Vizag Steel Plant Accident: విశాఖపట్నంలోని విశాఖ స్టీల్ ప్లాంట్లో భారీ అగ్ని ప్రమాదం చోటుచేసుకుంది. స్టీల్ మెల్టింగ్ షాప్-1 (SMS-1) పరిధిలోని సీసీడీ (CCD) విభాగంలో ఈ ఘటన జరిగినట్లు సమాచారం. ప్రమాదం సంభవించడంతో ప్లాంట్లో ఒక్కసారిగా కలకలం రేగింది. ప్రాథమిక సమాచారం ప్రకారం, ద్రవ ఉక్కు (హాట్ మెటల్) రవాణా చేస్తున్న ల్యాడిల్ లేదా కన్వేయర్ వ్యవస్థలో సాంకేతిక లోపం తలెత్తడంతో భారీ మొత్తంలో ద్రవ ఉక్కు కింద పడింది. దీంతో అక్కడ పనిచేస్తున్న కార్మికులు తీవ్రంగా గాయపడినట్లు తెలుస్తోంది. ప్రమాదం జరిగిన వెంటనే మంటలు చెలరేగి పరిస్థితి ఉద్రిక్తంగా మారింది.
ఘటన సమాచారం అందుకున్న వెంటనే ప్లాంట్ భద్రతా సిబ్బంది, అగ్నిమాపక సిబ్బంది సహాయక చర్యలు చేపట్టారు. గాయపడిన కార్మికులను చికిత్స నిమిత్తం సమీప ఆసుపత్రులకు తరలించినట్లు సమాచారం. గాయపడిన వారి సంఖ్యపై అధికారిక వివరాలు ఇంకా వెలువడాల్సి ఉంది. ప్రమాదానికి సంబంధించి కొన్ని వర్గాలు కార్మికులు అగ్నికీలల్లో చిక్కుకున్నారని పేర్కొంటున్నప్పటికీ, మృతులు లేదా గాయపడిన వారి సంఖ్యపై అధికారికంగా ఎలాంటి నిర్ధారణ వెలువడలేదు. అధికారులు ఘటనపై దర్యాప్తు ప్రారంభించి ప్రమాదానికి గల కారణాలను పరిశీలిస్తున్నారు. ఈ ఘటనతో విశాఖ స్టీల్ ప్లాంట్లో భద్రతా ప్రమాణాలపై మరోసారి చర్చ మొదలైంది. పూర్తి వివరాలు అధికారిక ప్రకటన అనంతరం వెల్లడయ్యే అవకాశం ఉంది. అయితే, ల్యాడల్ నుంచి హాట్మెటల్ బకెట్లు కుప్పకూలడంతో.. ఇప్పటి వరకు 9 మంది కార్మికులు సజీదహనం అయినట్టు చెబుతున్నారు.. అయితే, దీనిపై అధికారిక ప్రకటన రావాల్సి ఉంది.. మొత్తంగా మృతుల సంఖ్య మరింత పెరిగే అవకాశం ఉందని చెబుతన్నారు..