New Car Features: భారత్ లో ఆటోమొబైల్ మార్కెట్ రోజురోజుకి వేగంగా మారుతోంది. కొద్దిరోజుల క్రితం కారు కొనాలంటే ఇంజిన్ పనితీరు, మైలేజ్, పవర్ వంటి అంశాలకే ఎక్కువ ప్రాధాన్యం ఇచ్చేవారు. కానీ ప్రస్తుత కాలంలో పరిస్థితి పూర్తిగా మారిపోయింది. ప్రస్తుత కారు కొనుగోలుదారులు సౌకర్యవంతమైన ప్రయాణం, అత్యాధునిక టెక్నాలజీ, భద్రతా ఫీచర్లు ఉన్న కార్లకే ఎక్కువ ప్రాధాన్యం ఇస్తున్నారు. దీంతో ఆటోమొబైల్ కంపెనీలు కూడా కొత్త మోడళ్లలో అడ్వాన్స్డ్ ఫీచర్లను అందించడంపై దృష్టి పెడుతున్నాయి.
మొదటి ప్రాధాన్యం భద్రతే..
రోడ్డు ప్రమాదాలు పెరుగుతున్న నేపథ్యంలో కొనుగోలుదారులు కార్ల భద్రతపై ఎక్కువగా దృష్టి సారిస్తున్నారు. 6 ఎయిర్ బ్యాగ్లు, ABS, ఎలక్ట్రానిక్ స్టెబిలిటీ కంట్రోల్ (ESC), బలమైన బాడీ స్ట్రక్చర్ వంటి భద్రతా ఫీచర్లు ఇప్పుడు కారు కొనుగోలులో కీలక పాత్ర పోషిస్తున్నాయి. అలాగే ADAS (అడ్వాన్స్డ్ డ్రైవర్ అసిస్టెన్స్ సిస్టమ్), ఆటోమేటిక్ ఎమర్జెన్సీ బ్రేకింగ్, లేన్ కీప్ అసిస్ట్ వంటి సాంకేతిక ఫీచర్లకు కూడా మంచి ఆదరణ లభిస్తోంది. 5-స్టార్ క్రాష్ సేఫ్టీ రేటింగ్ ఉన్న కార్లను ఎంచుకునే వారి సంఖ్య కూడా పెరుగుతోంది.
సన్రూఫ్:
కొన్ని సంవత్సరాల క్రితం వరకు సన్రూఫ్ అనేది ఖరీదైన కార్లలో మాత్రమే కనిపించే ఫీచర్. కానీ ప్రస్తుతం మిడ్-సైజ్ ఎస్యూవీలు, హ్యాచ్బ్యాక్లు, సెడాన్లలో కూడా ఈ ఫీచర్ అందుబాటులోకి వచ్చింది. ముఖ్యంగా పానోరమిక్ సన్రూఫ్ యువతతో పాటు కుటుంబాల దృష్టిని ఆకర్షిస్తోంది. ఓపెన్ క్యాబిన్ అనుభూతి, ప్రయాణంలో మరింత ఆనందాన్ని అందించడం వల్ల చాలామంది దీన్ని తప్పనిసరి ఫీచర్గా భావిస్తున్నారు.
పెద్ద టచ్స్క్రీన్, ప్రీమియం క్యాబిన్:
ప్రస్తుతం కారు కొనుగోలు చేసే వారు ముందుగా ఇంటీరియర్ను పరిశీలిస్తున్నారు. పెద్ద టచ్స్క్రీన్ ఇన్ఫోటైన్మెంట్ సిస్టమ్, డిజిటల్ ఇన్స్ట్రుమెంట్ క్లస్టర్, సులభమైన కనెక్టివిటీ వంటి ఫీచర్లు వినియోగదారులను బాగా ఆకట్టుకుంటున్నాయి. ఇవి డ్రైవింగ్ అనుభవాన్ని మరింత సౌకర్యవంతంగా మార్చడమే కాకుండా కారు ఇంటీరియర్కు ప్రీమియం లుక్ను కూడా తీసుకొస్తున్నాయి. అందుకే ఇప్పుడు ఎంట్రీ లెవల్ కార్లలో కూడా పెద్ద డిస్ప్లేలకు డిమాండ్ పెరుగుతోంది.
కెమెరా, వైర్లెస్ కనెక్టివిటీ:
పెద్ద నగరాల్లో ట్రాఫిక్, ఇరుకైన పార్కింగ్ స్థలాల కారణంగా 360 డిగ్రీ కెమెరా చాలా ఉపయోగకరంగా మారింది. దీనివల్ల పార్కింగ్ సులభమవడమే కాకుండా వాహనానికి నష్టం కలిగే అవకాశాలు కూడా తగ్గుతాయి. అదే సమయంలో వైర్లెస్ ఆండ్రాయిడ్ ఆటో, ఆపిల్ కార్ప్లే వంటి కనెక్టివిటీ ఫీచర్లు కూడా కొనుగోలుదారుల తొలి ఎంపికగా మారాయి. కేబుల్ అవసరం లేకుండా స్మార్ట్ఫోన్ను కారుతో అనుసంధానం చేసుకునే సౌకర్యం వినియోగదారులను ఆకట్టుకుంటోంది.
వెంటిలేటెడ్ సీట్లు:
భారతదేశంలోని అధిక ఉష్ణోగ్రతలను దృష్టిలో ఉంచుకుని వెంటిలేటెడ్ సీట్లకు కూడా భారీ డిమాండ్ ఏర్పడింది. ముఖ్యంగా వేసవిలో, సుదీర్ఘ ప్రయాణాల్లో ఈ సీట్లు చల్లదనాన్ని అందించి డ్రైవర్, ప్రయాణికులకు మరింత సౌకర్యాన్ని కల్పిస్తాయి. గతంలో ఈ ఫీచర్ కేవలం ప్రీమియం కార్లకే పరిమితమై ఉండేది. అయితే ఇప్పుడు అనేక మిడ్-రేంజ్ మోడళ్లలో కూడా అందుబాటులో ఉండటంతో వినియోగదారులు దీనికి ఎక్కువ ప్రాధాన్యం ఇస్తున్నారు.