ప్రజాప్రతినిధుల వేతనాల పెంపుపై తెలంగాణ సర్కారు యూటర్న్

తెలంగాణలో ఎమ్మెల్సీ ఎన్నికల కోడ్ అమల్లోకి రావడంతో కేసీఆర్ ప్రభుత్వం కీలక నిర్ణయం తీసుకుంది. ఇటీవల స్థానిక సంస్థల ప్రజాప్రతినిధుల గౌరవ వేతనం పెంచుతూ తీసుకున్న నిర్ణయాన్ని తాజాగా ప్రభుత్వం ఉపసంహరించుకుంది. ఈ మేరకు కొత్త ఉత్తర్వులు జారీ చేసింది. ఎన్నికల కోడ్ అమల్లో ఉండటంతో ప్రభుత్వం ఎలాంటి జీవో విడుదల చేయడానికి వీల్లేదు. దీంతో తెలంగాణ ప్రభుత్వం యూటర్న్ తీసుకుంది. కాగా ఒకవేళ ప్రభుత్వం తన నిర్ణయాన్ని ఉపసంహరించుకోకుంటే స్థానిక సంస్థల ప్రజాప్రతినిధులకు 30 శాతం వేతనాలు పెరిగే అవకాశముండేది.

Read Also: పంజాబ్‌కు ఓ న్యాయం.. తెలంగాణకు మరో న్యాయమా?: హరీష్ రావు

జీహెచ్ఎంసీ, ఇతర నగరపాలక సంస్థల మేయర్ల నెలసరి వేతనం రూ.50 వేల నుంచి రూ.65 వేలు… డిప్యూటీ మేయర్ల వేతనం నెలకు రూ.25 వేల నుంచి రూ.32,500కు పెంచుతూ గతంలో ఉత్తర్వులు జారీ అయ్యాయి. 50 వేల జనాభా దాటిన మున్సిపాలిటీల చైర్ పర్సన్లకు రూ.15 వేల నుంచి రూ.19,500… డిప్యూటీ ఛైర్ పర్సన్లకు రూ.7,500 నుంచి రూ.9,750… కౌన్సిలర్లకు రూ.3,500 నుంచి రూ.4,550 పెంచుతున్నట్టు ఇటీవల విడుదల చేసిన ఉత్తర్వుల్లో ప్రభుత్వం పేర్కొంది. 50 వేల కంటే తక్కువ జనాభా ఉన్న మున్సిపాలిటీల ఛైర్ పర్సన్లకు రూ.12 వేల నుంచి రూ.15,600… డిప్యూటీ చైర్ పర్సన్ల వేతనం రూ.5 వేల నుంచి రూ.6,500… కౌన్సిలర్లకు రూ.2,500 నుంచి రూ.3,250 పెంచారు. అయితే ఎన్నికల కోడ్ కారణంగా ఇప్పుడు వేతనాల పెంపు అమలుకు బ్రేక్ పడింది. ఈ క్రమంలో ప్రజాప్రతినిధుల గౌరవ వేతనం పెంపుపై అనుమతులు ఇవ్వాలంటూ కేంద్ర ఎన్నికల సంఘాన్ని తెలంగాణ సర్కారు కోరినట్టు సమాచారం. ఈసీ నిర్ణయం కోసం ప్రభుత్వం వేచి చూస్తోంది.

Related Articles

Latest Articles