Vishal Marriage : ప్రభాస్ పెళ్లి తర్వాతే తను చేసుకుంటానన్న విశాల్

Vishal Marriage : తమిళ చిత్రసీమలో వివాదాస్పద నటుల్లో విశాల్ ఒకరు. నటీనటుల సంఘం బాధ్యతలు చేపట్టినప్పటి నుంచి ఆయన చుట్టూ వివాదాలు చుట్టుముడుతున్నాయి. అయితే అవన్నీ పక్కన పెడితే విశాల్ సినిమాల్లో నటిస్తూనే ఉన్నాడు. 2004లో విడుదలైన ‘చెల్లామె’ చిత్రంతో హీరోగా తెరంగేట్రం చేసిన విశాల్ సృధికోళి(తెలుగులో పందెం కోడి) సినిమాతో యాక్షన్ హీరోగా అవతారమెత్తాడు. యాక్షన్ చిత్రాల్లో నటిస్తూ వరుస విజయాలను తన ఖాతాలో వేసుకుంటున్న విశాల్ ఇటీవల ఆశించిన విజయాలను అందుకోలేక పోతున్నాడు. ఈ విషయంలో ప్రస్తుతం విశాల్ ‘లాఠీ’ సినిమాతో చాలా కాన్ఫిడెంట్ గా ఉన్నాడు. డిసెంబర్‌లో సినిమా విడుదల కానున్న నేపథ్యంలో సినిమా ప్రమోషన్‌లో చురుగ్గా పాల్గొంటున్నాడు. రీసెంట్‌గా విడుదలైన ఈ సినిమా ట్రైలర్‌కి అభిమానుల నుంచి విశేష స్పందన రావడంతో సినిమాపై అంచనాలు పెరిగాయి. ఈ సందర్భంలో విశాల్ సినిమా ప్రమోషన్ కార్యక్రమాల్లో పాల్గొంటూ పలు విషయాలు మాట్లాడుతున్నాడు. ఈ క్రమంలో విశాల్ తన పెళ్లి గురించి అడిగిన ప్రశ్నకు ముందుగా ప్రభాస్ పెళ్లి చేసుకోనివ్వండి అంటూ సమాధానమిచ్చాడు. అతని పెళ్లి రోజునే నేను పెళ్లి చేసుకుంటాను అని విశాల్ చెప్పాడు. అలాగే నటుడు ఆర్య పెళ్లి చేసుకుంటే నేను కూడా పెళ్లి చేసుకుంటాను. అయితే ఆర్యకు పెళ్లి అయి ఇప్పుడు ఓ బిడ్డ కూడా ఉందని అభిమానులు విమర్శిస్తున్నారు.

Read Also: Javed Akhtar : బాలీవుడ్ లిరికిస్ట్ జావేద్ అక్తర్‌కు కోర్టు సమన్లు.. హాజరు కావాలంటూ ఆదేశాలు

పందెం కోడి, డిటెక్టీవ్, అభిమన్యుడు సినిమాల ద్వారా విశాల్ తెలుగు వారికి కూడా సుపరిచితమే. ఆ సినిమాలు విశాల్ కు మంచి కలెక్షన్స్ రాబట్టాయి. దీంతో విశాల్ తన సినిమాలన్నింటినీ అటు తమిళ్‌తో పాటు తెలుగులోనూ రిలీజ్ చేస్తుంటాడు. మూడేళ్ల క్రితం హైదరాబాద్‌కి చెందిన అనూష అనే అమ్మాయిని విశాల్ పెళ్లి చేసుకుంటున్నాడని వార్త ప్రచారం జరిగింది. కానీ.. ఎంగేజ్‌మెంట్ తర్వాత ఏం జరిగిందో తెలియదుగానీ.. పెళ్లి మాత్రం ఆగిపోయింది. ఆ తర్వాత మళ్లీ నటి అభినయను పెళ్లి చేసుకోబోతున్నారన్న వార్తలు వచ్చాయి. కానీ వీటిలో ఎంత నిజం ఉందో తెలీదు. 45 ఏళ్ల విశాల్ ఇప్పటి వరకూ మళ్లీ పెళ్లి టాపిక్ ఎత్త లేదు. తాజాగా ఓ ఇంటర్వ్యూలో పర్సనల్ విషయాల్ని షేర్ చేసుకున్న విశాల్.. కొన్నింటికి మాత్రం సమాధానం దాటవేశాడు. ఫైనల్‌గా తన పెళ్లిని.. ప్రభాస్‌ పెళ్లి తో ముడిపెట్టి తప్పించుకున్నాడు.