Range Rover SV Sawai Collection Launched: భారత మార్కెట్లో ప్రముఖ లగ్జరీ కార్ల తయారీ సంస్థ ల్యాండ్ రోవర్ (Range Rover) సరికొత్త స్పెషల్ ఎడిషన్ కారును విడుదల చేసింది. రేంజ్ రోవర్ ఎస్వీ సవాయ్ కలెక్షన్ (Range Rover SV Sawai Collection) పేరుతో తీసుకొచ్చిన ఈ లగ్జరీ ఎస్‌యూవీ ప్రారంభ ధరను రూ.4.90 కోట్లుగా (ఎక్స్-షోరూమ్) నిర్ణయించారు. ఈ స్పెషల్ కలెక్షన్‌లో కేవలం 18 కార్లను మాత్రమే విక్రయించనుంది. జైపూర్, జోధ్‌పూర్, జైసల్మేర్ నగరాల సంస్కృతి, నిర్మాణ శైలుల ఆధారంగా మూడు ప్రత్యేక ఎడిషన్లను తీసుకవచ్చారు.
ఈ కలెక్షన్‌లో సవాయ్ జైపూర్, సవాయ్ జోధ్‌పూర్, సవాయ్ జైసల్మేర్ పేర్లతో మూడు వేరియంట్లు ఉన్నాయి. ఒక్కో ఎడిషన్‌లో కేవలం 6 కార్ల చొప్పున మొత్తం 18 యూనిట్లను తయారు చేశారు. మూడు మోడళ్లలోనూ 23 అంగుళాల షాంపైన్ (Champagne) అల్లాయ్ వీల్స్, అట్లాస్ సిల్వర్ ఎక్స్‌టీరియర్ ప్యాక్, 24 క్యారెట్ల బంగారు పూతతో కూడిన రేంజ్ రోవర్ బ్రాండింగ్ ప్రత్యేక ఆకర్షణగా నిలుస్తాయి. ప్రతి కారులో ఎడిషన్ పేరు, ‘1 of 6’ అనే ప్రత్యేక గుర్తింపుతో వ్యక్తిగతీకరించిన ప్లాక్ ఉంటుంది.
సవాయ్ జైపూర్ ఎడిషన్‌ను పింక్ సిటీ జైపూర్ స్ఫూర్తితో రూపొందించారు. రోజ్ కలర్ ఎక్స్‌టీరియర్, ఎక్రూ, డీప్ గార్నెట్ కలర్ ఇంటీరియర్ ఇందులో ఉన్నాయి. హవా మహల్‌లోని జరోఖా డిజైన్ ఆధారంగా సీట్లపై ఎంబ్రాయిడరీ చేశారు. అలాగే సవాయ్ జోధ్‌పూర్ ఎడిషన్ బ్లూ సిటీ ప్రత్యేకతలను కలిగి ఉంది. లేత నీలం రంగు ఎక్స్‌టీరియర్‌తో పాటు పేర్లినో, రివీర థీమ్ ఇంటీరియర్ అందించారు. జోధ్‌పూర్ కోటలు, రాజభవనాల్లో కనిపించే జాలి డిజైన్లను సీట్లపై పొందుపరిచారు. ఇక సవాయ్ జైసల్మేర్ ఎడిషన్ గోల్డెన్ సిటీ స్ఫూర్తితో రూపొందింది. బంగారు రంగు ఎక్స్‌టీరియర్, పెర్లినో, కారవే డ్యూయల్ టోన్ ఇంటీరియర్ ఉన్నాయి. జైసల్మేర్ కోట నిర్మాణ శైలి, సంప్రదాయ బ్లాక్ ప్రింటింగ్ ఆధారంగా సీట్లపై ఎంబ్రాయిడరీ చేశారు.
ఈ 18 కార్లన్నీ లాంగ్ వీల్‌బేస్ రేంజ్ రోవర్ SV ఆధారంగా రూపొందించారు. నాలుగు సీట్ల లేఅవుట్‌తో వస్తాయి. వెనుక సీట్లలో హీటింగ్, కూలింగ్, మసాజ్ సదుపాయాలతో పాటు రిక్లైనింగ్ ఫంక్షన్ అందించారు. వెనుక ప్రయాణికుల కోసం ఎంటర్‌టైన్‌మెంట్ స్క్రీన్లు, ఫోల్డ్ అవుట్ టేబుల్స్ కూడా ఉన్నాయి. ఇక ఇంజిన్ విషయానికి వస్తే.. 4.4 లీటర్ ట్విన్ టర్బో పెట్రోల్ V8 ఇంజిన్‌ను అమర్చారు. ఇది 537hp పవర్, 750Nm టార్క్‌ను ఉత్పత్తి చేస్తుంది. 8 స్పీడ్ ఆటోమేటిక్ గేర్‌బాక్స్‌తో పనిచేస్తుంది. భారతీయ సంస్కృతి, వారసత్వాన్ని ప్రతిబింబించేలా రేంజ్ రోవర్ తీసుకొచ్చిన మూడో ప్రత్యేక కలెక్షన్ ఇది.