టాలీవుడ్లో వరుస విషాదాలు చోటు చేసుకుంటున్నాయి. తాజాగా యువ నటుడు సుధీర్ వర్మ ఆత్మహత్య చేసుకున్నారు. సుధీర్ మృతి విషయాన్ని ‘కుందనపు బొమ్మ’ సినిమాలో ఆయనతో కలిసి నటించిన సుధాకర్ కోమాకుల సోషల్ మీడియా వేదికగా తెలియజేశారు. సుధీర్ మరణం దిగ్భ్రాంతికరమని.. దాన్ని జీర్ణించుకోలేకపోతున్నానని పేర్కొన్నారు. వైజాగ్లోని తన నివాసంలో వ్యక్తిగత కారణాలతో ఆత్మహత్యకు పాల్పడినట్లు తెలిసింది. విషం తీసుకుని సుధీర్వర్మ చనిపోయినట్టుగా ఎల్జీ ఆసుపత్రి వర్గాలు నిర్ధారించాయి. సోమవారం తెల్లవారుజామున 4గంటల సమయంలో చనిపోయినట్టు మరణ నివేదికలో పేర్కొన్నారు. సూసైడ్కు సంబంధించిన పూర్తి వివరాలు ఇంకా తెలియాల్సి ఉంది. ఈ నేపథ్యంలోనే అతడి మృతి పట్ల సినీ ప్రముఖులు, అభిమానులు సంతాపం తెలుపుతున్నారు. సుధీర్ ఆత్మకు శాంతి చేకూరాలని ప్రార్థిస్తున్నారు. కాగా, రాఘవేంద్ర రావు సమర్పణలో వచ్చిన ‘కుందనపు బొమ్మ’ చిత్రంలో నటించారు సుధీర్. ఇంకా ‘సెకండ్ హ్యాండ్’, ‘షూట్ఔట్ ఎట్ ఆలేరు’ చిత్రాల్లోనూ కనిపించి మెప్పించారు.
అంత్యక్రియలు పూర్తి
ఆత్మహత్య చేసుకున్న యువ నటుడు సుధీర్ వర్మ అంత్యక్రియలు పూర్తయ్యాయి. ఈ సందర్భంగా మీడియాతో మాట్లాడనానికి కుటుంబ సభ్యులు నిరాకరించారు. సోషల్ మీడియాలో ఆత్మహత్య అంటూ ప్రచారం జరుగుతుందంటూ ఆవేదన వ్యక్తం చేస్తూ కన్నీరు మున్నీరయ్యారు. అనారోగ్యంతోనే హాస్పిటల్లో జాయిన్ అయ్యాడని పేర్కొన్నారు. దీంతో ఏం జరిగి ఉంటుందనే విషయం తెలియాలంటే పూర్తి వివరాలు తెలియాల్సి ఉంది.
