BYD Denza D9: చైనా ఎలక్ట్రిక్ వాహనాల దిగ్గజం BYD భారత మార్కెట్లో లగ్జరీ బ్రాండ్ Denzaను అధికారికంగా ప్రవేశపెట్టింది. ఈ సందర్భంగా కంపెనీ Denza D9 ఎలక్ట్రిక్ MPVతో పాటు Denza Z9 GT Shooting Brakeను కూడా భారత మార్కెట్లో పరిచయం చేసింది. వీటిలో అత్యంత ఆకర్షణీయమైన Denza D9 ఒక 7-సీటర్ లగ్జరీ ఎలక్ట్రిక్ MPV. దీని ప్రారంభ ఎక్స్-షోరూమ్ ధర రూ.90 లక్షలుగా నిర్ణయించారు. భారీ బ్యాటరీ, 608 కి.మీ వరకు రేంజ్, ప్రీమియం ఇంటీరియర్, మసాజ్ సీట్లు, 9 ఎయిర్‌బ్యాగ్‌లు వంటి అధునాతన ఫీచర్లతో ఇది లగ్జరీ MPV విభాగంలో కొత్త పోటీని తీసుకురానుంది.
115.07kWh బ్యాటరీ.. 608 కి.మీ వరకు రేంజ్
BYD Denza D9లో రెండో తరం BYD Blade LFP బ్యాటరీను అందించారు. దీని సామర్థ్యం 115.07kWh. ఈ ఎలక్ట్రిక్ MPVలో ముందు భాగంలో అమర్చిన Permanent Magnet Synchronous ఎలక్ట్రిక్ మోటార్ ఉంది. ఈ మోటార్ గరిష్టంగా 462.2bhp పవర్, 365Nm టార్క్ను ఉత్పత్తి చేస్తుంది. ఇందులో ఫ్రంట్-వీల్ డ్రైవ్ (FWD) వ్యవస్థను అందించారు. కంపెనీ ప్రకారం, Denza D9 కేవలం 8.5 సెకన్లలో 0 నుంచి 100 కి.మీ/గంట వేగాన్ని అందుకోగలదు. ఒక్కసారి పూర్తిగా ఛార్జ్ చేస్తే WLTC ప్రమాణాల ప్రకారం 608 కి.మీ వరకు రేంజ్ ఇస్తుందని కంపెనీ పేర్కొంది.
కేవలం 9 నిమిషాల్లో ఫాస్ట్ ఛార్జింగ్?
Denza D9లో 11kW AC త్రీ-ఫేజ్ ఛార్జింగ్ సపోర్ట్ అందించారు. అలాగే DC ఫాస్ట్ ఛార్జింగ్ సదుపాయం కూడా ఉంది. కంపెనీ తెలిపిన వివరాల ప్రకారం, DC ఫాస్ట్ ఛార్జింగ్ ద్వారా బ్యాటరీని 10 నుంచి 97 శాతం వరకు కేవలం 9 నిమిషాల్లో ఛార్జ్ చేయవచ్చని పేర్కొంది. లగ్జరీ ఫీచర్ల విషయంలో కూడా Denza D9 ప్రత్యేకంగా నిలుస్తుంది. ఇందులో..
15.6 అంగుళాల ఫ్లోటింగ్ సెంట్రల్ టచ్‌స్క్రీన్
10.25 అంగుళాల ఫుల్ LCD ఇన్‌స్ట్రుమెంట్ క్లస్టర్
రెండో వరుస ప్రయాణికుల కోసం ప్రత్యేక ఆర్మ్‌రెస్ట్ స్క్రీన్లు
16-స్పీకర్ Devialet ఆడియో సిస్టమ్
త్రీ-జోన్ ఆటోమేటిక్ క్లైమేట్ కంట్రోల్
ఇన్‌బిల్ట్ రిఫ్రిజిరేటర్
వంటి ప్రీమియం ఫీచర్లు ఉన్నాయి.
Denza D9లో 2+2+3 సీటింగ్ లేఅవుట్ ను అందించారు. అంటే మొత్తం ఏడుగురు ప్రయాణించవచ్చు. ఈ MPV పొడవు 5,250mm, వెడల్పు 1,960mm, ఎత్తు 1,900mm. దీని వీల్‌బేస్ 3,110mmగా ఉంది. భారీ పరిమాణం ఉన్నప్పటికీ, లగ్జరీ ప్రయాణ అనుభూతిపై కంపెనీ ప్రత్యేక దృష్టి పెట్టింది. రెండో వరుసలో ప్రత్యేకంగా రూపొందించిన క్యాప్టన్ సీట్లు ఉన్నాయి. వీటిలో 10-వే పవర్ అడ్జస్ట్‌మెంట్, 10-పాయింట్ మసాజ్ ఫంక్షన్, హీటింగ్, వెంటిలేషన్, మెమరీ ఫంక్షన్, పవర్ అడ్జస్టబుల్ లెగ్ రెస్ట్ వంటి సదుపాయాలు ఉన్నాయి.
ముందు సీట్లలో కూడా పవర్ అడ్జస్ట్‌మెంట్, హీటింగ్, వెంటిలేషన్, మసాజ్, మెమరీ ఫంక్షన్లు అందించారు. ఈ లగ్జరీ ఎలక్ట్రిక్ MPVలో 1.1 చదరపు మీటర్ల పానోరమిక్ గ్లాస్ రూఫ్, సన్‌షేడ్, మల్టీ-కలర్ అంబియంట్ లైటింగ్ వంటి ఫీచర్లు ఉన్నాయి. అదనంగా నాలుగు చోట్ల 50W వైర్‌లెస్ ఛార్జింగ్, Apple CarPlay, Android Auto, ఆరు USB పోర్టులు వంటి కనెక్టివిటీ ఫీచర్లు కూడా అందించారు.
భద్రత విషయంలో కూడా BYD Denza D9లో పలు అధునాతన ఫీచర్లను అందించారు. ఇందులో మొత్తం 9 ఎయిర్‌బ్యాగ్‌లు ఉన్నాయి. వీటిలో ఫుల్-లెంగ్త్ సైడ్ కర్టెన్ ఎయిర్‌బ్యాగ్‌లు, ఫ్రంట్ సెంటర్ ఎయిర్‌బ్యాగ్ కూడా ఉన్నాయి. అలాగే ఇందులో హై-స్ట్రెంగ్త్ సేఫ్టీ బాడీ స్ట్రక్చర్, DiSus-C ఇంటెలిజెంట్ డ్యాంపింగ్ సస్పెన్షన్, అడాప్టివ్ క్రూయిజ్ కంట్రోల్, ఫార్వర్డ్ కొలిజన్ వార్నింగ్, ఆటోమేటిక్ ఎమర్జెన్సీ బ్రేకింగ్, బ్లైండ్ స్పాట్ డిటెక్షన్, రియర్ క్రాస్-ట్రాఫిక్ అలర్ట్, ఎమర్జెన్సీ లేన్-కీపింగ్ అసిస్ట్ వంటి ADAS భద్రతా ఫీచర్లు ఉన్నాయి.
Toyota Vellfire, Lexus LMలకు పోటీ
భారత లగ్జరీ MPV మార్కెట్లో BYD Denza D9 ప్రధానంగా Toyota Vellfire, Lexus LM వంటి ప్రీమియం వాహనాలకు పోటీగా నిలవనుంది. రూ.90 లక్షల ఎక్స్-షోరూమ్ ధర, 608 కి.మీ వరకు ఎలక్ట్రిక్ రేంజ్, అత్యంత విలాసవంతమైన క్యాబిన్, మసాజ్ క్యాప్టన్ సీట్లు, ఆధునిక భద్రతా ఫీచర్లతో Denza D9 భారత లగ్జరీ ఎలక్ట్రిక్ వాహన మార్కెట్లో కొత్త ప్రత్యామ్నాయంగా నిలవనుంది.