భారతీయ ఐటీ రంగంలో మారుతున్న పరిస్థితులు ఉద్యోగులను తీవ్ర ఆందోళనకు గురిచేస్తున్నాయి. సరైన నైపుణ్యాలు, అనుభవం ఉన్నప్పటికీ కొత్త ఉద్యోగం పొందడం అత్యంత కష్టతరంగా మారుతోందని అమర్‌నాథ్ శివశంకర్ అనే టెక్నికల్ మేనేజర్ తన ఇంటర్వ్యూ అనుభవాల ద్వారా వెల్లడించారు. ఇటీవల ఆయన ఇంటర్వ్యూ చేసిన ఇద్దరు అభ్యర్థుల ఉదంతాలు ప్రస్తుత ఐటీ జాబ్ మార్కెట్ దుస్థితిని కళ్లకు కడుతున్నాయి.
వారిలో ఒకరి కంపెనీని గ్లోబల్ ఐటీ సర్వీసెస్ సంస్థ కొనుగోలు చేయడంతో ఉద్యోగం కోల్పోయి రోడ్డున పడ్డారు. మరొకరు మూడేళ్లుగా జీతం పెరగకపోవడంతో విసుగు చెంది ఉద్యోగం మానేశారు. ఈ రెండు ఉదాహరణలు నేడు ఐటీ నిపుణులు ఎదుర్కొంటున్న అతిపెద్ద సవాళ్లను స్పష్టంగా తెలియజేస్తున్నాయి.
కేవలం నైపుణ్యం ఉంటే సరిపోదని, మార్కెట్‌లో ఉద్యోగ అవకాశాలు తగ్గిపోయి, దరఖాస్తు చేసే అభ్యర్థుల సంఖ్య విపరీతంగా పెరిగిపోయిందని నిపుణులు హెచ్చరిస్తున్నారు. దీనివల్ల మంచి అనుభవం ఉన్నవారికి కూడా ఇంటర్వ్యూ కాల్స్ రావడం గగనంగా మారింది. మరోవైపు ఉద్యోగం మానేసి కొత్త అవకాశాల కోసం వెతకడం పెద్ద రిస్క్‌తో కూడుకున్న వ్యవహారంగా మారింది. ఒకవేళ ఉద్యోగంలోనే కొనసాగినా జీతంలో ఎలాంటి మార్పు లేకపోవడంతో నిత్య జీవితంలో పెరుగుతున్న ఖర్చులను భరించడం కష్టమవుతోంది.
ప్రస్తుత తరుణంలో ఉద్యోగం మారడం లేదా ఉన్న చోటే కొనసాగడం అనే రెండు మార్గాలు కూడా సవాళ్లతో కూడుకున్నవే. ఈ అనిశ్చిత పరిస్థితుల్లో ఐటీ నిపుణులు ఎటువంటి సాహసోపేత నిర్ణయాలు తీసుకోకుండా, మార్కెట్ పరిస్థితులను క్షుణ్ణంగా బేరీజు వేసుకోవాలని నిపుణులు సూచిస్తున్నారు. ఏదైనా నిర్ణయం తీసుకునే ముందు తమ ఆర్థిక పరిస్థితిని, ప్రత్యామ్నాయ అవకాశాలను సరిగ్గా అంచనా వేసుకోవడం ఎంతో అవసరమని అభిప్రాయపడుతున్నారు.