‘జీ తెలుగు’ వినోదాల పరంపరను కొనసాగిస్తూ జీ తెలుగు పాపులర్ షో సరిగమప సరికొత్త సీజన్ తోవచ్చేస్తోంది. మట్టిలోని మాణిక్యాలను వెలికితీస్తూ అత్యంత ప్రేక్షకాదరణతో విజయవంతంగా 15 సీజన్లు పూర్తిచేసుకున్న ఈ ప్రెస్టీజియస్ షో తదుపరి సీజన్ ని ఘనంగా ప్రారంభిస్తోంది. సరిగమప సీజన్ -16 ది నెక్ట్స్ సింగింగ్ యూత్ ఐకాన్ సెప్టెంబర్ 29న, సా|| 6:00 ప్రారంభం కానుంది. అక్టోబర్ 6 నుండి ప్రతి ఆదివారం రాత్రి 9 గంటలకు ఈ షో అలరించబోతుంది.
తెలుగు రాష్ట్రాలతోపాటు ప్రపంచవ్యాప్తంగా ఉన్న ప్రతిభావంతులైన గాయకులకు ప్రోత్సహించే లక్ష్యంతో డ్యాన్సింగ్, సింగింగ్ షోలతో మట్టిలో మాణిక్యాలను గుర్తిస్తోంది జీ తెలుగు. ఇందులో భాగంగానే విజయవంతంగా 15 సీజన్లు పూర్తి చేసుకున్న సింగింగ్ షో ‘స రి గ మ ప’ కొత్త సీజన్ ప్రారంభం కానుంది. ఈ సీజన్లో గాయనీ గాయకులు విలేజ్ వోకల్స్, సిటీ క్లాసిక్స్, మెట్రో మెలోడీస్ అనే మూడు జట్లుగా పోటీపడతారు. ఈ జట్లకు మెంటర్లుగా రేవంత్, రమ్య బెహరా, అనుదీప్ దేవ్ నాయకత్వం వహిస్తారు. ఈ సీజన్కు ఎనర్జిటిక్ యాంకర్ శ్రీముఖి వ్యాఖ్యాతగా వ్యవహరిస్తుండగా, సంగీత దర్శకుడు కోటి, ప్రముఖ గాయని ఎస్పీ శైలజ, పాటల రచయిత కాసర్ల శ్యామ్ న్యాయనిర్ణేతలుగా వ్యవహరించనున్నారు.
ఈ ఆదివారం గ్రాండ్ లాంచ్ ఎపిసోడ్ తో సరిగమప సీజన్ 16 ప్రారంభం కానుంది. ఈ లాంచ్ ఎపిసోడ్ లో మూడు జట్లను సపోర్ట్ చేసేందుకు ముగ్గురు ప్రముఖ సింగర్స్ హాజరు కానున్నారు. విలేజ్ వోకల్స్ ను పెంచల్ దాస్, సిటీ క్లాసిక్స్ ను చిన్మయి సపోర్ట్ చేస్తుండగా మెట్రో మెలోడీస్ ను కేదన్ శర్మ సపోర్ట్ చేయనున్నారు. ఈ గ్రాండ్ లాంచ్ ఎపిసోడ్ కి ప్రముఖ గాయకుడు విజయ్ యేసుదాస్ ముఖ్యఅతిథిగా హాజరుకాగా, హైదరాబాదీ పాపులర్ రాపర్ కేదన్ శర్మ తన అద్భుతమైన పెర్ఫార్మెన్స్ తో అందరినీ ఉర్రూతలూగించనున్నారు. ఇక ఈ సీజన్ మొదటి ఎపిసోడ్ నుంచే కంటెస్టెంట్స్ రకరకాల జోనర్స్ పాటలతో పోటీపడనున్నారు.
జీ తెలుగు సరిగమప సీజన్ 16 ది నెక్ట్స్ సింగింగ్ యూత్ ఐకాన్ గ్రాండ్ లాంచ్ ప్రెస్ కాన్ఫరెన్స్ ని సెప్టెంబర్ 25 న హైదరాబాద్లో నిర్వహించారు. ఈ మీడియా సమావేశంలో కొత్త సీజన్ హోస్ట్, జడ్జిలు, మెంటర్లు, కంటెస్టెంట్లు పాల్గొన్నారు. ఈ సందర్భంగా జడ్జీలు ఈ సీజన్ ప్రత్యేకతల గురించి మీడియాతో మాట్లాడుతూ సంగీతంతో తమకున్న అనుబంధాన్ని పంచుకున్నారు.
జీ తెలుగు చీఫ్ కంటెంట్ ఆఫీసర్ – అనురాధ గూడూరు మాట్లాడుతూ, “యువ, అసాధారణ ప్రతిభావంతులకు ఎల్లప్పుడూ లాంచ్ ప్యాడ్ గా ఉన్న జీ తెలుగు సరిగమప సీజన్ 16 ను ప్రారంభించడం చాలా సంతోషంగా ఉంది. ఈ సీజన్లో సింగింగ్ యూత్ ఐకాన్ కోసం పోటీ జరుగుతుంది. ప్రతి సీజన్ మాదిరిగానే ఈ సీజన్లోనూ ప్రతిభావంతులైన గాయనీగాయకులను ప్రోత్సహించడమే మా లక్ష్యం. ఇప్పటికే మనం చూసిన ఎనర్జీ, ప్యాషన్, టాలెంట్ చెప్పుకోదగ్గవి. తమ కలలను నిజం చేసుకోవడమే కాకుండా లక్షలాది మందికి స్ఫూర్తినిచ్చే ఓ వేదికను అందించడమే మా ఉద్దేశం. ఈ సీజన్ ప్రేక్షకులను ఎంతగానో ఆకట్టుకుంటుందని ఆశిస్తున్నాం’ అంటూ ధీమా వ్యక్తం చేశారు.