తమిళనాడు అసెంబ్లీ ఎన్నికల్లో టీవీకే (TVK) పార్టీ అనూహ్య విజయం సాధించి, సింగిల్ లార్జెస్ట్ పార్టీగా అవతరించడం వెనుక ఆ పార్టీ అధినేత విజయ్ ప్రకటించిన మేనిఫెస్టో ప్రధాన పాత్ర పోషించింది. ముఖ్యంగా మహిళలు, రైతులు, యువతను ఆకట్టుకునేలా రూపొందించిన 7 కీలక హామీలు విజయ్ విజయానికి బాటలు వేశాయి.
మహిళా ఆర్థిక భరోసా: మహిళలకు ప్రతి నెలా రూ. 2,500 ఆర్థిక సాయం అందించడంతో పాటు, బస్సుల్లో ఉచిత ప్రయాణం కల్పిస్తామన్న హామీ మహిళా ఓటర్లను విశేషంగా ఆకర్షించింది.
రైతు రుణమాఫీ: ఐదెకరాల లోపు సాగు భూమి ఉన్న రైతులకు రుణమాఫీ చేస్తామన్న హామీ వ్యవసాయ రంగంలో భరోసా నింపింది.
విద్యా ప్రోత్సాహం: విద్యార్థుల చదువు కోసం ప్రతి ఏటా రూ. 15,000 సాయం అందజేస్తామన్న హామీ సామాన్య కుటుంబాల్లో ఆశలు రేకెత్తించింది.
నిరుద్యోగ భృతి: ఉపాధి లేక ఇబ్బంది పడుతున్న యువతకు అండగా ఉండేందుకు ప్రతి నెలా రూ. 2,000 నిరుద్యోగ భృతి ఇస్తామని ప్రకటించడం యువతను పార్టీ వైపు తిప్పుకుంది.
ఉచిత గ్యాస్ సిలిండర్లు: పేద కుటుంబాలకు ఆర్థిక వెసులుబాటు కల్పిస్తూ ఏడాదికి 6 గ్యాస్ సిలిండర్లను ఉచితంగా పంపిణీ చేస్తామన్న హామీ గృహిణుల మద్దతును కూడగట్టింది.
స్థానికులకే ఉద్యోగాలు: ప్రైవేట్ రంగంలో 75 శాతం ఉద్యోగ అవకాశాలు స్థానికులకే కేటాయిస్తామన్న హామీ స్థానిక యువతలో ఉద్యోగ భద్రతపై నమ్మకాన్ని కలిగించింది.
వివాహ కానుక: పేద కుటుంబాల్లోని వధువులకు 8 గ్రాముల బంగారం కానుకగా ఇస్తామన్న హామీ సామాజికంగా పెద్ద ఎత్తున స్పందన పొందింది.
ఈ పథకాలు కేవలం నినాదాలుగా మిగిలిపోకుండా.. అట్టడుగు వర్గాల అవసరాలను నేరుగా తాకడం వల్లే ఎగ్జిట్ పోల్స్ అంచనాలను తలకిందులు చేస్తూ విజయ్ అఖండ విజయాన్ని సాధించగలిగారు.