ఆంధ్రప్రదేశ్ ప్రభుత్వం నవంబర్ 14వ తేదీని వర్కింగ్ డేగా ప్రకటిస్తూ అధికారికంగా ఉత్తర్వులు జారీ చేసింది. గత అక్టోబర్ 19న మహర్నవమి సందర్భంగా ప్రభుత్వం జనరల్ సెలవును ప్రకటించిన విషయం తెలిసిందే. ఆ సెలవు దినానికి బదులుగా నవంబర్ 14వ తేదీ రెండవ శనివారం అయినప్పటికీ ఉద్యోగులు విధులకు హాజరుకావాలని గతంలోనే ఆదేశాలు జారీ అయ్యాయి. అయితే, ఉద్యోగ సంఘాల విజ్ఞప్తి మేరకు ఈ విషయంలో తాజాగా కొన్ని సవరణలు చేస్తూ ప్రభుత్వం మరో మెమోను విడుదల చేసింది.
అక్టోబర్ 19న దసరా సెలవు రోజున ఎన్నికల విధులు, దసరా ఉత్సవాలు, విజయవాడలో జరిగిన సరస్ (SARAS) మేళా వంటి అధికారిక బాధ్యతలలో ఉన్న సిబ్బంది ఆ సెలవును పూర్తిగా వినియోగించుకోలేకపోయారు. ఈ విషయాన్ని వివిధ ఉద్యోగ సంఘాలు ప్రభుత్వ దృష్టికి తీసుకురావడంతో, అప్పట్లో విధులకు హాజరైన ఆయా అర్హులైన ఉద్యోగులకు నవంబర్ 14న సెలవును వర్తింపజేయాలని నిర్ణయించారు.
సంబంధిత శాఖల అధిపతులు, కలెక్టర్లు , జిల్లా మేజిస్ట్రేట్లు ఈ వివరాలను పరిశీలించి కేవలం ఆ రోజు విధుల్లో ఉన్న ఉద్యోగులకు మాత్రమే ఆ రోజు సెలవు ఇవ్వాలని ఉత్తర్వులలో స్పష్టం చేశారు. ఈ మినహాయింపు కేవలం ఎన్నికలు మరియు పండుగ సమయాల్లో విధులను నిర్వర్తించిన వారికే వర్తిస్తుందని, మిగిలిన ఉద్యోగులందరూ యథావిధిగా నవంబర్ 14న విధులకు హాజరుకావాల్సి ఉంటుందని ప్రభుత్వం తేల్చిచెప్పింది.