Dhamaal 4 Trailer : ‘ధమాల్’ సిరీస్ అంటేనే గందరగోళానికి మరో పేరు. ఎక్కడ నిధి ఉంటే అక్కడ ఈ గ్యాంగ్ ఉంటుంది. ఎక్కడ ఈ గ్యాంగ్ ఉంటే అక్కడ నవ్వులు తప్పవు. ఇప్పుడు అదే ఫార్ములాతో మరోసారి ప్రేక్షకుల ముందుకు రాబోతోంది ‘ధమాల్ 4’. అజయ్ దేవ్గన్, అర్షద్ వార్సీ, రితేష్ దేశ్ముఖ్, జావేద్ జాఫేరి వంటి నటులతో ఈ సినిమా ట్రైలర్ విడుదలైన వెంటనే సోషల్ మీడియాలో మంచి స్పందన వస్తోంది. ఈసారి నిధి వేట మాత్రమే కాదు, దెయ్యాలు, సముద్రపు దొంగలు, అతీంద్రియ శక్తులు కూడా కథలో భాగం కావడంతో ప్రేక్షకుల్లో ఆసక్తి మరింత పెరిగింది.
ఇంద్ర కుమార్ దర్శకత్వం వహిస్తున్న ఈ చిత్రం 2026 జూలై 10న థియేటర్లలో విడుదల కానుంది. ఇప్పటికే సక్సెస్ఫుల్ కామెడీ ఫ్రాంచైజీగా పేరు తెచ్చుకున్న ‘ధమాల్’ సిరీస్కు ఇది నాలుగో భాగం. నిన్న రిలీజ్ అయిన ట్రైలర్ నిడివి మూడు నిమిషాల 27 సెకన్లు మాత్రమే ఉన్నప్పటికీ, సినిమా కథను పూర్తిగా పరిచయం చేసే ప్రయత్నం చేశారు. ఈసారి కథ సముద్రం మధ్యలో జరుగుతున్న ఒక నిధి వేట చుట్టూ తిరుగుతున్నట్లు కనిపిస్తోంది. అయితే ఆ ప్రయాణం సాధారణంగా సాగదు. నిధి కోసం వెతుకుతున్న వాళ్ళు అనుకోని పరిస్థితుల్లో చిక్కుకోవడం, దెయ్యాల ప్రభావం, సముద్రపు దొంగల ఎంట్రీతో పరిస్థితులు మరింత గందరగోళంగా మారడం ట్రైలర్లో కనిపిస్తోంది.
‘ధమాల్’ సిరీస్ అభిమానులు ఇష్టపడే అంశం ఏమిటంటే, ఇందులో లాజిక్ కంటే వినోదానికే ఎక్కువ ప్రాధాన్యం ఉంటుంది. అదే అంశాన్ని ఈసారి కూడా కొనసాగించినట్లు కనిపిస్తోంది. అందుకు తగ్గట్లే ట్రైలర్ మొత్తం విచిత్రమైన సంఘటనలతో వేగంగా సాగిపోయింది. ఇందులో అజయ్ దేవ్గన్ తన ప్రత్యేకమైన కామిక్ టైమింగ్తో ఆకట్టుకోగా, అర్షద్ వార్సీ, రితేష్ దేశ్ముఖ్, జావేద్ జాఫేరి మధ్య కెమిస్ట్రీ మరోసారి హైలెట్ గా నిలిచేలా ఉంది.
ఈ చిత్రంలో రవి కిషన్, సంజయ్ మిశ్రా, ఉపేంద్ర లిమాయే, అంజలి ఆనంద్, సంజీదా షేక్, ఈషా గుప్తా వంటి నటీనటులు కూడా కీలక పాత్రల్లో కనిపించనున్నారు. దీంతో తారాగణం పరంగా కూడా సినిమా బలంగా కనిపిస్తోంది. ముఖ్యంగా దెయ్యాలు, సముద్రపు దొంగలు వంటి కొత్త అంశాలను ‘ధమాల్’ శైలిలో ఎలా మలిచారన్నదే ఇప్పుడు ఆసక్తికర అంశంగా మారింది. ట్రైలర్ విడుదలైన తర్వాత సోషల్ మీడియాలో కూడా సానుకూల స్పందన కనిపిస్తోంది. ఇటీవల కాలంలో వచ్చిన కామెడీ ట్రైలర్లలో ఇది అత్యంత వినోదాత్మకంగా ఉందని పలువురు నెటిజన్లు అభిప్రాయపడుతున్నారు. కొందరు అభిమానులు అయితే ‘ధమాల్’ సిరీస్ మళ్లీ తన పాత మేజిక్ను తిరిగి తీసుకొస్తుందని ఆశాభావం వ్యక్తం చేస్తున్నారు.