భారత క్రికెట్ నియంత్రణ మౌలిక మండలి ఇండియన్ ప్రిమియర్ లీగ్ (ఐపీఎల్)ను మరింత విస్తరించేందుకు ప్రణాళికలు రచిస్తోంది. 2028 సీజన్ నుంచి మరో రెండు కొత్త జట్లను లీగ్‌లోకి తీసుకురావాలని చూస్తోంది. ఈ కొత్త జట్ల కోసం ప్రధానంగా పూణే, వడోదర నగరాల పేర్లు వినిపిస్తున్నాయి. ఈ ప్రతిపాదిత విస్తరణ 2028-2032 మీడియా హక్కుల కాలానికి సరిగ్గా సరిపోయేలా ఉండే అవకాశం ఉంది. ప్రస్తుతం భారతీయ, అంతర్జాతీయ పెట్టుబడిదారుల నుంచి ఐపీఎల్ పట్ల ఆసక్తి వ్యక్తమవుతోంది. ఈ నేపథ్యంలో కొత్తగా వచ్చే ఒక్కో జట్టు విలువ ఒక బిలియన్ డాలర్లకు పైగానే ఉండవచ్చని అంచనా వేస్తున్నారు.
గుజరాత్ రాష్ట్రాన్ని క్రీడా హబ్‌గా తీర్చిదిద్దే ప్రయత్నంలో భాగంగా వడోదర పేరు పరిశీలనలోకి వచ్చింది. ఇప్పటికే గుజరాత్‌లో గుజరాత్ టైటాన్స్ జట్టు ఉంది. ఇక పూణే విషయానికి వస్తే.. గతంలో ఈ నగరం నుంచి ‘పూణే వారియర్స్ ఇండియా’, ‘రైజింగ్ పూణే సూపర్‌జెయింట్’ అనే రెండు జట్లు ఐపీఎల్‌లో ఆడాయి. అందువల్ల పూణేలో మంచి క్రీడా వాతావరణం ఉందనే అభిప్రాయం ఉంది. యూరప్, పశ్చిమాసియాకు చెందిన ప్రముఖ పెట్టుబడి సంస్థలు, భారత్‌లోని బడా వ్యాపార దిగ్గజాలు కొత్త జట్లలో భాగస్వామ్యం కోసం ఆసక్తి చూపుతున్నారు.
ఇటీవల రాయల్ ఛాలెంజర్స్ బెంగళూరు (ఆర్‌సీబీ), రాజస్థాన్ రాయల్స్ జట్ల వాటాల విక్రయం భారీ ధరలకు జరిగింది. దీనివల్ల ఐపీఎల్ జట్ల విలువ విపరీతంగా పెరిగింది. చివరిసారిగా 2022లో లక్నో సూపర్ జెయింట్స్, గుజరాత్ టైటాన్స్ జట్లు ఐపీఎల్‌లోకి వచ్చాయి. అయితే.. కొత్త జట్లను లీగ్‌లో చేర్చడం అనేది కేవలం పెట్టుబడులపైనే కాకుండా మ్యాచ్‌ల సంఖ్య, ప్రసారకర్తల ఆసక్తి, కీలక ఆటగాళ్ల లభ్యతపై కూడా ఆధారపడి ఉంటుంది. ప్రస్తుతం చర్చలు ప్రాథమిక దశలోనే ఉన్నందున, రాబోయే రోజుల్లో దీనిపై ఒక పూర్తి స్పష్టత రానుంది.