AP Drought: ఏపీలో 544 మండలాలను కరువు ప్రాంతాలుగా గుర్తించాలి.. జాతీయ విపత్తుగా ప్రకటించాలి..

AP Drought: ఇటీవలే కూటమి ప్రభుత్వం కరువు మండలాలను ప్రకటించగా.. ఆంధ్రప్రదేశ్‌లో కరువు మండలాల ప్రకటనపై సీపీఎం రాష్ట్ర కార్యదర్శి వి. శ్రీనివాసరావు తీవ్ర అసంతృప్తి వ్యక్తం చేశారు. రాష్ట్ర ప్రభుత్వం ప్రకటించిన కరువు మండలాల జాబితా ప్రజలను, రైతులను, వ్యవసాయ కూలీలను నిరాశపరిచిందని ఆయన విమర్శించారు. రాష్ట్రంలో నెలకొన్న కరువు పరిస్థితులను జాతీయ విపత్తుగా ప్రకటించి, అందుకు తగిన ప్రత్యేక ప్యాకేజీని అందించాలని డిమాండ్ చేశారు. ఖరీఫ్ సీజన్‌లో ఎల్‌నినో ప్రభావంతో రాష్ట్రవ్యాప్తంగా పరిస్థితులు తీవ్రంగా దెబ్బతిన్నాయని అన్నారు. రాష్ట్రంలో 544 మండలాలను కరువు ప్రభావిత ప్రాంతాలుగా గుర్తించాల్సి ఉన్నప్పటికీ, ప్రభుత్వం 388 మండలాలను మాత్రమే ప్రకటించిందని విమర్శించారు. వీటిలో 283 మండలాలను తీవ్ర కరువు, 105 మండలాలను మధ్యస్థ కరువుగా ప్రభుత్వం వర్గీకరించారని తెలిపారు..

కరువు పరిస్థితులను జాతీయ విపత్తుగా ప్రకటించి కేంద్రం నుంచి తగిన సహాయాన్ని పొందాలని శ్రీనివాసరావు కోరారు. పరిస్థితులకు అనుగుణంగా కేంద్ర ప్రభుత్వ డ్రాట్ మాన్యువల్-2016ను సవరించాల్సిన అవసరం ఉందన్నారు. ఎల్‌నినో ప్రభావంతో వర్షాలు తగ్గే అవకాశం ఉందని వాతావరణ నిపుణులు హెచ్చరిస్తున్నప్పటికీ రాష్ట్ర ప్రభుత్వం తగిన సమయంలో స్పందించలేదని ఆయన ఆరోపించారు. తాజాగా 388 మండలాలను కరువు ప్రభావిత ప్రాంతాలుగా ప్రకటించడాన్ని కూడా శ్రీనివాసరావు ప్రశ్నించారు. కరువు తీవ్రతను దృష్టిలో పెట్టుకుంటే మరిన్ని ప్రాంతాలను జాబితాలో చేర్చాల్సి ఉందని అన్నారు. ఉత్తరాంధ్ర, రాయలసీమ, ప్రకాశం, పల్నాడు ప్రాంతాలతో పాటు గుంటూరు, బాపట్ల, ఎన్టీఆర్, కృష్ణా, నెల్లూరు జిల్లాల్లోని పశ్చిమ మండలాలు, డెల్టా ప్రాంతాల్లోని చివరి భూములు కూడా వర్షాభావంతో ఎండిపోయాయని పేర్కొన్నారు.

వర్షాలు లేక పలు ప్రాంతాల్లో పంటలు సాగు చేయని భూములు ఖాళీగా ఉన్నాయని శ్రీనివాసరావు తెలిపారు. రైతులు పెట్టిన పెట్టుబడులను నష్టపోయారని, వ్యవసాయ కూలీలకు ఉపాధి లేక ఇబ్బందులు ఎదురవుతున్నాయని అన్నారు. గ్రామీణ ప్రాంతాల్లో రైతులు, కూలీలు ఎదుర్కొంటున్న సమస్యలను ప్రభుత్వం తక్షణమే పరిష్కరించాల్సిన అవసరం ఉందని పేర్కొన్నారు. రాష్ట్ర ప్రభుత్వం విదేశీ పెట్టుబడులపై దృష్టి సారించే క్రమంలో గ్రామీణ ప్రజలు, పేదలు, రైతులు, వ్యవసాయ కార్మికుల సమస్యలను విస్మరిస్తోందని శ్రీనివాసరావు విమర్శించారు. కరువు ప్రభావిత ప్రాంతాల్లో జీవనోపాధి, వ్యవసాయం, తాగునీరు తదితర అంశాలపై తక్షణ చర్యలు చేపట్టాలని డిమాండ్ చేశారు. ఇప్పటికైనా ప్రభుత్వం స్పందించి రాష్ట్రాన్ని కరువు పరిస్థితుల నుంచి ఆదుకునేందుకు యుద్ధప్రాతిపదికన చర్యలు చేపట్టాలని కోరారు. రైతులకు, వ్యవసాయ కూలీలకు తక్షణ ఉపశమన చర్యలు అందించడంతో పాటు కేంద్రం నుంచి ప్రత్యేక సహాయాన్ని పొందేందుకు చర్యలు తీసుకోవాలని డిమాండ్ చేశారు సీపీఎం రాష్ట్ర కార్యదర్శి వి. శ్రీనివాసరావు..