MINI Cooper Convertible Stardust Edition: మినీ కూపర్ కన్వర్టిబుల్ స్టార్‌డస్ట్ ఎడిషన్ విడుదల.. ధర, ఫీచర్లు ఇవే!

భారత లగ్జరీ కార్ల మార్కెట్లో మరో కొత్త మోడల్ అందుబాటులోకి వచ్చింది. మినీ సంస్థ తన కూపర్ కన్వర్టిబుల్ స్టార్‌డస్ట్ ఎడిషన్‌ను భారత మార్కెట్లో విడుదల చేసింది. ప్రత్యేకమైన డిజైన్‌, శక్తివంతమైన ఇంజిన్‌, అధునాతన ఫీచర్లతో ఈ కారు కొనుగోలుదారులను ఆకట్టుకునేలా రూపొందించారు. మినీ కూపర్ కన్వర్టిబుల్ స్టార్‌డస్ట్ ఎడిషన్‌ను స్పార్క్లింగ్ కాపర్ గ్రే రంగులో మాత్రమే అందుబాటులోకి తీసుకొచ్చారు. సాధారణ కూపర్ కన్వర్టిబుల్‌తో పోలిస్తే ప్రత్యేకమైన డిజైన్‌, అదనపు ఫీచర్లతో ఈ ఎడిషన్‌ను రూపొందించారు.

2.0 లీటర్ పెట్రోల్ ఇంజిన్

ఈ లగ్జరీ కన్వర్టిబుల్‌లో 2.0 లీటర్ పెట్రోల్ ఇంజిన్ అందించారు. ఈ ఇంజిన్ గరిష్ఠంగా 204 హార్స్‌పవర్‌, 300 Nm టార్క్‌ ఉత్పత్తి చేస్తుంది. దీనికి 7-స్పీడ్ DCT ఆటోమేటిక్ ట్రాన్స్‌మిషన్‌ను జత చేశారు. శక్తివంతమైన ఇంజిన్‌తో పాటు కన్వర్టిబుల్ డిజైన్‌ ఈ కారుకు స్పోర్టీ డ్రైవింగ్ అనుభూతిని అందించేలా ఉంటుంది.

ఫీచర్లు అదుర్స్‌

మినీ కూపర్ కన్వర్టిబుల్ స్టార్‌డస్ట్ ఎడిషన్‌లో అనేక ప్రీమియం ఫీచర్లను అందించారు. ఇందులో LED హెడ్‌లైట్లు, LED DRLs, Head-Up Display, మెమరీ ఫంక్షన్‌తో కూడిన సీట్లు, వైర్‌లెస్ ఫోన్ ఛార్జర్, 9.4-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, Harman Kardon ఆడియో సిస్టమ్, డిజిటల్ కీ, రిమోట్ ఇంజిన్ స్టార్ట్/స్టాప్, టైర్ ప్రెజర్ మానిటరింగ్ సిస్టమ్ (TPMS), ఎయిర్‌బ్యాగ్‌లు, ABS, EBD, 17-అంగుళాల అల్లాయ్ వీల్స్ వంటి ఫీచర్లు ఉన్నాయి.

18 సెకన్లలో పైకప్పు ఓపెన్‌

ఈ కారు ప్రత్యేకతల్లో కన్వర్టిబుల్ రూఫ్‌ కూడా ఒకటి. గంటకు 30 మైళ్ల వేగం వరకు ప్రయాణిస్తున్న సమయంలో రూఫ్‌ను కేవలం 18 సెకన్లలో పూర్తిగా ఓపెన్ చేయవచ్చు. అదే విధంగా రూఫ్‌ను 15 సెకన్లలో క్లోజ్ చేయవచ్చు.

ధర ఎంత?

భారతదేశంలో మినీ కూపర్ కన్వర్టిబుల్ స్టార్‌డస్ట్ ఎడిషన్ ఎక్స్‌-షోరూమ్ ధర రూ.62.90 లక్షలుగా నిర్ణయించారు. సాధారణ మినీ కూపర్ కన్వర్టిబుల్‌తో పోలిస్తే ఈ ప్రత్యేక ఎడిషన్ ధర సుమారు రూ.3.9 లక్షలు అధికం. ఈ కారును భారతదేశంలో CBU (Completely Built-Up) యూనిట్‌గా మాత్రమే విక్రయించనున్నారు. అంటే విదేశాల్లో పూర్తిగా తయారైన కారును భారత్‌కు దిగుమతి చేసి విక్రయిస్తారు.

మినీ కూపర్ కన్వర్టిబుల్ స్టార్‌డస్ట్ ఎడిషన్‌ కోసం బుకింగ్స్‌ను మినీ అధికారిక వెబ్‌సైట్ ద్వారా చేసుకోవచ్చు. ప్రత్యేకమైన డిజైన్‌, ప్రీమియం ఫీచర్లు, శక్తివంతమైన 2.0 లీటర్ ఇంజిన్‌, కన్వర్టిబుల్ రూఫ్‌తో ఈ కొత్త ఎడిషన్ భారత లగ్జరీ కార్ల విభాగంలో ప్రత్యేకమైన ఎంపికగా నిలవనుంది.