గ్రూప్ పరీక్షలకే కమిషన్ ను పరిమితం చేస్తారా ..?

గ్రూప్ పరీక్షలకే కమిషన్ ను పరిమితం చేస్తారా ..?

TSPSCకి ప్రాధాన్యం తగ్గిస్తున్నారా? ఉద్యోగాల భర్తీకి ప్రభుత్వశాఖలు తీసుకుంటున్న చర్యలు దేనికి సంకేతం? పబ్లిక్‌ సర్వీస్‌ కమిషన్‌పై జరుగుతోన్న చర్చ ఏంటి? 

సెలక్షన్‌ కమిటీలు రద్దు చేసి టీఎస్పీఎస్సీకి బాధ్యతలు ఇచ్చారు!

తెలంగాణలో ఉద్యోగాల భర్తీ అంటే ఠక్కున గుర్తుకు వచ్చేది పబ్లిక్ సర్వీస్ కమిషనే. ఉద్యోగ నియామకం ఏదైనా TSPSC ద్వారానే అని గతంలో సీఎం చెప్పారు. నియామక ప్రక్రియ పారదర్శకంగా జరగడానికి అదే కరెక్ట్‌ అని తేల్చారు కూడా. ఉద్యోగాల భర్తీ బాధ్యతలు సర్వీస్ కమిషన్‌కి ఆయా ప్రభుత్వ శాఖలు అప్పగించాయి. అప్పటి వరకు డిపార్ట్‌మెంట్‌ సెలక్షన్ కమిటీ, డిస్ట్రిక్ట్ సెలక్షన్ కమిటీల ద్వారా భర్తీ చేసే ఉద్యోగాల నియామక బాధ్యతలను కూడా ఆయా శాఖలు TSPSCకి అప్పగించాయి. గురుకుల సొసైటీలలో ఉపాధ్యాయులు.. వైద్యశాఖలోని ఉద్యోగాల భర్తీ బాధ్యతలు కూడా కమిషన్‌కే ఇచ్చారు. 

కమిషన్‌కు ప్రాధాన్యం తగ్గిస్తున్నారా?
డీఎస్సీ ద్వారానే టీచర్ల భర్తీ!

ఏమైందో ఏమో చిన్నచిన్న కారణాలతో నియామక ప్రక్రియ ఆలస్యం కావడంతో ప్రభుత్వ పెద్దలు అసంతృప్తికి లోనయ్యారట. అప్పటి నుంచి ఆ సంస్థకు ప్రాధాన్యం తగ్గిస్తూ వచ్చినట్టు చెబుతున్నారు. పోస్టుల భర్తీని అప్పగించడం లేదు. గురుకులాల్లో రిక్రూట్‌మెంట్ బోర్డు ఏర్పాటు చేశారు. భవిష్యత్‌లోనూ ఈ బోర్డు ద్వారానే నియామకాలు జరుగుతాయట. వైద్యశాఖకు సంబంధించి కమిషన్‌కు ఇచ్చిన పోస్టుల భర్తీని వెనక్కి తీసుకున్నారట. ఇక్కడ కూడా నియామకాలను వైద్యశాఖే చెపడుతుందని సమాచారం. ఇప్పుడు ఉపాధ్యాయుల భర్తీని TSPSCకి అప్పగించే ఆలోచనలో ప్రభుత్వం లేదని తెలుస్తోంది. DSC ద్వారానే టీచర్‌ పోస్టుల భర్తీ ఉంటుందని ఇటీవల అసెంబ్లీలో మంత్రి సబితా ఇంద్రారెడ్డి ప్రకటించారు. 

మళ్లీ సెలక్షన్‌ కమిటీల ద్వారా నియామకాలు?
గ్రూప్‌ పోస్టులకే పరిమితం? 

ఇక ప్రభుత్వ ఉద్యోగాల్లో ఎక్కువగా డిపార్ట్‌మెంటల్ సెలక్షన్ కమిటీలు, జిల్లా సెలక్షన్ కమిటీల ద్వారానే ఆయా శాఖలు ఖాళీలను భర్తీ చేసుకునే అవకాశం ఉందట. ప్రభుత్వం భర్తీ చేస్తామని చెప్పిన 50 వేల ఉద్యోగాల్లో TSPSC ద్వారా భర్తీ చేసేవి పెద్దగా ఉండక పోవచ్చనే అభిప్రాయం వ్యక్తం అవుతోంది. గ్రూప్ 1 ,గ్రూప్ 2 లాంటి పోస్ట్‌లకే కమిషన్‌ను పరిమితం చేస్తారని అనుకుంటున్నారు. 

కమిషన్‌లో ప్రస్తుతం ఒక్కరే సభ్యుడు..ఆయనే ఛైర్మన్‌!

ఈ కారణంగానే TSPSC ఛైర్మన్‌, సభ్యుల నియామకంపై ప్రభుత్వం పెద్దగా ఆసక్తి చూపడం లేదని భావిస్తున్నారు. ఛైర్మన్‌ పదవీకాలం పూర్తయ్యి మూడున్నర నెలలు అవుతున్నా.. ఆ దిశగా కసరత్తు మొదలుపెట్టకపోవడాన్ని ప్రత్యేకంగా ప్రస్తావిస్తున్నారు. ప్రస్తుతం కమిషన్‌లో  ప్రొఫెసర్‌ సాయిలు ఒక్కరే సభ్యుడు మిగిలారు. ఆయనే సభ్యుడు.. ఆయనే ఛైర్మన్‌. మరి బయట జరుగుతున్న ప్రచారం నిజమవుతుందో.. TSPSCని మళ్లీ పట్టాలెక్కిస్తారో చూడాలి.