Isakapatnam OTT: ఓటీటీలలో క్రైమ్ థ్రిల్లర్ వెబ్ సిరీస్లకు ప్రేక్షకుల నుంచి రోజురోజుకూ ఆదరణ పెరుగుతోంది. ఇంటెన్స్ కథలను చూసేందుకు ప్రేక్షకులు ఆసక్తిగా ఎదురుచూస్తుంటారు. ఇప్పుడు అలాంటి మరో ఆసక్తికరమైన వెబ్ సిరీస్ ప్రేక్షకుల ముందుకు వస్తోంది. సముద్రకని, ఐశ్వర్య రాజేష్ ప్రధాన పాత్రల్లో నటించిన ‘ఇసకపట్నం’ విడుదలకు సిద్ధమవుతోంది. ఇప్పటికే విడుదలైన ట్రైలర్ సిరీస్పై మంచి అంచనాలను పెంచింది. తమిళం, తెలుగు భాషల్లో రూపొందిన ఈ క్రైమ్ థ్రిల్లర్ వెబ్ సిరీస్ ప్రముఖ ఓటీటీ వేదిక అమెజాన్ ప్రైమ్ వీడియోలో జూలై 2, 2026 నుంచి స్ట్రీమింగ్ కానుంది. తొలి సీజన్ను తెలుగు, తమిళం, మలయాళం, కన్నడ, హిందీ భాషల్లో ఒకేసారి అందుబాటులోకి తీసుకురానున్నారు. దీంతో దక్షిణాదితో పాటు దేశవ్యాప్తంగా ఉన్న ప్రేక్షకులను ఈ సిరీస్ చేరుకునే అవకాశం ఉంది. ఈ సిరీస్లో సముద్రకని, ఐశ్వర్య రాజేష్తో పాటు సునీల్, నరేష్ అగస్త్య, సుధాకర్ కోమకుల, రాజీవ్ కనకాల, మెరిన్ ఫిలిప్, రోహిణి, మైమ్ గోపీ తదితరులు కీలక పాత్రల్లో నటించారు. విభిన్నమైన నటీనటుల సమాహారంతో రూపొందిన ఈ ప్రాజెక్ట్లో ప్రతి పాత్ర కథను ముందుకు నడిపేలా ఉండబోతుందని ట్రైలర్ సూచిస్తోంది.
ఇటీవల విడుదలైన ట్రైలర్ను పరిశీలిస్తే, పోర్ట్ ఏరియాను కేంద్రంగా చేసుకుని అధికారం, ప్రతీకారం, రాజకీయ ప్రభావం, నేరాల నేపథ్యంలో కథ సాగనున్నట్లు తెలుస్తోంది. అధికారాన్ని గుప్పెట్లో పెట్టుకున్న ఓ శక్తివంతమైన పోర్ట్ యజమానికి ఎదురుగా నిలిచే నిజాయితీ గల మహిళ పోరాటం ఈ కథలో ప్రధాన ఆకర్షణగా కనిపిస్తోంది. ఈ పాత్రల్లో తండ్రీ కూతుళ్లు మధ్య వార్ ఇంటెన్స్ గా సాగుతుంది. ఆమె ఆ వ్యవస్థను ఎలా సవాలు చేసింది? ఆ పోరాటం ఎలాంటి పరిణామాలకు దారితీసింది? అనే అంశాలను ఉత్కంఠభరితంగా చూపించనున్నట్లు ట్రైలర్ ద్వారా సంకేతాలు ఇచ్చారు. ఇటీవలి కాలంలో కంటెంట్ ఆధారిత క్రైమ్ థ్రిల్లర్లకు ఓటీటీలో మంచి ఆదరణ లభిస్తున్న నేపథ్యంలో, ‘ఇసకపట్నం’ కూడా అదే జాబితాలో నిలుస్తుందా అనే ఆసక్తి నెలకొంది. బలమైన కథ, అనుభవజ్ఞులైన నటీనటులు, సస్పెన్స్తో కూడిన కథనం ఈ సిరీస్కు ప్రధాన బలంగా కనిపిస్తున్నాయి. జూలై 2 నుంచి అమెజాన్ ప్రైమ్ వీడియోలో స్ట్రీమింగ్ కానున్న ఈ వెబ్ సిరీస్ ప్రేక్షకులను ఎంతవరకు ఆకట్టుకుంటుందో చూడాలి.