పార్టీ అధిష్టానానికి ముఖం చాటేసి తిరుగుతున్న టీఆర్ఎస్ ఎమ్మెల్యేలు..?

పార్టీ అధిష్టానానికి ముఖం చాటేసి తిరుగుతున్న టీఆర్ఎస్ ఎమ్మెల్యేలు..?

గ్రేటర్ హైదరాబాద్ పరిధిలోని కొందరు టీఆర్‌ఎస్‌ ఎమ్మెల్యేల పరిస్థితి మింగలేక..కక్కలేక అన్నట్టుగా ఉందా? పార్టీ అధిష్ఠానానికి ముఖం చాటేసి తిరుగుతున్నారా? ప్రజల్లోకి రావడానికి కూడా వారికి ముఖం చెల్లడం లేదా? అధికార పార్టీ ఎమ్మెల్యేలకు ఎందుకీ దుస్థితి? లెట్స్‌ వాచ్‌!

పార్టీ పెద్దలకు ముఖం చాటేస్తున్న ఎమ్మెల్యేలు!

బల్దియా ఎన్నికల్లో ఓటర్లు ఇచ్చిన షాక్ నుంచి ఇంకా కొంతమంది ఎమ్మెల్యేలు తెరుకోలేదు. ఎన్నికల ప్రక్రియ ముగిసి నెలరోజులు అవుతున్నా.. ప్రజాక్షేత్రంలో పెద్దగా కనిపించడం లేదు. ముఖ్యంగా టీఆర్ఎస్ అధిష్ఠానానికి కూడా సదరు ఎమ్మెల్యేలు ముఖం చాటేస్తున్నట్టుగా నియోజకవర్గాల్లో చర్చ జరుగుతోంది. దీని వెనక ఉన్న కారణాలు ఆరా తీసేవారు కొందరైతే.. విషయం తెలుసుకుని నివ్వెర పోతున్నవారు మరికొందరు. 

బల్దియా సమరంలో చతికిలపడ్డ మంత్రులు!

నగర పరిధిలోని మంత్రులు సబితా ఇంద్రారెడ్డి, తలసాని శ్రీనివాసయాదవ్‌, మహమూద్‌ అలీలకు GHMC ఎన్నికలు అసంతృప్తినే మిగిల్చాయి. మహేశ్వరం నియోజకవర్గంలోని రెండు డివిజన్లలోనూ టీఆర్‌ఎస్‌ అభ్యర్థులు ఓడిపోవడంతో మంత్రి సబిత ఇబ్బందిపడుతున్నారట. మరో మంత్రి తలసాని శ్రీనివాసయాదవ్‌ అయితే తన నియోజకవర్గంలో సగం సీట్లతోనే సరిపెట్టుకోవాల్సి వచ్చింది. రాజేంద్రనగర్‌ సెగ్మెంట్‌లో ఇంఛార్జ్‌గా వ్యవహరించిన మంత్రి మహమూద్‌ అలీ కూడా బల్దియా సమరంలో చతికిలపడ్డారు. మొత్తం ఐదు డివిజన్లలో ప్రత్యర్థి పార్టీలతే గెలిచాయి. 

ఓటమి షాక్‌ నుంచి ఇంకా తేరుకోని ఎమ్మెల్యేలు!

మంత్రులు జగదీశ్వర్‌రెడ్డి, గంగుల కమలాకర్‌, నిరంజన్‌రెడ్డి, ఈటల రాజేందర్‌ ప్రచారం చేసిన డివిజన్లలోనూ టీఆర్‌ఎస్‌కు ఆశించిన ఫలితాలు రాలేదు. పటాన్‌చెరు నియోజకవర్గంలోని మూడు డివిజన్లలోని బాధ్యతలు చూసిన మంత్రి హరీష్‌రావు మాత్రం గులాబీ జెండా రెపరెపలాడించారు. దీంతో గ్రేటర్‌ ఎన్నికలకు మంత్రులకు షాక్‌ ఇవ్వగా.. పలువురు ఎమ్మెల్యేలు ఆ షాక్‌ నుంచి ఇంకా తేరుకోలేదని చెబుతున్నారు. 

ఉప్పల్‌ పరిధిలో ఒక్క సీటుకే పరిమితం!

ఉప్పల్‌ సర్కిల్‌ పరిధిలో ఉన్న 4 టీఆర్‌ఎస్‌ సీట్లలో ఒకదాన్ని మాత్రమే పార్టీ తిరిగి దక్కించుకోగలిగింది. ఎమ్మెల్యే భేతి సుభాష్‌రెడ్డి భార్య భేతి స్వప్న హబ్సీగూడ డివిజన్‌ నుంచి పోటీ చేసి ఓడిపోయారు. ఎమ్మెల్యే ఇతర డివిజన్లలో ప్రచారం చేయకపోవడం.. వరదలతో హబ్సీగూడ, రామంతాపూర్, ఉప్పల్‌లోని కాలనీలు మునిగిపోవడంతో అధికార పార్టీపై తీవ్ర వ్యతిరేకత వచ్చింది. వెరసి ఉప్పల్‌ సర్కిల్‌లో టీఆర్‌ఎస్‌ కేవలం ఒక్క సీటుకే పరిమితమైంది.


న్యూ ఇయర్‌ గ్రీటింగ్స్‌ చెప్పడానికి రాని ఎమ్మెల్యేలు?

మాజీ మంత్రి, దివంగత నేత నాయిని నర్సింహారెడ్డి వారసుడిగా రాంనగర్‌ డివిజన్‌ నుంచి తొలిసారి బరిలోకి దిగిన ఆయన అల్లుడు శ్రీనివాసరెడ్డి సైతం ఓడిపోయారు. సీనియర్‌ నేత, కంటోన్మెంట్‌ ఎమ్మెల్యే సాయన్న కుమార్తె లాస్య నందిత కవాడిగూడ డివిజన్‌లో సక్సెస్‌ కాలేదు. ముషీరాబాద్‌ ఎమ్మెల్యే ముఠా గోపాల్‌ మరదలు పద్మ గాంధీనగర్‌ డివిజన్‌లో పోటీ చేసి గెలవలేకపోయారు. ఈ ఓటమి తెచ్చిన కుంగుబాటో లేక ముఖ్యమంత్రికి ముఖం చూపించలేకో.. నూతన సంవత్సర శుభాకాంక్షలు చెప్పేందుకు తెలంగాణ భవన్‌కు ఎమ్మెల్యేలు వెళ్లలేదు. 

కుటుంబ సభ్యులు ఓడిపోవడం ఇబ్బందిగా మారిందా?

కూకట్‌పల్లి ఎమ్మెల్యే మాధవరం కృష్ణారావు తన బంధువుకు టిక్కెట్ ఇప్పించుకుని గెలుపించుకోగా, మాజీ ఎమ్మెల్యే కేఎస్ రత్నం తన భార్యకు టిక్కెట్ ఇప్పించుకుని విజయం సాధించారు. అయితే టీఆర్ఎస్‌లో కష్టపడి పని చేసే కార్యకర్తలను కాదని.. ఎమ్మెల్యేలు తమ బంధువులకు ఇప్పించుకుని ఓటమి పాలైయ్యారు. కుటుంబసభ్యులు ఎన్నికల్లో ఓడిపోవడంతో పార్టీ ముఖ్యనేతలకు.. ఇతర నాయకులతో మాట్లాడేందుకు వారి ముఖం చెల్లటం లేదని పార్టీ కార్యకర్తలు చెవులు కొరుక్కుంటున్నారు. మరి ఎన్నాళ్లిలా పార్టీతో దాగుడు మూతలు ఆడతారో చూడాలి.