Dinner Foods: ఆరోగ్యంగా ఉండాలంటే పోషకాహారం తీసుకోవడం ఎంత ముఖ్యమో, ఆ ఆహారాన్ని ఏ సమయంలో తీసుకుంటున్నామన్నది కూడా అంతే కీలకమని పోషకాహార నిపుణులు చెబుతున్నారు. పగటిపూట శరీరం చురుకుగా ఉండటంతో జీర్ణక్రియ కూడా వేగంగా జరుగుతుంది. అయితే రాత్రి సమయానికి జీర్ణక్రియ సహజంగానే నెమ్మదిస్తుంది. ఈ కారణంగా కొన్ని ఆరోగ్యకరమైన ఆహారాలు కూడా రాత్రి భోజనంలో తీసుకుంటే ఉబ్బరం, అజీర్ణం, అసౌకర్యం, నిద్రకు అంతరాయం వంటి సమస్యలు తలెత్తే అవకాశం ఉందని పోషకాహార నిపుణులు పేర్కొన్నారు.
1. పాలకూర
పాలకూరలో ఫైబర్, ఐరన్ పుష్కలంగా ఉంటాయి. ఇవి ఆరోగ్యానికి ఎంతో మేలు చేస్తాయి. అయితే రాత్రి జీర్ణక్రియ మందగించిన సమయంలో పాలకూరలోని ఫైబర్, ఐరన్ను జీర్ణం చేయడానికి శరీరానికి ఎక్కువ సమయం పట్టవచ్చు. దీంతో కొందరికి కడుపు బరువుగా అనిపించడం లేదా అసౌకర్యం కలిగే అవకాశం ఉందని తెలిపారు.
2. పండ్లు, పండ్ల రసాలు
పండ్లు ఆరోగ్యానికి మంచివే అయినప్పటికీ, వాటిలో ఉండే సహజ చక్కెరలను రాత్రి సమయంలో శరీరం సమర్థంగా జీర్ణం చేయడం కొందరిలో కష్టమవుతుందని నిపుణురాలు చెబుతున్నారు. దీంతో ఉబ్బరం, అసౌకర్యం ఏర్పడి నిద్ర నాణ్యతపై ప్రభావం పడే అవకాశం ఉంది.
3. పచ్చి దోసకాయ, బీట్రూట్
పచ్చిగా తీసుకునే దోసకాయ, బీట్రూట్ను “శరీరాన్ని చల్లబరిచే ఆహారాలు”గా భావిస్తారు. రాత్రి సమయంలో వీటిని తీసుకోవడం వల్ల శరీరంలో ఉష్ణోత్పత్తి (థర్మోజెనెసిస్) తగ్గి, జీర్ణక్రియ పనితీరు మందగించే అవకాశం ఉందని అభిప్రాయపడ్డారు.
4. మొలకెత్తిన గింజలు
మొలకెత్తిన గింజల్లో ఫైబర్, పోషకాలు అధికంగా ఉంటాయి. అయితే వాటిని పచ్చిగా తినడం వల్ల జీర్ణవ్యవస్థపై ఎక్కువ భారం పడుతుంది. ముఖ్యంగా రాత్రిపూట ఇవి తింటే గ్యాస్, ఉబ్బరం, అజీర్ణం వంటి సమస్యలు వచ్చే అవకాశం ఉందని సూచించారు.
5. పెరుగు
పెరుగు రోజువారీ ఆహారంలో ముఖ్యమైనదే అయినప్పటికీ, రాత్రి భోజనంలో దానిని తీసుకోవద్దని నిపుణులు సూచిస్తున్నారు. పెరుగులోని చల్లదన స్వభావం కొందరిలో శ్లేష్మం (మ్యూకస్) పెరగడానికి దోహదపడవచ్చని, అలాగే రాత్రి జీర్ణక్రియకు అనుకూలంగా ఉండకపోవచ్చని అభిప్రాయపడ్డారు.
భోజనం చేసే సమయం కూడా కీలకమే
ఆరోగ్యకరమైన ఆహారం తీసుకోవడం మాత్రమే కాదు, దాన్ని సరైన సమయంలో తీసుకోవడం కూడా ముఖ్యమని పోషకాహార నిపుణులు చెబుతున్నారు. అయితే ప్రతి ఒక్కరి శరీర తీరు, ఆరోగ్య పరిస్థితి, జీర్ణశక్తి వేర్వేరుగా ఉంటాయి. కాబట్టి ఈ సూచనలు అందరికీ ఒకే విధంగా వర్తించకపోవచ్చు. తరచూ అజీర్ణం, ఉబ్బరం లేదా నిద్ర సమస్యలు ఉంటే వైద్యుడు లేదా అర్హత కలిగిన పోషకాహార నిపుణుడిని సంప్రదించి వ్యక్తిగత సలహాలు తీసుకోవడం మంచిది.