చైనా కంపెనీ BYD, కొత్త తరం అట్టో 3 ఎలక్ట్రిక్ SUVని చైనా మార్కెట్లో విడుదల చేసింది. ఇది కేవలం ఒక కారు మాత్రమే కాదు, ప్రయాణంలో ఉండే ఒక స్మార్ట్ గాడ్జెట్ కూడా. ఎక్కువ దూరం ప్రయాణించగల సామర్థ్యాన్ని (అంటే ఎక్కువ రేంజ్) ఇవ్వడమే కాకుండా, లగ్జరీ ఫీచర్లు, మెరుగైన డ్రైవింగ్ అనుభవం కోసం ఆధునిక సాంకేతికతను కూడా కలిగి ఉంది. ఈ కొత్త మోడల్ చైనా మార్కెట్లో నాలుగు వేరియంట్లలో అందుబాటులో ఉంది, దీని ధర సుమారు రూ. 17 లక్షల నుండి ప్రారంభమవుతుంది.
కొత్త అట్టో 3 దాని మునుపటి మోడల్ కంటే పెద్దదిగా, మరింత దృఢంగా ఉంది. దీని పొడవు 4665 మిమీ, వెడల్పు 1895 మిమీ, ఎత్తు 1675 మిమీగా ఉన్నాయి. ఇది 2770 మిమీ వీల్బేస్ను కలిగి ఉంది. అంతేకాకుండా, ఇది కంపెనీ డ్రాగన్ ఫేస్ డిజైన్ లాంగ్వేజ్ను కలిగి ఉంది. కొత్త అట్టో 3లో 180-లీటర్ల ఫ్రంక్, 750-లీటర్ల వెనుక బూట్ స్పేస్ కూడా ఉన్నాయి.
దీని ఫీచర్లలో పెద్ద ఫ్లోటింగ్ టచ్స్క్రీన్ (DiLink ఇంటర్ఫేస్తో), టూ-స్పోక్ స్టీరింగ్ వీల్, 16-స్పీకర్ ఆడియో సిస్టమ్, 50W వైర్లెస్ ఛార్జింగ్, పనోరమిక్ హెడ్-అప్ డిస్ప్లే ఉన్నాయి. టాప్-స్పెక్ వేరియంట్లలో LiDAR ఆధారిత DiPilot 300 అధునాతన డ్రైవింగ్ అసిస్టెన్స్ సిస్టమ్ కూడా లభిస్తుంది. దీనిలో సిటీ నావిగేషన్, ఆటోమేటెడ్ పార్కింగ్ వంటి ఫీచర్లు ఉన్నాయి. కొత్త తరం BYD ఆటో 3, రిఫ్రిజిరేటెడ్ స్టోరేజ్ కంపార్ట్మెంట్, వెనుక సీటు డ్రాయర్, ప్రత్యేక టిష్యూ హోల్డర్ వంటి అనేక కీలక ఫీచర్లతో వస్తుంది. లెగ్ సపోర్ట్తో కూడిన ముందు ప్రయాణీకుడి విశ్రాంతి సీటు ద్వారా ప్రయాణీకుల సౌకర్యం మెరుగుపరిచారు.
కొత్త తరం ఆటో 3, BYD కొత్త ఇ-ప్లాట్ఫామ్ 3.0 ఇవో ఆధారంగా రూపొందించారు. ఇందులో రెండవ తరం బ్లేడ్ బ్యాటరీ టెక్నాలజీని ఉపయోగించారు. ఈ ఎలక్ట్రిక్ SUV 57.5 kWh, 68.5 kWh అనే రెండు బ్యాటరీ ప్యాక్ ఆప్షన్లతో వస్తుంది. వీటి CLTC రేంజ్ గరిష్టంగా 540 కి.మీ, 630 కి.మీ ఉంటుంది. కొత్త BYD ఆటో 3, కంపెనీ కొత్త ఫ్లాష్ ఛార్జింగ్ టెక్నాలజీకి మద్దతు ఇస్తుంది, దీని ద్వారా కేవలం 9 నిమిషాల్లోనే 10% నుండి 97% వరకు ఛార్జ్ చేయవచ్చు. కొత్త BYD ఆటో 3 రియర్-వీల్ డ్రైవ్ లేఅవుట్తో వస్తుంది. దీని ఎలక్ట్రిక్ మోటార్ 268 హార్స్పవర్ నుండి 322 హార్స్పవర్ వరకు శక్తిని ఉత్పత్తి చేస్తుంది. కొత్త తరం అట్టో 3, 2027 నాటికి భారతదేశంలో విడుదల అవుతుందని అంచనా.