Bay of Bengal Cyclone Alert: బంగాళాఖాతంలో మరో వాయుగుండం.. ఏపీకి వాతావరణ శాఖ అలర్ట్‌

Bay of Bengal Cyclone Alert: బంగాళాఖాతంలో మరో వాయుగుండం ఏర్పడే అవకాశం ఉందని వాతావరణ శాఖ వెల్లడించింది. ఈనెల 12న ఉత్తర అండమాన్‌ సముద్రంపై ఉపరితల ఆవర్తనం ఏర్పడనున్నట్లు తెలిపింది. ఇది క్రమంగా బలపడి 13వ తేదీ నాటికి అండమాన్‌ సముద్రంలో అల్పపీడనంగా మారే అవకాశం ఉందని పేర్కొంది. అనంతరం 15వ తేదీ నాటికి దక్షిణ బంగాళాఖాతం పరిసర ప్రాంతాల్లో వాయుగుండంగా బలపడే అవకాశం ఉందని అంచనా వేసింది. ఇదిలా ఉండగా, రాష్ట్రంలోనూ పలు ప్రాంతాల్లో వర్షాలు కురిసే అవకాశం ఉందని వాతావరణ శాఖ తెలిపింది. ఇవాళ అల్లూరి, పోలవరం జిల్లాల్లో అక్కడక్కడ పిడుగులతో కూడిన మోస్తరు వర్షాలు పడే అవకాశం ఉందని వెల్లడించింది. మిగతా కోస్తా జిల్లాల్లో చెదురుమదురుగా పిడుగులతో కూడిన తేలికపాటి వర్షాలు కురిసే అవకాశం ఉందని పేర్కొంది.

మరోవైపు, రాష్ట్రంలో ఉష్ణోగ్రతలు కూడా నమోదవుతున్నాయి. నిన్న తిరుపతి, కడప జిల్లాల్లో అత్యధికంగా 38 డిగ్రీల సెల్సియస్‌ ఉష్ణోగ్రతలు నమోదయ్యాయి. అలాగే బాపట్ల, ఎన్టీఆర్‌, కోనసీమ, ఏలూరు, అల్లూరి జిల్లాల్లో పలుచోట్ల ఓ మోస్తరు వర్షాలు కురిశాయి. ఇక, నైరుతి రుతుపవనాలు కూడా క్రమంగా తిరోగమిస్తున్నాయి. మరో రెండు, మూడు రోజుల్లో ఉత్తర, మధ్య భారతదేశం నుంచి నైరుతి రుతుపవనాలు నిష్క్రమించే అవకాశం ఉందని వాతావరణ శాఖ తెలిపింది. బంగాళాఖాతంలో ఏర్పడనున్న అల్పపీడనం, అనంతరం వాయుగుండం ప్రభావంతో రాష్ట్రంలో వర్షాల పరిస్థితిపై మరింత స్పష్టత వచ్చే అవకాశం ఉంది.