దేశంలోనే అత్యున్నత బ్యాంకింగ్ సంస్థ అయిన రిజర్వ్ బ్యాంక్ ఆఫ్ ఇండియా (RBI), యువతకు ఒక అద్భుతమైన సువర్ణావకాశాన్ని ప్రకటిస్తూ వివిధ రకాల పాలసీ, టెక్నాలజీ, రీసెర్చ్, ఫైనాన్షియల్ విభాగాల్లో పనిచేయడానికి 12 యంగ్ ప్రొఫెషనల్ ఉద్యోగాల కోసం ఆన్లైన్ దరఖాస్తులను ఆహ్వానిస్తోంది. ఈ ఉద్యోగాలకు ఎంపికైన అభ్యర్థులకు నెలకు అక్షరాలా రూ. 1.5 లక్షల భారీ స్టైపెండ్ లభిస్తుంది. ఈ నియామకం ద్వారా ముంబైలోని ఆర్బీఐ సెంట్రల్ ఆఫీస్ డివిజన్లలో స్వల్పకాలిక మరియు మధ్యకాలిక విధానపరమైన ప్రాజెక్టులపై నేరుగా పనిచేసే అరుదైన అవకాశం లభిస్తుంది. ఈ ఉద్యోగాలకు దరఖాస్తు చేసుకోవడానికి జూలై 6, 2026 చివరి తేదీగా నిర్ణయించారు.
మొత్తం అందుబాటులో ఉన్న 12 పోస్టులలో సైబర్ సెక్యూరిటీ అండ్ ఐటీ రిస్క్, పాలసీ అనలిటిక్స్ , క్లైమేట్ చేంజ్ రిస్క్ అండ్ సస్టైనబుల్ ఫైనాన్స్, క్రెడిట్ రిస్క్ అనలిటిక్స్ అండ్ రెగ్యులేటరీ పాలసీ, పేమెంట్ ఎకోసిస్టమ్, డొమెస్టిక్ అండ్ క్రాస్-బార్డర్ పేమెంట్ సిస్టమ్స్, ఆర్టిఫిషియల్ ఇంటెలిజెన్స్ (AI), క్వాంటం టెక్నాలజీ, డేటా అనలిటిక్స్ మరియు పాలసీ రీసెర్చ్ వంటి విభాగాలు ఉన్నాయి.
ఈ ఉద్యోగాలకు పోస్టుల వారీగా ప్రత్యేక అర్హతలు అవసరం. సైబర్ సెక్యూరిటీ, ఐటీ రిస్క్ మరియు ఆర్టిఫిషియల్ ఇంటెలిజెన్స్ పోస్టులకు కంప్యూటర్ సైన్స్, ఐటీ, డేటా సైన్స్ లేదా ఏఐ లో పీజీ/టెక్నికల్ డిగ్రీ కలిగి ఉండాలి. పాలసీ అనలిటిక్స్ కోసం స్టాటిస్టిక్స్/డేటా సైన్స్లో మాస్టర్స్ లేదా కంప్యూటర్ సైన్స్/ఐటీలో బిఇ/బిటెక్ చదివి ఉండాలి.
క్లైమేట్ చేంజ్ రిస్క్ మరియు క్రెడిట్ రిస్క్ అనలిటిక్స్ విభాగాలకు ఎన్విరాన్మెంటల్ సైన్స్, ఎకనామిక్స్, స్టాటిస్టిక్స్, ఫైనాన్స్ లేదా మ్యాథ్స్ వంటి క్వాంటిటేటివ్ సబ్జెక్టులలో మాస్టర్స్ డిగ్రీ అవసరం. ఇక పేమెంట్ ఎకోసిస్టమ్స్ మరియు క్రాస్-బార్డర్ పేమెంట్స్ పోస్టులకు ఎకనామిక్స్, కామర్స్, పబ్లిక్ పాలసీలో పీజీ లేదా బిఈ/బిటెక్ లేదా చార్టర్డ్ అకౌంటెంట్ (CA) అర్హత ఉండాలి.
పాలసీ అండ్ రీసెర్చ్ కు ఎకనామిక్స్ లో మాస్టర్స్ లేదా పీహెచ్డీతో పాటు పీజీలో మ్యాథ్స్/స్టాటిస్టిక్స్ చదివి ఉండాలి. క్వాంటం టెక్నాలజీకి క్వాంటం కంప్యూటింగ్, ఫిజిక్స్ లేదా ఎలక్ట్రానిక్స్ లో డిగ్రీ ఉండాలి. ఎంపికైన వారికి ముంబైలోనే పోస్టింగ్ ఉంటుంది, కేవలం రూ. 1.5 లక్షల ఫిక్స్డ్ స్టైపెండ్ మాత్రమే లభిస్తుంది.. ఇతర అలవెన్సులు ఏవీ ఉండవు.