Best FD Interest Rates August 2026: ఇప్పుడు పొదుపు చేయండి.. రేపు లాభాలు పొందండి.. అంతేకాదు.. డబ్బులను దాచుకొండి.. మీకు శరీరం, ఆరోగ్యం సహకరించని సమయంలో.. అవి మీకు తోడుపాటు అందిస్తాయి.. ఇక, ఫిక్స్డ్ డిపాజిట్లు (FDలు) భారతీయులలో అత్యంత ప్రజాదరణ పొందిన పెట్టుబడి మార్గాల్లో ఒకటి. ముఖ్యంగా సీనియర్ సిటిజన్లు మార్కెట్ హెచ్చుతగ్గులతో సంబంధం లేని స్థిరమైన రాబడిని కోరుకోవడంతో FDలకు ప్రాధాన్యం ఇస్తుంటారు. ప్రస్తుతం పలు స్మాల్ ఫైనాన్స్ బ్యాంకులు ఎంపిక చేసిన కాలపరిమితులపై 8 శాతానికి పైగా వడ్డీని అందిస్తున్నాయి. కొన్ని బ్యాంకుల్లో సీనియర్ సిటిజన్లకు 8.50 శాతం వరకు వడ్డీ లభిస్తోంది.
సీనియర్ సిటిజన్లకు FDలు ఎందుకు ఆకర్షణీయంగా ఉంటాయి?
FDల్లో ముందుగానే నిర్ణయించిన వడ్డీ రేటు ప్రకారం రాబడి లభిస్తుంది. దీంతో మార్కెట్ ఆధారిత పెట్టుబడుల్లో కనిపించే ధరల హెచ్చుతగ్గులు, రాబడుల అనిశ్చితి ఉండదు. ముఖ్యంగా పదవీ విరమణ తర్వాత స్థిరమైన వడ్డీ ఆదాయాన్ని కోరుకునే వారికి FDలు ఉపయోగకరంగా ఉంటాయి. సాధారణ కస్టమర్లతో పోలిస్తే చాలా బ్యాంకులు సీనియర్, సూపర్ సీనియర్ సిటిజన్లకు అదనపు వడ్డీ ప్రయోజనాలను అందిస్తున్నాయి. అయితే ఈ ప్రయోజనం డిపాజిట్ కాలవ్యవధిని బట్టి మారుతుంది.
8.50% వరకు వడ్డీ అందిస్తున్న స్మాల్ ఫైనాన్స్ బ్యాంకులు
ఆగస్టు 2026లో FD వడ్డీ రేట్ల విషయంలో స్మాల్ ఫైనాన్స్ బ్యాంకులు ఆకర్షణీయమైన రాబడులను అందిస్తున్నాయి. శివాలిక్ స్మాల్ ఫైనాన్స్ బ్యాంక్ ఎంపిక చేసిన కాలపరిమితిపై సీనియర్ సిటిజన్లకు అత్యధికంగా 8.50 శాతం వడ్డీ అందిస్తోంది.. శివాలిక్ స్మాల్ ఫైనాన్స్ బ్యాంక్లో 23 నెలల 1 రోజు నుంచి 27 నెలల కాలపరిమితి గల FDలకు సాధారణ కస్టమర్లకు 8.00 శాతం, సీనియర్ సిటిజన్లకు 8.50 శాతం వరకు వడ్డీ లభిస్తోంది. జన స్మాల్ ఫైనాన్స్ బ్యాంక్ 2 నుంచి 3 సంవత్సరాల FDలపై 8.30 శాతం వరకు వడ్డీ అందిస్తోంది. యూనిటీ స్మాల్ ఫైనాన్స్ బ్యాంక్ 501 రోజుల FDపై 8.30 శాతం, సూర్యోదయ స్మాల్ ఫైనాన్స్ బ్యాంక్ 30 నెలల FDపై 8.25 శాతం వడ్డీ అందిస్తున్నాయి. అలాగే ఉత్కర్ష్ స్మాల్ ఫైనాన్స్ బ్యాంక్ 666 రోజుల FDపై 8.25 శాతం, ఈక్విటాస్ స్మాల్ ఫైనాన్స్ బ్యాంక్ 3 సంవత్సరాల 1 రోజు FDపై 8.24 శాతం వరకు వడ్డీని అందిస్తున్నాయి.
పెద్ద బ్యాంకుల్లో FD వడ్డీ ఎంత?
స్మాల్ ఫైనాన్స్ బ్యాంకులతో పోలిస్తే SBI, HDFC బ్యాంక్, ICICI బ్యాంక్ వంటి పెద్ద బ్యాంకుల్లో FD వడ్డీ రేట్లు కొంత తక్కువగా ఉన్నాయి. SBI 2 నుంచి 3 సంవత్సరాల FDలపై సీనియర్ సిటిజన్లకు 6.90 శాతం వడ్డీ అందిస్తోంది. HDFC బ్యాంక్ సుమారు 3 సంవత్సరాల కాలపరిమితి గల FDలపై 7.00 శాతం వరకు వడ్డీ అందిస్తోంది. ICICI బ్యాంక్ 3 సంవత్సరాల 1 రోజు నుంచి 5 సంవత్సరాల కాలపరిమితి గల FDలపై సీనియర్ కస్టమర్లకు 7.10 శాతం వరకు వడ్డీ అందిస్తోంది.
స్మాల్ ఫైనాన్స్ బ్యాంకుల్లో FDలు సురక్షితమేనా?
స్మాల్ ఫైనాన్స్ బ్యాంకులు రిజర్వ్ బ్యాంక్ ఆఫ్ ఇండియా (RBI) నియంత్రణలో పనిచేస్తాయి. డిపాజిట్ ఇన్సూరెన్స్ అండ్ క్రెడిట్ గ్యారంటీ కార్పొరేషన్ (DICGC) డిపాజిట్ ఇన్సూరెన్స్ నిబంధనల ప్రకారం, ఒక బ్యాంకులో ఒక డిపాజిటర్కు అసలు మొత్తం, వడ్డీ కలిపి గరిష్టంగా రూ.5 లక్షల వరకు బీమా రక్షణ ఉంటుంది. అయితే ఇది వర్తించే నిబంధనలు, అర్హతలకు లోబడి ఉంటుంది.
FDలో పెట్టుబడి పెట్టే ముందు ఇవి చూడండి
అధిక వడ్డీ రేటు కనిపించిందని మాత్రమే FDను ఎంచుకోవడం సరైన నిర్ణయం కాదు. ముఖ్యంగా సీనియర్ సిటిజన్లు పెట్టుబడి పెట్టే ముందు బ్యాంకు ఆర్థిక పరిస్థితి, FD కాలపరిమితి, ముందస్తు ఉపసంహరణకు సంబంధించిన నిబంధనలు, జరిమానాలు, వడ్డీ చెల్లింపు విధానం, DICGC బీమా పరిమితి వంటి అంశాలను పరిశీలించాలి. అలాగే ఒకేసారి మొత్తం డబ్బును ఒకే బ్యాంకులో డిపాజిట్ చేయడం కంటే, అవసరాలకు అనుగుణంగా కాలపరిమితులను విభజించడం గురించి కూడా ఆలోచించవచ్చు. పెట్టుబడి నిర్ణయం తీసుకునే ముందు సంబంధిత బ్యాంకుల తాజా FD రేట్లు, నిబంధనలను అధికారికంగా నిర్ధారించుకోవడం మంచిది.