రధాన ఆకర్షణ.

ఆకట్టుకునే డిజైన్, ప్రీమియం ఫీచర్లు

టాటా సియెర్రా EVలో ఆధునిక టెక్నాలజీతో కూడిన పలు ప్రీమియం ఫీచర్లను అందించారు. ఇందులో LED హెడ్‌లైట్లు, LED DRLs, LED టెయిల్ లైట్లు, 18-అంగుళాల అల్లాయ్ వీల్స్, పనోరమిక్ సన్‌రూఫ్, ట్రిపుల్ డిస్‌ప్లే స్క్రీన్, హెడ్-అప్ డిస్‌ప్లే (HUD), వైర్‌లెస్ ఆండ్రాయిడ్ ఆటో, ఆపిల్ కార్‌ప్లే, వైర్‌లెస్ ఛార్జర్, JBL ఆడియో సిస్టమ్, డాల్బీ అట్మోస్, యాంబియంట్ లైటింగ్ వంటి ఫీచర్లు ఉన్నాయి. భద్రత కోసం లెవెల్-2 ADAS, ఆరు ఎయిర్‌బ్యాగ్‌లు, ABS, EBD, రియర్ పార్కింగ్ సెన్సర్లు, రియర్ వ్యూ కెమెరా, 540-డిగ్రీల కెమెరా వంటి ఆధునిక సేఫ్టీ ఫీచర్లను కూడా అందించారు.

665 కి.మీ రేంజ్

టాటా సియెర్రా EVను 63 kWh, 75 kWh బ్యాటరీ ప్యాక్‌లతో అందుబాటులోకి తీసుకొచ్చారు. పెద్ద బ్యాటరీ ప్యాక్‌తో ఈ SUV 665 కిలోమీటర్ల (MIDC) వరకు డ్రైవింగ్ రేంజ్ అందిస్తుంది. ఈ SUVలో డ్యూయల్ మోటార్, ఆల్-వీల్ డ్రైవ్ (AWD) సెటప్ ఉంది. ముందు మోటార్ 175 kW పవర్, 340 Nm టార్క్, వెనుక మోటార్ 103 kW పవర్, 164 Nm టార్క్ ఉత్పత్తి చేస్తుంది. కేవలం 5.8 సెకన్లలో 0 నుంచి 100 కిమీ/గంట వేగాన్ని అందుకోగలదు.

బూట్ స్పేస్ కూడా భారీగా

ప్రయాణాలకు అనుకూలంగా 622 లీటర్ల బూట్ స్పేస్ తో పాటు ముందు భాగంలో 55 లీటర్ల ఫ్రంక్ (Frunk) స్టోరేజ్‌ను కూడా టాటా అందించింది.

ధర, బుకింగ్స్ వివరాలు

టాటా మోటార్స్ సియెర్రా EV ప్రారంభ ఎక్స్-షోరూమ్ ధరను రూ.18.79 లక్షలుగా నిర్ణయించింది. వాహనం కోసం బుకింగ్స్ ప్రారంభమయ్యాయి, కాగా డెలివరీలు జూలై 15 నుంచి ప్రారంభం కానున్నాయి.

ఎవరితో పోటీ?

భారత మార్కెట్లో టాటా సియెర్రా EV నేరుగా MG Windsor EV, Hyundai Creta Electric, Kia Carens Clavis EV, Mahindra XEV 9e వంటి ఎలక్ట్రిక్ SUVలతో పోటీపడనుంది.