Microsoft Outage : మైక్రోసాఫ్ట్ సెక్యూరిటీ సిస్టమ్‌లో సాంకేతిక సమస్య కారణంగా ప్రపంచ వ్యాప్తంగా గందరగోళం నెలకొంది.. ఇది ముంబై నుండి బెర్లిన్ వరకు ఎయిర్‌లైన్స్ నుండి బ్యాంకింగ్, స్టాక్ ఎక్స్ఛేంజీల వరకు అన్నింటిని ప్రభావితం చేసింది. మైక్రోసాఫ్ట్‌లో సమస్య కారణంగా ముంబై ఎయిర్‌పోర్ట్‌తో సహా ప్రపంచవ్యాప్తంగా ఉన్న విమానాశ్రయాల్లో విమానాలు టేకాఫ్ కావడం లేదు. సాంకేతిక సమస్యల కారణంగా విమానాశ్రయం మాత్రమే కాకుండా స్టాక్ మార్కెట్, బ్యాంకులు అన్నీ నిలిచిపోయాయి. మైక్రోసాఫ్ట్ కూడా దీని కారణంగా భారీ నష్టాలను చవిచూసింది. కంపెనీ షేర్లలో 0.78 శాతం క్షీణత నమోదైంది. భారతదేశంలో మైక్రోసాఫ్ట్ సమస్యల కారణంగా ముంబై విమానాశ్రయంలో చెక్-ఇన్ సిస్టమ్ నిలిచిపోవడంతో ప్రయాణికులు ఇబ్బందులు ఎదుర్కొంటున్నారు. దీంతో స్పైస్‌జెట్, ఇండిగో, ఎయిర్ ఇండియా, అకాస సహా అన్ని విమానయాన సంస్థల కార్యకలాపాలు దెబ్బతిన్నాయి.
-
మైక్రోసాఫ్ట్ సమస్యపై ఆర్‌బీఐ ఏమన్నదంటే..?
మైక్రోసాఫ్ట్ విండోస్‌లో ఏర్పడిన సాంకేతిక లోపంపై భారతీయ రిజర్వు బ్యాంకు స్పందించింది. సాంకేతిక లోపం కారణంగా భారత్‌లోని 10 బ్యాంకులు, ఎన్‌బీఎఫ్‌సీ సేవల్లో స్వల్ప అంతరాయం ఏర్పడినట్లు ఆర్‌బీఐ వెల్లడించింది.
-
మైక్రోసాఫ్ట్ సర్వర్ క్రాష్ వెనుక కారణం ఇదే- క్రౌడ్‌స్ట్రైక్ సీఈఓ
మైక్రోసాఫ్ట్ సర్వర్ సమస్యపై క్రౌడ్‌స్ట్రైక్ సీఈవో కీలక వ్యాఖ్యలు చేశారు. సమస్య పరిష్కారానికి డీబగ్‍ రూపొందించినట్లు పేర్కొన్నారు. జార్జ్ కర్ట్జ్ తన ఎక్స్ ఖాతాలో “విండోస్ (Windows) హోస్ట్‌ల కోసం ఒకే కంటెంట్ అప్‌డేట్‌లో కనుగొనబడిన లోపం వల్ల ప్రభావితమైన కస్టమర్‌లతో క్రౌడ్‌స్ట్రైక్ పని చేస్తోంది. Mac మరియు Linux హోస్ట్‌లు ప్రభావితం కావు. ఇది సైబర్ దాడి కాదు. భద్రతకు ఎటువంటి ప్రమాదం లేదు. సమస్య గుర్తించి పరిష్కారించాం.” అని రాసుకొచ్చారు.
-
చెన్నై ఎయిర్ పోర్టు నుంచి ఆలస్యంగా 40 విమానాలు..
మైక్రోసాఫ్ట్ క్లౌడ్ సర్వీస్ లో ఎదురైన అవాంతర ఫలితంగా చెన్నై విమానాశ్రయం నుంచి 40 విమానాలు ఆలస్యంగా నడవనున్నాయి. ముంబై, లక్నో, బెంగళూరు, హైదరాబాద్, కోయంబత్తూర్, ఢిల్లీ, కోల్ కతా, గోవా, పూణే వెళ్లాల్సిన విమానాలు ఆలస్యం అయ్యాయి. అంతేకాకుండా.. సింగపూర్, కౌలాలంపూర్, శ్రీలంక, ఢాకా వెళ్లాల్సిన అంతర్జాతీయ సర్వీసులు రెండు గంటల ఆలస్యం అయ్యాయి. ప్రయాణికులకు మాన్యువల్ గా బోర్డింగ్ పాసులు ఇస్తుండటంతో.. బోర్డింగ్ పాసులు తీసుకునేందుకు భారీ క్యూ లైన్లలో ఉన్నారు. అటు.. ఎయిర్ ఇండియాతో పాటు ఇండిగో, స్పైస్ జెట్, ఆకాశ విమాన సర్వీసులపై ప్రభావం తీవ్రంగా పడింది. ఇవాళ విమానాల్లో ప్రయాణించాల్సిన ప్రయాణికులు వీలైనంత త్వరగా ఎయిర్పోర్టుకు చేరుకోవాలని అధికారులు కోరుతున్నారు.
-
మైక్రోసాఫ్ట్ సంస్థతో సంప్రదించాం- కేంద్ర ఐటీ మంత్రి అశ్వనీ వైష్ణవ్..
మైక్రోసాఫ్ట్ సంస్థతో సంప్రదించామని కేంద్ర ఐటీ మంత్రి అశ్వనీ వైష్ణవ్ తెలిపారు. సమస్యకు గల కారణాలను గుర్తించారని పేర్కొన్నారు. వాటి పరిష్కారానికి అప్డేట్లు విడుదల చేసినట్లు చెప్పారని అశ్వనీ వైష్ణవ్ చెప్పారు.
-
గన్నవరం విమానాశ్రయం నుంచి పలు సర్వీస్లు ఆలస్యం..
గన్నవరం విమానాశ్రయం నుంచి పలు సర్వీస్లు ఆలస్యం అవుతున్నాయి. మైక్రోసాఫ్ట్ క్లౌడ్ సాంకేతిక లోపం వల్ల సాఫ్ట్ వేర్ సర్వర్ ప్రపంచవ్యాప్తంగా నిలిచిపోయింది. దీనివలన పలు విమాన సర్వీసులు ఆలస్యం, బోర్డింగ్ పాసులపై, మాన్యువల్ గా రాసి పంపించడం జరుగుతుంది.
-
బ్లూ స్క్రీన్ ఎర్రర్‌పై స్పందించిన మైక్రోసాఫ్ట్..
బ్లూ స్క్రీన్ ఎర్రర్‌పై మైక్రోసాఫ్ట్ స్పందించింది. అతి త్వరలో సమస్య పరిష్కరిస్తామని మైక్రోసాఫ్ట్ ట్వీట్ చేసింది. ప్రపంచవ్యాప్తంగా మైక్రోసాఫ్ట్ విండోస్ సేవలకు అంతరాయం ఏర్పడిన సంగతి తెలిసిందే.. కొన్ని పీసీల్లో విండోస్-11, 10లో ఆపరేటింగ్ సిస్టమ్‌లో సమస్య తలెత్తింది.
-
మైక్రోసాఫ్ట్‌లో తలెత్తిన సమస్యపై భారత కంప్యూటర్ ఎమర్జెన్సీ రెస్పాన్స్ టీమ్ (CERT) అడ్వైజరీ
మైక్రోసాఫ్ట్‌లో తలెత్తిన సమస్యపై భారత కంప్యూటర్ ఎమర్జెన్సీ రెస్పాన్స్ టీమ్ (CERT) అడ్వైజరీ స్పందించింది. సేఫ్ మోడ్‌లో విండోస్ బూట్ చేయాలని సూచించింది. అనంతరం క్రౌడ్ స్ట్రైక్ డైరెక్టరీకి వెళ్లి బగ్ ఉన్న ఫైల్ డిలీట్ చేయాల్సిందిగా కోరింది. ఆ తర్వాత నార్మల్‌గా బూట్ చేయాలని వెల్లడించింది.
-
శంషాబాద్‌ ఎయిర్‌పోర్టులో పలు విమానాలు రద్దు..
శంషాబాద్‌ ఎయిర్‌పోర్టులో పలు విమానాలు రద్దు అయ్యాయి. ఇప్పటివరకు 35 విమానాలు రద్దు చేశారు ఎయిర్‌పోర్టు అధికారులు. ఎయిర్‌పోర్టులో డిస్‌ప్లే బోర్డులు పనిచేయడం లేదు. దీంతో.. మాన్యువల్ బోర్డులు ఏర్పాటు చేశారు అధికారులు.
-
నిలిచిన ఆస్పత్రి సేవలు
సర్వర్ లోపం కారణంగా బ్రిటన్‌లోని ఆసుపత్రుల్లో సేవలు నిలిచిపోయాయి.
-
మాన్యువల్ చెక్ ఇన్
భోపాల్ విమానాశ్రయంలో మాన్యువల్ చెక్-ఇన్ కొనసాగుతుంది.
-
బ్లూ స్క్రీన్ అంటే ఏమిటి?
బ్లూ స్క్రీన్ లోపాన్ని బ్లాక్ స్క్రీన్ ఎర్రర్ లేదా స్టాప్ కోడ్ ఎర్రర్ అని కూడా అంటారు. కంప్యూటర్ అకస్మాత్తుగా షట్ డౌన్ అయినప్పుడు లేదా రీస్టార్ట్ అయినప్పుడు ఈ సమస్య తలెత్తుతుంది.
-
అన్ని సేవల పై ప్రభావం
మైక్రోసాఫ్ట్ సాఫ్ట్‌వేర్‌లోని లోపం దాదాపు అన్ని దాని సేవలను ప్రభావితం చేసింది. గురువారం మధ్యాహ్నం ప్రజల కంప్యూటర్లు అకస్మాత్తుగా షట్ డౌన్ అయ్యాయి. ఎంఎస్ విండోస్‌తో సహా అనేక సేవలలో ఆటంకాలు ఏర్పడ్డాయి. దీని గురించి ప్రజలు సోషల్ మీడియాలో ఫిర్యాదు చేశారు.
-
దలాల్ స్ట్రీట్ పై ప్రభావం
మైక్రోసాఫ్ట్‌లో సమస్య కారణంగా దలాల్ స్ట్రీట్‌లోని వ్యాపారులు ప్రభావితమయ్యారు. భారతదేశంలోని అనేక ట్రేడింగ్ ప్లాట్‌ఫారమ్‌లలో ట్రేడింగ్‌లో సమస్యలను ఎదుర్కొంటున్నాయి. మైక్రోసాఫ్ట్ సమస్య కారణంగా తమ సిస్టమ్‌లు ప్రభావితమయ్యాయని బ్రోకరేజ్ సంస్థలు 5పైసా, IIFL సెక్యూరిటీలు నివేదించాయి.