Government Jobs: ప్రభుత్వ ఉద్యోగం కోసం ఎదురుచూస్తున్న యువతకు ఈ వారం మంచి అవకాశం దక్కింది. దేశంలోని నాలుగు ప్రధాన విభాగాల్లో మొత్తం 7,390 పోస్టుల భర్తీకి నోటిఫికేషన్లు వచ్చాయి. టెన్త్, ఐటీఐ చదివిన వారి నుంచి డిగ్రీ, పీజీ, ఇంజనీరింగ్ పట్టభద్రుల వరకు అందరూ వీటికి దరఖాస్తు చేసుకోవచ్చు. ముఖ్యంగా కొన్ని పోస్టులకు నెలకు రూ. 2 లక్షలకు పైగా జీతం ఉండటం విశేషం. ఏ విభాగంలో ఎన్ని ఖాళీలు ఉన్నాయి, అర్హతలు ఏంటి, చివరి తేదీ ఎప్పుడో వివరంగా చూద్దాం.
ముందుగా రైల్వే శాఖలో పనిచేయాలనుకునే వారికి గోల్డెన్ ఛాన్స్ లాంటి అవకాశం వచ్చింది. నార్తర్న్ రైల్వే పరిధిలో 4,652 అప్రెంటిస్ ఖాళీలను భర్తీ చేస్తున్నారు. దీనికి ఎలాంటి రాత పరీక్ష ఉండదు, టెన్త్, ఐటీఐ మార్కుల మెరిట్ ఆధారంగానే ఎంపిక చేస్తారు. పదో తరగతితో పాటు సంబంధిత ట్రేడ్‌లో ఐటీఐ పాసైన 24 ఏళ్ల లోపు యువత ఈ పోస్ట్‌లకు అప్లై చేసుకోవచ్చు. ఎంపికైన వారికి రైల్వే రూల్స్ ప్రకారం నెలసరి స్టైపెండ్ ఇస్తారు. నవంబర్ 11న మొదలైన దరఖాస్తు ప్రక్రియ డిసెంబర్ 11 వరకు కొనసాగుతుంది. ఆసక్తి ఉన్నవారు rrcnr.org వెబ్‌సైట్‌లో అప్లై చేసుకోవచ్చు.
వ్యవసాయ శాస్త్రవేత్తల నియామక మండలి (ASRB) కూడా 1,393 పోస్టుల భర్తీకి ప్రకటన విడుదల చేసింది. సంబంధిత సబ్జెక్టులో డిగ్రీ, బీఎఫ్‌ఎస్‌సీ (BFSc), బీఈ లేదా బీటెక్ పూర్తి చేసిన 30 ఏళ్ల లోపు అభ్యర్థులు వీటికి అర్హులు. కంప్యూటర్ ఆధారిత పరీక్ష ద్వారా ఎంపిక చేస్తారు. ఉద్యోగం వచ్చిన వారికి నెలకు రూ. 29,200 నుంచి రూ. 1,12,400 వరకు జీతం అందుతుంది. నవంబర్ 18 నుంచి డిసెంబర్ 17 వరకు asrb.gov.in వెబ్‌సైట్ ద్వారా దరఖాస్తు చేసుకోవచ్చు.
అలాగే ఢిల్లీ సబార్డినేట్ సర్వీసెస్ సెలక్షన్ బోర్డ్ (DSSSB) పరిధిలో జూనియర్ ఇంజనీర్ (JE), ఇతర విభాగాల్లో 1,260 ఖాళీలు ఉన్నాయి. టెన్త్‌తో పాటు ఐటీఐ లేదా సంబంధిత సాంకేతిక అర్హతలు ఉండి, 32 ఏళ్ల లోపు వయస్సు ఉన్నవారు అర్హులు. టైర్-1, టైర్-2 పరీక్షలు, సర్టిఫికెట్ల పరిశీలన, మెడికల్ టెస్ట్ ఆధారంగా ఎంపిక ఉంటుంది. పోస్టును బట్టి నెలకు రూ. 8,000 నుంచి రూ. 1,51,100 వరకు జీతం వస్తుంది. నవంబర్ 12న మొదలైన దరఖాస్తులకు డిసెంబర్ 11 చివరి తేదీ. అభ్యర్థులు dsssb.delhi.gov.in సైట్‌లో అప్లై చేయాలి.
చివరగా, ఢిల్లీలోని జామియా మిలియా ఇస్లామియా విశ్వవిద్యాలయంలో అప్పర్ డివిజన్ క్లర్క్ (UDC) సహా 85 నాన్-టీచింగ్ పోస్టులకు నోటిఫికేషన్ వచ్చింది. పోస్టును బట్టి ఇంటర్, డిగ్రీ లేదా పీజీ పూర్తి చేసిన 40 ఏళ్ల లోపు వారు దరఖాస్తు చేసుకోవచ్చు. రాత పరీక్ష, స్కిల్ టెస్ట్, ఇంటర్వ్యూ, మెడికల్ టెస్ట్ ద్వారా ఎంపికైన వారికి నెలకు రూ. 18,000 నుంచి ఏకంగా రూ. 2,15,900 వరకు జీతం లభిస్తుంది. నవంబర్ 12 నుంచి డిసెంబర్ 11 వరకు jmi.ac.in వెబ్‌సైట్‌లో అప్లై చేసుకోవచ్చు. చివరి రోజు వరకు ఆగకుండా, ముందే పూర్తి వివరాలు చదువుకుని అప్లై చేసుకోవడం మంచిది.