627 కిలోమీటర్ల రేంజ్‌.. TATA Safari EV వచ్చేది ఎప్పుడంటే..?

Tata Safari EV Launch Soon: దేశంలో ఎలక్ట్రిక్ వాహనాల విభాగంలో ముందంజలో ఉన్న టాటా మోటార్స్ మరో కీలక అడుగు వేయడానికి సిద్ధమవుతోంది. 7 సీటర్ సెగ్మెంట్‌లో కొత్త ఎలక్ట్రిక్ SUVగా టాటా సఫారీ EVని త్వరలో మార్కెట్లోకి తీసుకురానుంది. 600 కిలోమీటర్లకు పైగా రేంజ్‌తో రానున్న ఈ వాహనం ఇప్పటికే ఆటోమొబైల్ మార్కెట్‌లో ఆసక్తిని రేకెత్తిస్తోంది. నివేదికల ప్రకారం, టాటా సఫారీ EVను ఈ ఏడాది పండుగ సీజన్‌లో, ముఖ్యంగా దీపావళి సమయానికి విడుదల చేసే అవకాశం ఉంది. ఈ వాహనం ఉత్పత్తి 2026 ఆగస్టు నుంచి ప్రారంభమవుతుందని సమాచారం. టాటా హారియర్ EV ఆధారంగా రూపొందుతున్న ఈ మోడల్, కంపెనీకి తొలి మూడు వరుసల (7-సీటర్) ఎలక్ట్రిక్ వాహనంగా నిలవనుంది.

ఫీచర్లు ఎలా ఉన్నాయి..?
డిజైన్ పరంగా చూస్తే, సఫారీ EV హారియర్ EV స్టైలింగ్‌ను అనుసరించే అవకాశం ఉంది. అయితే, పరిమాణంలో పెద్దదిగా ఉండే ఈ SUV మరింత ప్రీమియం లుక్‌తో ఆకట్టుకోనుంది. ప్రస్తుతం హారియర్ EV కంపెనీ ఫ్లాగ్‌షిప్‌గా ఉండగా, విడుదల అనంతరం ఆ స్థానాన్ని సఫారీ EV దక్కించుకునే అవకాశం ఉంది. ఫీచర్ల విషయానికి వస్తే, ఈ వాహనం 65kWh లేదా 75kWh బ్యాటరీ ప్యాక్‌లతో అందుబాటులోకి రావొచ్చు. రియర్-వీల్ డ్రైవ్ (RWD) వేరియంట్‌లో సింగిల్ మోటార్ సెటప్ ఉండగా, ఆల్-వీల్ డ్రైవ్ (AWD) వేరియంట్‌లో డ్యూయల్ మోటార్ సెటప్ ఉండే అవకాశముంది.

ఏ వేరియంట్‌.. ఎంత రేంజ్‌..?
రేంజ్ పరంగా ఇది మరింత ఆకట్టుకునేలా ఉంది. 75kWh బ్యాటరీతో రియర్-వీల్ డ్రైవ్ వేరియంట్ సుమారు 627 కిలోమీటర్ల వరకు ప్రయాణించే సామర్థ్యాన్ని అందించవచ్చు. అదే AWD వేరియంట్‌లో ఈ రేంజ్ సుమారు 622 కిలోమీటర్లుగా ఉండే అవకాశం ఉంది. 65kWh బ్యాటరీ వేరియంట్ సుమారు 538 కిలోమీటర్ల రేంజ్‌ను అందించనుందని అంచనా. అదనంగా, టాటా సఫారీ EVలో 100kW DC ఫాస్ట్ ఛార్జింగ్ సపోర్ట్ కూడా ఉండే అవకాశముంది. దీంతో తక్కువ సమయంలోనే బ్యాటరీని ఛార్జ్ చేసుకునే సౌలభ్యం లభిస్తుంది. మహీంద్రా XEV 9S, విన్‌ఫాస్ట్ VF 7 వంటి మోడళ్లకు పోటీగా రానున్న టాటా సఫారీ EV, భారతీయ మార్కెట్‌లో 7 సీటర్ ఎలక్ట్రిక్ SUV సెగ్మెంట్‌లో కొత్త ప్రమాణాలను నెలకొల్పే అవకాశం ఉంది.